جەكسەنبى, 23 قاڭتار 2022
قوعام 5402 0 پىكىر 9 مامىر, 2014 ساعات 06:57

قىتاي جۇمىسشىلارى كەشىرىم سۇرادى

ساناۋلى كۇندەر بۇرىن عانا قىتايداعى قانداستارىمىزدىڭ باسىنا كەلگەن جاعداي تۋرالى العاشقى بولىپ جازعان ەدىك. ءۇرىمجى قالاسى ماڭىنداعى جول جوندەۋشى جۇمىسشى قىتايلار بىرنەشە قازاق وتباسىنىڭ وزدەرىنە ءتيىستى جەر تەلىمدەرىنە ەشقانداي رۇقساتسىز، ەسكەرتۋسىز قۇرىلىس جۇرگىزگەن. كەدەرگى كەلتىرمەك بولعان قانداستارىمىزعا قىتاي جۇمىسشىلار اڭگىر تاياق ويناتىپ، قىز دەمەي، بالا دەمەي، بىرنەشە كىسىنى سوققىعا جىققان. ۇلان ەسىمدى قازاق بالاسىن قۋالاپ ءجۇرىپ ساباپ، «بۇلار يەسى جوق، تاۋدا جۇرگەن مال، ءولتىرىپ تاستاساق تا ەشكىم ىزدەمەيدى. قۇنىن تولەپ قۇتىلامىز» دەپ بۇكىل قازاقتى قورلاعان ەدى.  قازاق مۇددەسىن تۋ ەتىپ كوتەرگەن اقپارات قۇرالدارى جۇمىسشى قىتايلاردىڭ ورەسكەل ءىسىن ايىپتاپ،  ەكى ەلدەگى جوعارعى ورىنداردىڭ ارالاسۋىن تالاپ ەتكەن بولاتىن. كەشە عانا باسسىزدىق ارەكەتتەرگە بارعان جۇمىسشى قىتايلاردىڭ باسشىلىعى  تومەندەگى رەسمي كەشىرىم سۇراۋ حاتىن جاريالادى:

ءۇرىمجى قالاسى شىعىس اينالما جوعارعى جىلدامدىقتى تراسساسى قۇرىلىسى بارىسىنداعى زارداپ تارتۋشىلاردان كەشىرىم سۇراۋ حاتى

قۇرمەتتى جارالانۋشىلار جانە تۋىس-تۋعاندارى:

ۇجىمىمىز (جۇڭ جياۋ توبى ەكىنشى قۇرىلىس بريگاداسى) ءۇرىمجى قالاسى شىعىس اينالما جوعارعى قارقىندى تراسساسىنىڭ  ەكىنشى جول بولەگى قۇرلىسىن جۇرگىزۋ بارىسىندا جۇمىسشىلاردى باسقارۋدىڭ بوساڭ بولۋ سەبەبىنەن، جۇمىسشىلارىمىز زاڭسىز تۇردە جەرگىلىكتى تۇرعىنداردى ۇرىپ جازالاۋ وقيعاسىن كەلتىرىپ، تۇرعىنداردىڭ ىشكى دۇنيەسىنە اۋىر جاراقاتتار قالدىردى. سونداي-اق قوعامدىق ورتادا ناشار اسەر قالتىردى. ءبىز شىن نيەتىمىزبەن جارالانعانداردان جانە تۋىس-تۋعاندارىنان كەشىرىم سۇرايمىز. جانە ءبىز بەلسەندى تۇردە ەمحانالارمەن سەلبەسە وتىرىپ، جارالانعانداردىڭ جاقسى ەمدەلۋىنە جانە زيانعا ۇشىراعان مال-مۇلىكتەرىنە تولىقتاي تولەم تولەۋگە ۋادە بەرەمىز. سونداي-اق قاۋىپسىزدىك ورگاندارىنىڭ اتالعان ۋاقيعا بويىنشا زاڭ اياسىندا تەكسەرىس جۇرگىزۋىنە كومەك كورسەتەمىز. بۇدان كەيىن قۇرىلىس جۇرگىزۋ بارىسىندا ءار قانداي زاڭسىز ارەكەتتەر تۋدىرماۋعا كەپىلدىك ەتەمىز. ءسوز سوڭىندا تاعى ءبىر رەت جارالانعانداردان شىن جۇرەگىمىزدەن كەشىرىم سۇرايمىز.

-          جۇڭ جياۋ توبى ەكىنشى قۇرىلىس بريگاداسى.  08.05.2014

0 پىكىر