24 ناۋرىزدا «بايقوڭىر» عارىش ايلاعىنا قازاقستاندىق «قازسات-3» سپۋتنيگى جەتكىزىلدى، دەپ حابارلادى ءبىزدىڭ اگەنتتىككە «رەسپۋبليكالىق عارىش بايلانىسى ورتالىعى» اق پرەزيدەنتى ۆيكتور لەفتەر.

«اكادەميك م.ف. رەشەتنيوۆ اتىنداعى «اقپاراتتىق سپۋتنيك جۇيەلەرى» (اسج) ااق حابارلاماسى بويىنشا، «قازسات-3»-پەن بىرگە بايقوڭعىرعا سونداي-اق رەسەيلىك «لۋچ-5ۆ» عارىشتىق اپپاراتى دا جەتكىزىلگەن. ەكى عارىشتىق اپپاراتتى دا رەشەتنەۆ اتىنداعى اسج ماماندارى جاساعان.

«سپۋتنيكتەردى عارىش ايلاعىنا جەتكىزۋ شتاتتىق رەجيمدە ءوتتى. ولاردى تاسىمالداۋعا ارنايى كونتەينەر قولدانىلدى، ونىڭ گاباريتتەرى ءبىر مەزگىلدە ورتا كلاستاعى ەكى عارىشتىق اپپاراتتى تاسۋعا مۇمكىندىك بەرەدى. «اسج» كومپانياسىنىڭ ماماندارى اپپاراتتاردى تاسىمالداۋ كەزىندە كونتەينەر ىشىندەگى وڭتايلى جاعدايدى قامتاماسىز ەتە ءبىلدى»، – دەلىنگەن حابارلامادا.

اكادەميك م.ف. رەشەتنيوۆ اتىنداعى «اقپاراتتىق سپۋتنيك جۇيەلەرى» (اسج) ماماندارى تاياۋداعى ۋاقىتتا عارىشتىق اپپاراتتاردى الداعى قوسارلانا ۇشىرۋعا ازىرلەۋگە كىرىسەدى.

تەلەكوممۋنيكاتسيالىق «قازسات-3» عارىشتىق اپپاراتى قازاقستان  مەن شەكارالاس مەملەكەتتەر اۋماعىندا بايلانىس، تەلەحابار تاراتۋ جانە جوعارى جىلدامدىقتاعى ينتەرنەت قىزمەتتەرىن ۇسىنۋعا ارنالعان. سپۋتنيك «رەسپۋبليكالىق عارىش بايلانىسى ورتالىعى» اق-مەن (قازاقستان رەسپۋبليكاسى) كەلىسۋىم-شارت بويىنشا جاسالىپ، ازىرلەنگەن.  سپۋتنيك 28 Ku-دياپازونى ترانسپوندەرلەرىمەن جابدىقتالعان. سپۋتنيكتىڭ بەلسەندى ءومىر ءسۇرۋ كەزەڭى 15 جىلدى قۇرايدى.

«لۋچ-5ۆ» اپپاراتى «لۋچ» رەترانسلياتسياسى كوپفۋنكتسيونالدى عارىشتىق جۇيەسىنىڭ ءۇشىنشى سپۋتنيگى، ول حعس رەسەيلىك سەگمەنتىمەن، تومەنگى وربيتالىق عارىش اپپاراتتارىمەن، زىمىرىن-تاسىعىشتارمەن، ۇشىرۋ بلوگتارىنىڭ جەرۇستى ستانسالارىمەن بايلانىستى قامتاماسىز ەتۋگە ارنالعان. سپۋتنيك  2006-2015 جىلدارعا ارنالعان رەسەي فەدەرالدىق عارىشتىق باعدارلاماسى اۋقىمىندا دايىندالعان.

«قازسات-3» جانە «لۋچ-5ۆ» عارىشتىق اپپاراتتارىن  2014 جىلعى 28 ساۋىردە بايقوڭىر عارىش ايلاعىنىڭ №81 الاڭىنان «پروتون م» عارىشتىق زىمىرانتاسىعىشىمەن ۇشىرۋ جوسپارلانعان.

قازاقپارات