جۇما, 23 قازان 2020
COVID-19 قازاقستاندا. جۇقتىرعاندار — 110086. جازىلعاندار — 105493. قايتىس بولعاندار — 1796
نە دەيدى؟! 5541 0 پىكىر 2 مامىر, 2014 ساعات 17:23

قوستانايدا لەنينگە ەسكەرتكىش ورناتىلدى

سۋرەتتە: "كوستانايشينسەرۆيس" جشس-نىڭ ۇجىمى. ورتادا - ءوزى باس بولىپ، لەنين ەسكەرتكىشىن ورناتقان "كوستانايشينسەرۆيس" جشس-نىڭ ديرەكتورى ۆالەري مانتۋلين

استانادا قانشا جىل تۇرسام دا تۋعان جەرىم - قوستانايعا بۇيرەگىم بۇرىپ تۇرادى. بيىل دا 1 مامىر مەرەكەسىن دوستارىمنىڭ ورتاسىندا تويلايىن دەپ ەلگە قاراي تارتىپ كەتكەن جايىم بار. تۋعان جەرگە تابانىم تيگەن بويدا "ەلدە نە جاڭالىق بار ەكەن" دەگەن ويمەن وسىندا شىعاتىن ءبىر توپ باسىلىمداردى دۇڭرگىشەكتەن ساتىپ الىپ، اسىقپاي، شاي ءىشىپ وتىرىپ، قاراپ وتىرسام، وسىنداعى ورىس تىلىندە جارىق كورەتىن ءمۇيىزى قاراعايداي، اتىنان ات ۇركەتىن دەيتىندەي "كوستانايسكيە نوۆوستي" دەگەن گازەت كەرەمەت بەزەندىرىلەگەن ءتۇرلى-ءتۇستى گازەتىنىڭ ءبىرىنشى بەتىنە كولدەي قىلىپ "پاميات وبەدينياەت ليۋدەي" (http://kstnews.kz/news/society/vremya_mestnoe/pamyat_obedinyaet_pokoleniya/#.U2N9gVenvoM) دەگەن ماقالا بەرىپتى. بۇل نە قىلعان "پاميات" ەكەن دەپ ۇڭىلسەم، گازەت جۋرناليستەرى قوستانايداعى "كوستانايشينسەرۆيس" دەگەن اتاۋى بار جاۋاپكەرشىلىگى شەكتەۋلى سەرىكتەستىكتىڭ ۇجىمى وزدەرىنىڭ ات شاپتىرىمداي اۋلاسىنا لەنيننىڭ ەسكەرتكىشىن ورناتقاندىعىن شەشەلەرى ۇل تاپقانداي قۋانا حابارلاپتى.

"كۇن كوسەمدى" جادىنان شىعارماعان جەرلەستەرىمە قانشا جەردەن «ريزا» بولسام دا، تاريحتىڭ كۇرسەسىنە لاقتىرىپ تاستالعان وسىناۋ تاس ءمۇسىننىڭ قازىرگى ۇرپاقتى قالاي بىرىكتىرەتىندىگىنە تۇسىنە الماي ميىم قاتتى. ەندى مۇنىڭ جايىن وسى گازەتتىڭ ءبىر بۇرىشىندا قوستانايلىقتاردى مەرەكەمەن قۇتتىقتاعان وبلىس اكىمى نۇرالى سادۋاقاسوۆ بىلمەسە، ءبىز بىلمەدىك. الدە مۇنى مۇمكىن  ول كىسىنىڭ يدەولوگيا جونىنىدەگى ورىنباسارى نەمەسە وسى سالاعا جاۋاپ بەرەتىن ىشكى ساياسات دەپارتامەنتىنىڭ باستىقتارى تۇسىندىرەر. ولار ەندى بىزدەن گورى اقىلدىراق شىعار. لاۋازىمدارىنىڭ ءوزى دە وسىنى تالاپ ەتپەي مە؟
     

ايتپاقشى، حالىقتار دوستىعى دەگەن مەرەكەنى قارسى الۋدا وسىنداعى ماڭدايىمىزعا بىتكەن جالعىز گازەت - "قوستاناي تاڭى" دە وزىندىك "ۇلكەن ۇلەس" قوسىپتى. مۇنداعىلار كوپ ويلانباستان وسىدان از ۋاقىت بۇرىن رەسپۋبليكالىق "ۆرەميا" گازەتى قايتا-قايتا جازعان، قىزمەت بابىن اسىرا پايدالانىپ، پارا العاندىعى ءۇشىن ءۇش جىلعا شارتتى تۇردە سوتتالعان مەرەكە ديحاەۆ دەگەن ازاماتتى وزگەلەرگە ۇلگى ەتىپ، كوسىلە ماقتاپتى. سونداعى ول كىسىنىڭ سىڭىرگەن ەڭبەگى - 1 مامىر كۇنى شىرىلداپ دۇنيەگە كەلگەن ەكەن. ال قىلمىس جاساپ، ءىستى بولعان ادامدى ماقتاپ جازۋ زاڭ الدىندا عانا ەمەس، ادامگەرشىلىككە دە قايشى كەلەتىن ءىس ەكەندىگىنە مۇنداعىلار باسىن قاتىرماسا كەرەك. سوندا وسى وبلىستاعى يدەولوگيا سالاسىنا جاۋاپتى ادامدار قايدا قاراعان؟
      "ويباي، ول تۋرالى ءسوز قوزعاما»،- دەپ باسۋ ايتادى دوستارىم، - بىرىنشىسىنە ءبىزدىڭ اكىمنىڭ ءتىسى باتپايدى. ول وسىنداعى ءبىر "كرۋتويدىڭ" گازەتى. ال ەكىنشىسىن مۇلدەم وقي المايدى. وقىماعاسىن ولاردىڭ نە جازىپ جاتقاندىعىنان مۇلدەم بەيحابار.
       مەرەكەگە بارىپ، جەلپىنىپ قايتام با دەگەن مەن استاناعا وسىنداي اۋىر ويمەن ورالدىم. سوندا مەنىڭ قاسيەتتى تۋعان جەرىمدە ءبىرى ەسكىلىكتى اڭساۋمەن ءومىر سۇرەتىن، ەكىنشىلەرى نە جازىپ وتىرعاندىعىن تۇسىنە المايتىن گازەتتەرگە ء"اي دەيتىن اجە، قوي دەيتىن قوجا" بولماعانى ما؟                                                                                                                                                              

مۇراتبەك داۋرەنۇلى
استانا-قوستاناي-استانا

Abai.kz

0 پىكىر