«بايتەرەك» حولدينگىنىڭ جارعىلىق كاپيتالى بيۋدجەتتىك قارجى ەسەبىنەن 20 ملرد 330 ملن 779 تەڭگەگە ۇلعايتىلدى. بۇل قارجىنىڭ نەگىزگى بولىگى حولدينگتىڭ ەنشىلەس مەكەمەسى - «قازىنا كاپيتال مەنەدجمەنت» اق-نىڭ قارجىلىق كاپيتالىن ۇلعايتىپ، ينفراقۇرىلىمدىق جوبالار قورىن قۇرۋعا جۇمسالادى. ەستەرىڭىزگە سالا كەتەيىك، قر پرەمەر-ءمينيسترى سەرىك احمەتوۆ يندۋستريا جانە جاڭا تەحنولوگيالار مينيسترلىگىنىڭ 2014 جىلدىڭ 6 اقپانىندا وتكەن القا جيىنىندا ينفراقۇرىلىمدىق جوبالار قورىن قۇرۋدى جەدەلدەتۋ تۋرالى تاپسىرما بەرگەن بولاتىن. قوردىڭ ماقساتى – ينفراقۇرىلىمدىق جوبالارعا ينۆەستيتسيا تارتۋ جانە بۇل باعىتتاعى جۇمىستاردى جانداندىرۋ. قالعان 330 ملن 779 مىڭ تەڭگە «تەحنولوگيالىق دامۋ جونىندەگى ۇلتتىق اگەنتتىك» اق-ىنا اسپاپ جاساۋ جونىندەگى كونسترۋكتورلىق بيۋرو قۇرۋعا بولىنەدى. بۇل تۋرالى حولدينگتىڭ ديرەكتورلار كەڭەسىنىڭ العاشقى وتىرىسىندا جاريالاندى. ينفراقۇرىلىمدىق جوبالاردى جۇزاگا اسىرۋعا جەكە ينۆەستيتسيا تارتۋ ماقساتىندا

«بايتەرەك» ۇلتتىق باسقارۋشى حولدينگى جانە «قازاقستاندىق مەملەكەتتىك-جەكە ارىپتەستىك ورتالىعى» بىرلەسىپ، «مەملەكەتتىك-جەكە ارىپتەستىك جوبالارىن سۇيەمەلدەۋ» جشس قۇرىپ، ونىڭ جارعىلىق كاپيتالىنا ۇلەسكە كىرمەك. مەملەكەتتىك –جەكە ارىپتەستىك جوبالارىن سۇيەمەلدەۋ ورتالىعىنىڭ نەگىزگى جۇمىسى ينفراقۇرىلىمدىق، سونىڭ ىشىندە مەملەكەتتىك -جەكە ارىپتەستىك نەگىزىندە جۇزەگە اسىرىلاتىن جوبالاردى قۇرىلىمداۋ جانە سۇيمەلدەۋگە باعىتتالادى. ورتالىقتىڭ الدىن-الا كەلىسىمنەن وتكەن جوبالارىنىڭ ىشىندە الماتى ستانتسياسىن اينالىپ وتەتىن تەمىرجول مەن الماتى جانە قاراعاندى قالالارىندا 300 توسەك ورىندىق كوپسالالى اۋرۋحانالار قۇرىلىسى بار. مەملەكەتتىك-جەكە ارىپتەستىك جوبالاردى سۇيەمەلدەۋ ورتالىعىنىڭ جارعىلىق كاپيتالى 200 ملن تەڭگە كولەمىندە بەلگىلەنگەن. ونىڭ 150 ملن تەڭگەسى نەمەسە 75 پايىزى «بايتەرەك» حولدينگىنىڭ ۇلەسىنە بەرىلەدى، «قازاقستاندىق مەملەكەتتىك –جەكە ارىپتەستىك ورتالىعى» اق-نىڭ ۇلەسى 50 ملن تەڭگە نەمەسە 25 پايىزدى قۇرايدى.

«بايتەرەك» ۇلتتىق باسقارۋشى حولدينگىنىڭ ونجىلدىق دامۋ ستراتەگياسى قابىلداندى

«بايتەرەك» ۇلتتىق باسقارۋشى حولدينگى» اق-نىڭ ديرەكتورلار كەڭەسى حولدينگتىڭ 2014-2023 جىلدارعا ارنالعان دامۋ ستراتەگياسىن بەكىتتى. قۇجاتتا حولدينگتى ينتەگراتسيالانعان دامۋ ينستيتۋتى رەتىندە قالىپتاستىرۋعا بايلانىستى مىندەتتەر مەن تاياۋ ونجىلدىقتاعى ستراتەگيالىق باعىتتار ايقىندالعان.

ءبىرىنشى كەزەكتەگى ستراتەگيالىق مىندەتتەر:

* قارجىلىق جانە وندىرىستىك جۇمىستاردىڭ شىعىنسىز جۇرگىزىلۋىن قامتاماسىز ەتۋ;

* قارجى رەسۋرستارىن باسقارۋدىڭ تيىمدىلىگىن ارتتىرۋ;

* حولدينگ جۇمىسىنىڭ جاريالىلىعىن قامتاماسىز ەتىپ، حالىقتىڭ سەنىمىن ارتتىرۋ;

حولدينگتىڭ 2014-2023 جىلدارداعى نەگىزگى ستراتەگيالىق باعىتتارى:

-ەكونوميكانىڭ باسىم باعىتتارىنا قارجىلىق قولداۋ كورسەتۋ ارقىلى قر ەكونوميكاسىنىڭ تۇراقتى دامۋىنا ىقپال ەتۋ;

- شاعىن جانە ورتا كاسىپكەرلىكتى دامىتۋعا قولداۋ كورسەتۋ;

-قازاقستاندىق كومپانيالاردىڭ ەكسپورتقا شىعۋىنا ىقپال ەتۋ;

- مەملەكەتتىڭ الەۋمەتتىك سالاداعى مىندەتتەرىن جۇزەگە اسىرۋعا ىقپال ەتۋ.

ستراتەگيادا قارجى ينستيتۋتتارىن حولدينگ اياسىندا ينتەگراتسيالاۋ كورسەتكىشتەرى، ينۆەستيتسيا تارتۋدىڭ ءتيىمدى تاسىلدەرى، ينۆەستيتسيالىق ساياساتتىڭ باسىمدىقتارى، ەل ەكونوميكاسىن نەسيەلەندىرۋدىڭ مەحانيزمدەرى ايقىندالعان.

ديرەكتورلار كەڭەسىنىڭ وتىرىسىندا حولدينگ قۇرامىنداعى ەنشىلەس مەكەمەلەر اكتيۆتەرىنىڭ قۇرىلىمىن وڭتايلاندىرۋ ماسەلەسى تالقىلاندى. ساراپتاما بويىنشا، حولدينگ قۇرىلىمىندا ءپروفيلدى ەمەس اكتيۆتەر جوق. دەگەنمەن، بىرقاتار ەنشىلەس كومپانيالار ينۆەستيتسيالىق قورلارعا نەمەسە ينۆەستيتسيالىق جوبالاردى جۇزەگە اسىرۋعا قاتىسىپ كەلگەن. وسىعان وراي، جىل سوڭىنا دەيىن «دامۋ» كاسىپكەرلىكتى قولداۋ قورى 5 ميكروكرەديتتىك ۇيىمنان شىعادى. «تەحنولوگيالىق دامۋ جونىندەگى ۇلتتىق اگەنتتىك» اق تەحنوپاركتەر جۇمىسىن وڭتايلاندىرۋ ماقساتىندا الماتى ايماقتىق تەحنوپاركى مەن ساتپاەۆ اتىنداعى قازاق ۇلتتىق تەحنيكالىق ۋنيۆەرسيتەتىنىڭ تەحنوپاركىن بىرىكتىرۋ باعىتىندا جۇمىس جاساپ جاتىر.

اباي-اقپارات