جەكسەنبى, 31 مامىر 2020
COVID-19 قازاقستاندا. جۇقتىرعاندار — 10858. جازىلعاندار — 5220. قايتىس بولعاندار — 40
بيلىك 3333 0 پىكىر 4 ءساۋىر, 2014 ساعات 12:38

مەملەكەتتىك قىزمەتتەر كورسەتۋ – جەكەشەگە بەرىلە مە؟

پرەزيدەنتتىڭ بيىلعى جولداۋىنداعى جاقسى جاڭالىقتىڭ ءبىرى – مەملەكەتتىك قىزمەت كورسەتۋلەردىڭ ءبىرشاماسىن جەكەمەنشىككە جۇكتەپ، ونى باسەكەلەستىك ورتاعا شىعارۋ بولاتىن. بۇل مەملەكەتتىك ورگانداردى ارتىق جۇكتەن بوساتادى، سونىمەن بىرگە بيۋدجەتتىڭ يىعىنا تۇسەتىن ارتىق سالماقتى ازايتادى. سىبايلاس جەمقورلىقتىڭ الدىن الۋعا دا بۇل ءبىرشاما اسەر ەتەرى ءسوزسىز. قالا بەردى ستراتەگيالىق سيپاتى جوق مەملەكەتتىك كاسىپورىنداردى جەكەمەنشىك بيزنەستىڭ قاراۋىنا بەرۋدىڭ تيىمدىلىگى دە كوپ ەكەنى ايقىن. ماسەلەن، دامىعان ەلدەردە الەۋمەتتىك سالانىڭ مەملەكەت اتقاراتىن قىزمەتىنىڭ 45-تەن 60 پايىزعا دەيىنگى ۇلەسى جەكەمەنشىكتىڭ قولىندا. تيىمدىلىگى بولماسا مەملەكەت ءوزىنىڭ فۋنكتسياسىن جەكەمەنشىككە بەرمەس ەدى. دەمەك، تيىمدىلىگى بولىپ تۇر.

بىزدە دە وسى ءادىستى قولدانۋ كەرەكتىگى كوپ ايتىلعانىمەن ونىڭ ورىندالۋى شابان. اسىرەسە، مەملەكەتتىك قىزمەت كورسەتۋلەردى جەكەمەنشىككە بەرۋدىڭ تولىق جۇيەسى وسى كۇنگە دەيىن جاسالعان ەمەس. پرەزيدەنتتىڭ جولداۋىنان كەيىن عانا بۇل سالادا ءبىرشاما قوزعالىستار پايدا بولدى.

كوپ ادامنىڭ تەرەڭ بويلاۋعا ورەسى جەتە بەرمەيتىن ەكونوميكانىڭ وسىنداي قالتارىس-بۇلتارىستارىن كوبىنەسە ء ماجىلىس دەپۋتاتى تۇرسىنبەك ومىرزاقوۆ كوتەرىپ جۇرەدى. ءماجىلىستىڭ سوڭعى جالپى وتىرىسىندا ول ۇكىمەت باسشىسىنا وسى ماسەلەنى كوتەرىپ، جەكەمەنشىككە وتكىزىلۋگە ءتيىستى مەملەكەتتىك فۋنكتسيالاردىڭ (قىزمەت كورسەتۋلەردىڭ) تيىمدىلىگى بويىنشا ساراپ جاسالىپ، مونيتورينگ جۇرگىزىلدى مە دەگەن ساۋال جولدادى. وسىعان وراي ول اقش-تىڭ مىسالىن كولدەنەڭ تارتتى. ولاردا جىل سايىن قانداي قىزمەتتەردىڭ جەكەمەنشىكتىڭ اتقارۋىنا بەرىلۋىن انىقتاپ، ساراپ جاساۋدى بيلىكتىڭ فەدەرالدىق ورگانىنان تالاپ ەتەتىن ارناۋلى زاڭ بار ەكەن. زاڭ اياسىنداعى جاسالعان شارالاردىڭ ناتيجەسىندە باسەكەلەستىك ورتاعا بەرىلەتىن مەملەكەتتىك قىزمەتتەردىڭ ساپاسى ارتاتىنى انىقتالعان. ءتىپتى، مەملەكەتتىك فۋنكتسيالاردى اتقارۋعا كەتەتىن شىعىننىڭ ءوزى 20-30 پايىزعا ازاياتىن كورىنەدى.

قازاقستاندا مەملەكەتتىك باسقارۋ جۇيەسىن جاڭعىرتۋ تۇجىرىمداماسى جاسالعانى بەلگىلى. وسى تۇجىرىمدامانىڭ اياسىندا مەملەكەتتىك ورگانداردىڭ اتقاراتىن قىزمەتتەرى تۇرلەرىنە قاراي ءبولىنىپ، ساراپتالعان. كەيبىر ورتالىق ورگاندار وزدەرىنىڭ كوپتەگەن قىزمەتتەرىن جەكەمەنشىكتىڭ اتقارۋىنا بەرۋگە قارسى ەمەس. الايدا ونىڭ ءتيىمدى بولارىنا كوزدەرى جەتپەي وتىر، دەي كەلىپ دەپۋتات پرەمەردەن كەيبىر مەملەكەتتىك فۋنكتسيالار مەن قىزمەتتەردىڭ جەكەمەنشىككە بەرىلۋىنىڭ تيىمدىلىگىن انىقتايتىن تولىققاندى مونيتورينگ جاسالا ما دەپ سۇرادى. سونىمەن بىرگە ول وسى ۋاقىتقا دەيىن جەكەمەنشىكتىڭ اتقارۋىنا بەرىلگەن اۆتوماشينالاردى تەحنيكالىق بايقاۋدان وتكىزۋ قىزمەتىنىڭ تيىمدىلىگىنە كوز جەتكىزىلدى مە، ارناۋلى ساراپ جاسالدى ما، وسى شارانىڭ ارقاسىندا بيۋدجەت قاراجاتىنىڭ قانشالىقتى ۇنەمدەلگەنى ەسەپتەلدى مە دەگەن ناقتى سۇراق قويادى.

سۇراقتار ارينە، وتە ورىندى. بىراق وعان بەرىلەتىن جاۋاپ قانداي بولارىن قۇداي بىلەدى. ويتكەنى، تەحنيكالىق بايقاۋدىڭ جەكەمەنشىككە بەرىلگەنىنەن وكىمەتكە قانشالىقتى پايدا بولعانىن بىزدە ەشكىم دە ەسەپتەپ كورمەگەن شىعار. ەسەپتەگەن بولسا ەندىگى ايقايلاتىپ جاريالاعان بولار ەدى عوي.

تۇرسىنبەك ومىرزاقوۆ دەپۋتاتتىق ساۋال جاساي وتىرىپ، ۇكىمەتكە ۇسىنىس تا جاساپ قويادى. ماسەلەن، وسى ساۋالىنىڭ سوڭىندا دامىعان ەلدەردە مەديتسينالىق قىزمەتتىڭ 75 پايىزىن جەكەمەنشىك دەنساۋلىق ساقتاۋ ورىندارى اتقاراتىنىن ايتا وتىرىپ، ونىڭ حالىققا تيىمدىلىگىن جەتكىزىپتى. ال بىزدە مۇنداي ورىندار بارلىق مەديتسينالىق قىزمەتتىڭ 18,4 پايىزىن عانا اتقاراتىنىن كورسەتىپتى. سوندىقتان، اقىسىز مەديتسينالىق قىزمەتتى وسىنداي ورىنداردىڭ اتقارۋىنا بەرۋ كەرەك قوي دەگەن سياقتى وي تاستاي وتىرىپ، وسى باعىتتا قانداي شارالار جاسالاتىنىن سۇراپتى.

ارينە، اقىسىز مەديتسينالىق قىزمەتتەردى اتقارۋدى جەكەشەگە بەرسە وعان قاراستىرىلعان بيۋدجەتتىك شىعىنداردى دا جەكەشەنىڭ ەسەبىنە اۋدارۋ كەرەكتىگى بەلگىلى. بىراق، بارلىق بيلىك پەن قارجىلىق شىعىنداردى ۋىسىنان شىعارعىسى كەلمەيتىن ءبىزدىڭ ۇكىمەت جاقىن ارادا وندايعا يكەمدىلىك تانىتا قويماس.

جاقسىلىق قۋاندىق

Abai.kz

0 پىكىر