سارسەنبى, 1 اقپان 2023
قوعام 5875 0 پىكىر 3 ءساۋىر, 2014 ساعات 15:23

ورىنداۋشىلاردىڭ اۋىسۋى قوعامعا جاڭالىق اكەلمەيدى

 

دوس كوشىم، «ۇلت تاعدىرى» قوزعالىسىنىڭ جەتەكشىسى:

- كەشەلى بەرى بولىپ جاتقان بيلىكتەگى تاعايىنداۋلارعا بايلانىستى قانداي پىكىردەسىز؟

- سوڭعى ءبىر جارىم جىلدىڭ ىشىندە ەلىمىزدىڭ ەكونوميكالىق-قارجىلىق ماسەلەسى قۇلدىراپ كەتتى. ايەلدەردىڭ زەينەت جاسىن ۇزارتۋ، زەينەتاقى قورلارىن ءبىر جەرگە توپتاستىرۋ، ءارتۇرلى سالىقتاردىڭ كوبەيۋى وسىنىڭ ءبارى قازىنانىڭ جاعدايى قيىن ەكەنىن كورسەتتى. اتالعان ماسەلەلەردى شەشە الماعان سوڭ، احمەتوۆ ۇكىمەتىنىڭ كەتۋى ابدەن مۇمكىن ەدى.

ەكىنشىدەن، احمەتوۆ ماسىموۆتەن قالعان ءىستى جالعاستىردى. ءماسىموۆتى ء«وزىڭ باستاعان ءىستى ءوزىڭ اياقتا» دەپ اكەلىپ قويعان سياقتى. بىزدە ءاربىر مينيستر جاڭا رەفورما باستاپ، اياقسىز قالدىرىپ كەتە بەرەدى عوي. ءماسىموۆ تە اياقتاماعان ءىسىن ءبىتىرۋى ءتيىس.

- ءماسىموۆتىڭ ۇكىمەت باسشىسى بولىپ تاعايىندالۋىنا بايلانىستى قوعامداعى نارازى كوڭىل-كۇيدى قالاي تۇسىندىرەر ەدىڭىز؟

- ءماسىموۆ كەلسە دە، احمەتوۆ بولسا دا جاڭا رەفورما بولمايدى. بىزدە رەفورمالىق كۇش جوق. ونداي توپ اۆتوريتارلىق جۇيەدە بولمايدى دا.

ءماسىموۆ ۇلتتىق باعىتتاعى قازاقتاردى قابىلدامايدى. ونى مويىنداۋىمىز كەرەك. ول بۇرىن دا بەس جىل ۇكىمەت باسقارعاندا ەكونوميكالىق ورلەۋ، حالىقتىڭ تۇرمىسىن جاقسارتۋعا ەشقانداي جاعداي جاسالعان جوق. سوندىقتان ءماسىموۆ احمەتوۆتەن جاقسى مامان دەپ ايتۋدىڭ قاجەتى جوق. ءماسىموۆتىڭ تاعايىندالۋىنا نارازى كوڭىل-كۇيدىڭ ءبىر ۇشى – احمەتوۆتىڭ ادامي تۇرعىدان ءوزىن ۇستاۋى ەلگە جاققان سياقتى. ونىڭ مادەنيەتتىلىگى، جۇمساقتىعى، ەشبىر ساياسي ماسەلەگە ارالاسپايتىندىعى كەمشىلىگى بولۋى دا ىقتيمال. ءماسىموۆ ۋاقىتىندا نەشە ءتۇرلى ساياسي جوبالاردى جۇرگىزگەنىن بىلەمىز. سونداي ساياسي دۇنيەلەر قايتا قوزادى دەگەن قاۋىپتەنۋ دە بار بولۋى مۇمكىن.

- رەسەيمەن ىقپالداستىقتى ارتتىرۋ، ەۋرازيالىق وداققا ەنۋ قارساڭىندا ءماسىموۆ تاعايىندالدى دەگەن بولجامدارعا نە دەيسىز؟

- كەز كەلگەن ۇكىمەت باسشىسى پرەزيدەنتتىڭ باعىتىن ىسكە اسىرۋشى عانا.

- نىعماتۋللين – پرەزيدەنت اكىمشىلىگىڭ جەتەكشىسى، جاقسىبەكوۆ – مەملەكەتتىك حاتشى بولىپ تاعايىندالدى. بۇل تاعايىنداۋلار تۋرالى نە ايتاسىز؟

- مۇنداي ادامداردىڭ لاۋازىمدى قىزمەتتەرگە كەلىپ-كەتۋىنەن ەشقانداي وزگەرىس بولمايدى.

قايتالاپ ايتام، ءبىر ادامنىڭ كوزقاراسى، باعىتى عانا شەشۋشى ءرول اتقاراتىن اۆتوريتارلىق بيلىكتە ورىنداۋشىلاردىڭ اۋىسۋى قوعامعا جاڭالىق اكەلمەيتىنى ايدان انىق.

Abai.kz

0 پىكىر

ۇزدىك ماتەريالدار