جۇما, 29 ناۋرىز 2024
جاڭالىقتار 2955 0 پىكىر 21 اقپان, 2010 ساعات 10:24

داۋرەن قۋات. ابايشىل، الاششىل دوستارىڭ قاسىڭدا سەنىڭ

ايىپتالۋشىنىڭ ورنىندا  - ابىلاي وتىر. سابدالين ابىلاي. قارشادايىنان ساڭلاق تانىلعان ابىلاي. وتانىن، حالقىن رياسىز سۇيەتىن وعىلان. تاڭدى تاڭعا ۇرىپ اڭگىمەلەسكەن كەزىمىزدە، ارمان قۋىپ القىنعان بوزبالا شاعىمىزدا اق پەيىلى، اق تىلەگى جان دۇنيەسىنىڭ تازالىعىن، ادالدىعىن ايگىلەپ تۇراتىن ابىلاي. الاكولدىڭ اق جال تولقىنىندا اۋناپ وسكەن اياۋلى دوس... ايىپتالۋشىنىڭ ورنىندا. جوق، مۇمكىن ەمەس!

ايىپتالۋشىنىڭ ورنىندا  - ابىلاي وتىر. سابدالين ابىلاي. قارشادايىنان ساڭلاق تانىلعان ابىلاي. وتانىن، حالقىن رياسىز سۇيەتىن وعىلان. تاڭدى تاڭعا ۇرىپ اڭگىمەلەسكەن كەزىمىزدە، ارمان قۋىپ القىنعان بوزبالا شاعىمىزدا اق پەيىلى، اق تىلەگى جان دۇنيەسىنىڭ تازالىعىن، ادالدىعىن ايگىلەپ تۇراتىن ابىلاي. الاكولدىڭ اق جال تولقىنىندا اۋناپ وسكەن اياۋلى دوس... ايىپتالۋشىنىڭ ورنىندا. جوق، مۇمكىن ەمەس!

جاندى تۇرشىكتىرەتىن، جاعىمسىز، جايسىز «جاڭالىقتى» اۆتوكولىكتىڭ ىشىندە «جاعى ءبىر سەمبەيتىن» راديودان ەستىگەندە دە ءدال وسىلاي «مۇمكىن ەمەس!» دەپ ىشقىنعان ەدىم. قالاي عانا  مۇمكىن دەرسىڭ ؟ ءبىزدىڭ كۇمانىمىزدى اشا تۇسەتىن جايتتىڭ ءوزى دە قاراڭعى ۇيدەگى قارا مىسىقتىڭ قاي تۇستا ەكەندىگىن مەڭزەگەندەي. توتەنشە جاعدايلار جونىندەگى مينيسترلىكتى كەلىپ ەسەپ كوميتەتى تەكسەرەدى. مينيسترلىكتە ەكى ميلليارد تەڭگەنىڭ ەسەبى جوق ەكەن. ەندى ىسكە قارجى پوليتسياسى  ارالاسادى. سول كەزدە مينيسترلىكتىڭ ىشىندەگى ءبىر دەپارتامەنتتى باسقارىپ وتىرعان وسى زاماننىڭ جادىگويى - جاندوس ءىلياسوۆ دەگەن پايدا بولا كەتەدى دە قارجى پوليتسياسىنداعىلارعا پارا بەرۋدىڭ ىڭعايىن تانىتادى. «قۋدى قۋ، شۇقاناقتى - سۋ تابادى»، ارينە. ناعىزىندا بۇگىن ايىپتالۋشىنىڭ ورنىندا توتەنشە جاعدايلار جونىندەگى مينيسترلىكتىڭ ۆيتسە-ءمينيسترى ابىلاي ەمەس، الگى جانتورسىق - جاندوس وتىرۋى كەرەك ەدى. ابىلايدىڭ ادۆوكاتى ۆەنەرا كيم حانىم دا وتكەندەگى سوت بارىسىندا وسىلاي دەدى. كانىگى قورعاۋشى، زاڭنىڭ ىشەك قىرىندىسىن اقتاراتىن بىلگىر مامان، ءسىرا، الباتى سويلەمەيتىن شىعار. بىراق، جازىمىش... قالايدا لاۋازىمدى قىزمەت يەسىنىڭ بىرەۋىنەن قىلمىسكەر جاساۋعا ابدەن دانىككەن قارجى پوليتسياسىنىڭ «سايىپقىراندارىنا» سابدالين قاجەت بولىپتى. سونداي قاراۋ نيەتى ايقىن كۇشتەرگە ابىلايدى ارانداتاتىن ادام دا وڭايدان تابىلا كەتتى. ول  - جاندوس ءىلياسوۆ. جامپاڭداپ ءجۇرىپ « ءىستىڭ ورايىن»  كەلتىرىپ بەرگەن سول. ابىلايدىڭ تاعدىرىن بۇگىنگى پارا الىپ، پاراعا بوككەن جۇيەنىڭ قانجىعاسىنا بوكتەرىپ بەردى دە سۋدان سۇمىرايداي بولىپ قۇرعاق شىقتى. ەگەر سوت ءادىل جۇرسە دەيمىز عوي باياعى، ءىلياسوۆتىڭ ءىسى دە تەكسەرىلۋى كەرەك ەدى. ويتكەنى، ءبارى انىق. ءبارى كوزگە ۇرىپ تۇر. ەسەپ كوميتەتى تەكسەرىپ، قارجى پوليتسياسى قارماق تاستاعاندا  الدىمەن قاپقان - ءىلياسوۆ. پارا بەرۋ جۇمىسىن دا ۇيىمداستىرعان - ءىلياسوۆ. پاراسىز ءىستىڭ اقىرى شاراسىزدىقپەن بىتەرىنە ەشبىر قازاقتىڭ كۇمانى كەم زاماننىڭ پەنداۋي تىرلىگىنە ابىلايدى يتەرمەلەگەن دە - ءىلياسوۆ. الايدا، ءىلياسوۆ - كۋاگەر. سوت وتىرىسىنا اشىق قاتىسپاي كورشى بولمەدەن داۋىسىن قۇبىلتىپ سويلەپ، بىردەڭە تانتقان بولدى. ايتكەنمەندە، ونىڭ جالعان كۋالىگىنەن ەمگە دۇرىس ءسوز تاپپاي سوتقا كەلەگەن جۇرت جاعاسىن ۇستاپ تارادى. وسىندايدا بىزدەگى سوت، قۇقىق قورعاۋ ورگاندارىندا بۇتىنا تولىپ جۇرەتىن اعايىننىڭ بەيشارالىعىنا كۇلەسىڭ. اقىرى ءىلياسوۆتى كۋاگەرلىككە تارتقان ەكەن، بايقۇستى ءارتىس قىلىپ الەككە تۇسىرمەي-اق، ەلگە ءجۇزىن كورسەتىپ اكەلمەي مە؟ الدە ول ءجۇزى جانىپ جۇرتقا قاراي المايتىن دەرتكە شالدىققان با؟ مىنە، كوردىڭىز بە، كۇماننىڭ كوكالا ءتۇيىنى قايدا جاتىر؟..

... ول زامان ءاليحانداردى اتقان مىلتىقتىڭ ۇنىمەن بىرگە قورقىنىشتى بۋىتىركالاردىڭ ۇيىندىسىنە اينالىپ، قيراپ، جەر بەتىنەن كوشتى مە دەپ ويلايتىنبىز. ول زامان جىر ءدۇلدىلى ءىلياستاردىڭ، ماعجانداردىڭ جازىقسىز توگىلگەن قانىن جۇتىپ ءۇنسىز سۇلىق تۇسكەن دالانىڭ سۇرقاي ءبىر كۇندەرى بولىپ كەلمەسكە كەتتى  عوي دەپ ويلايتىنبىز... ابىلاي ەكەۋمىز.  «جاس الاشتىڭ» جاڭا بەتتەرىن جاساپ وتىرىپ. ەندىگى ۋاقىتتىڭ كەمەلدىگىنە، جارقىندىعىنا، قازاق دەگەن قاراشا حالىقتىڭ الدان جاقسى كۇندەرى تۋارىنا بەك سەنىمدىك ەدىك. اسىرەسە، ابىلاي شەكسىز سەنەتىن. ءوزى دە سەنەتىن جانە ساياسي تولعامدى ماقالالارىندا وزگەنى دە سەندىرىپ جازاتىن. ابىلايدىڭ ساراپتاما ماقالالارىنان كەيىن بۇگىنگى قوعام جايىندا قالاي ويلانۋ كەرەكتىگىنە مەنىڭ ءوزىم دە ەرەكشە ءمان بەرىپ مارقاياتىنمىن. الايدا، الاششىل ابىلاي ءبىز سياقتى قاعاز كەمىرىپ قانا قالعان جوق. ەلدىڭ ورتاق يگىلىگىنە ناقتى ۇلەسىم ءتيسىن دەگەن ىزگى تىلەكپەن اكىمشىلىك قىزمەتكە اۋىستى. اكىمشىلىك قىزمەتكە اۋىسارىنىڭ الدىندا ەداۋىر تولقىدى. ءتىپتى، بىردە باس تارتپاق سىڭايىن دا تانىتتى. بىراق ول سوزدەن ىسكە جەتۋدى اقىرىندا ءجون كوردى. ابىلايدىڭ الماتى قالاسى مەن شىعىس قازاقستان وبلىسىنداعى قىزمەتى جايىندا، قۇرمەتتى وقىرمان، مەن سىزدەرگە  تەرەڭ اڭگىمە ايتىپ بەرە المايمىن. ويتكەنى ول ەلىمىزدىڭ شىعىس مەن باتىس ولكەسىنە اتتانىپ، ارامىز ءبىراز الشاقتادى. الايدا مەنىڭ قادىرلى دوسىم، باۋىرىم ابىرويىنا كىر شالدىرماستان ادال ەڭبەك ەتكەنىنە شاگىم جوق.

ىلگەرىدە ءبىر استانادا كەزدەسكەنىمىزدە ونىڭ وت شاشقان جانارىنىڭ تۇڭعيىعىندا تۇنجىراعان وي مەن ۋايىم جاسىرىنىپ تۇرعانىن اڭعاردىم. ول مىناۋ بىلىققان جۇيەدەن قاجىعانداي كورىندى ماعان.

دۇنيەگە ىڭكار ادال جانىڭدى قيانات جارالاعانىمەن «اققا قارا جۇقپايدى»، ابىلاي. وزىڭە سەن!  الاششىل، ابايشىل دوستارىم قاسىمدا دەپ سەن!

 

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1570
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2265
عيبىرات

قايسار رۋحتى عازيز جان

مۇحتار قۇل-مۇحاممەد 3563