سەنبى, 4 ءساۋىر 2020
COVID-19 قازاقستاندا. جۇقتىرعاندار — 525. جازىلعاندار — 36. قايتىس بولعاندار — 5
ينتەرنەت يدەولوگيا... 3725 0 پىكىر 24 ناۋرىز, 2014 ساعات 11:50

ينتەرنەتتەگى ءيميدجدى قالىپتاستىرۋدىڭ قارەكەتى

  

قاراعاندى قالاسىندا ءوتىپ جاتقان IV «بلوگقۇرىلتاي-2014» قازاق ەلىنىڭ ينتەرنەتتەگى ءيميدجىن قالىپتاستىرۋ مەن مەملەكەتتىك يدەولوگيانى الەمتور ارقىلى جۇزەگە اسىرۋدىڭ ءمان-جايىن تالقىلادى. بۇل تۋرالى رەداكتسيامىزعا oبلىس اكىمىنىڭ ءباسپاسوز قىزمەتى حابارلاپ وتىر.

 

قاراعاندىدا كوپتەن كۇتكەن IV «بلوگقۇرىلتاي-2014» جۇمىسىن باستادى.

        قۇرىلتايدىڭ سالتاناتتى اشىلۋ راسىمىنە قاراعاندى وبلىسىنىڭ اكىمى باۋىرجان ابدىشەۆ، بەلگىلى قوعام قايراتكەرلەرى بەكبولات تىلەۋحان، مۇرات ابەنوۆ، تانىمال مەديا-ساراپشىلار – سەرىكقازى كاكىبالانوۆ، وركەن كەنجەبەك جانە ەلىمىزىدىڭ ءار وڭىرىنەن بەلسەندى بلوگشىلار قاتىستى.

        قۇرىلتايدىڭ اشىلۋ سالتانىتىندا ءسوز العان وبلىس اكىمى باۋىرجان ابدىشەۆ قۇرىلتاي قاراعاندىدا ءوتىپ جاتقانىن قۋانىشپەن قابىلداعانىن جەتكىزدى.

        - قازاقتىڭ قاي ءوڭىرى بولسا دا قاسيەتتى دە قاستەرلى. دەگەنمەن قاراعاندى ءوڭىرىنىڭ وزگەگە ۇقسامايتىن ەرەكشەلىكتەرى جەتەرلىك. قاراعاندى – ورەلى ونەرى مەن ماۋەلى مادەنيەتىنىڭ قارا شاڭىراعى. قازاق جەرىنىڭ تۇتاستىعى، حالىقتىڭ بوستاندىعى ءۇشىن كۇرەسكەن باتىرلارىمىزدىڭ، دۋالى اۋىز بيلەردىڭ، اقىن-جىراۋلاردىڭ قۇتتى قونىسى. قاراعاندى – ەلباسى نۇرسۇلتان ءابىشۇلى نازارباەۆتىڭ ەڭبەك جانە ساياسي اتامەكەنى،-دەدى ايماق باسشىسى.

        مەملەكەت تاراپىنان جاڭا تەحنولوگيالاردىڭ دامۋىنا، وتاندىق كونتەنتتىڭ ورىستەۋىنە ەرەكشە كوڭىل ءبولىنىپ كەلەدى. ويتكەنى ساپالى ءارى سالماقتى مازمۇن – اقپاراتتىق قاۋىپسىزدىكتىڭ نەگىزى.

        وبلىس اكىمى بۇل جايتتى دا نازاردان تىس قالدىرماي، ءوز ويىمەن ءبولىستى.

        - بۇگىنگى زامان – اقپاراتتىڭ زامانى، جاھاندانۋ ءداۋىرى. ءبىز دەموكراتيالىق، اشىق قوعامدا ءومىر ءسۇرىپ جاتىرمىز. جان-جاقتان كەلىپ جاتقان اقپارات اعىنىندا دامىل جوق. ال، ونىڭ ىشىندە وزىعى دا، توزىعى دا بار. سوندىقتان بۇل ماسەلەگە وتە ساقتىقپەن قاراعان ءجون. قازنەتتە الەۋمەتتىك جەلىلەردى انا تىلىمىزدە دامىتىپ، سالالىق سايتتار مەن بلوگ-پلاتفورمالاردىڭ اشىلۋىنا مۇرىندىق بولىپ وتىرسىزدار. قازاق بلوگەرلەرى اۋىزبىرشىلىگىنىڭ ارقاسىندا بەلسەندى كۇشكە اينالىپ كەلەدى. وسى شاراعا ەلىمىزدىڭ تۇكپىر-تۇكپىرىنەن جينالعان بلوگشىلار سول بىرلىكتىڭ ۇلگىسىن تانىتىپ وتىر. بۇگىن سىزدەرمەن ويلارىمىزدى ورتاعا سالىپ، اشىق پىكىر الماسامىز دەگەن ويدامىن. ويتكەنى ماقساتىمىز – ورتاق، مىندەتىمىز - ءبىر. ول – ەلدىڭ مۇددەسى، - دەدى باۋىرجان تۇيتەۇلى.

        قازاق بلوگشىلارى قۇرىلتايىنىڭ باستى ماقساتى – قازاق ەلىنىڭ ينتەرنەتتەگى ءيميدجىن قالىپتاستىرۋ، مەملەكەتتىك يدەولوگيانى الەمتور ارقىلى جۇزەگە اسىرۋ، قازاق ءتىلدى ينتەرنەتتى دامىتۋ، انا ءتىلدى سايتتاردىڭ سانىن كوبەيتۋگە ىقپال ەتۋ جانە ينتەرنەت-جوبا ۇسىنۋشى جاستارعا قولداۋ كورسەتۋ بولىپ تابىلادى.

        بلوگقۇرىلتاي اياسىندا بىرنەشە بايقاۋلار ۇيىمداستىرىلادى. اتاپ ايتقاندا، قاراعاندى قالاسىنىڭ 80 جىلدىق مەرەيتويى قارساڭىندا ۇزدىك پوست، بەينەروليك جانە فوتوسۋرەتتەر بايقاۋى وتكىزىلمەك.

        سونداي-اق داستۇرگە اينالعان ستارت-اپ جوبالار بايقاۋى جاريالاندى. ەڭ ۇزدىك دەپ تانىلعان ءۇش جوبا اۆتورىنا قاراعاندى وبلىسىنىڭ اكىمى اتىنان 150 000 ء(جۇز ەلۋ مىڭ) تەڭگە كولەمىندەگى سەرتيفيكاتتار تابىستالادى.

Abai.kz

0 پىكىر