جەكسەنبى, 23 ماۋسىم 2024
ارىپتەستىڭ اڭگىمەسى 1546 5 پىكىر 22 مامىر, 2024 ساعات 12:08

حقس: ولار قىلمىسكەرلەر! ولار تۇتقىندالۋى ءتيىس!

كوللاج: Mezgil.kz

حالىقارالىق قىلمىستىق سوتتىڭ پروكۋرورى كارىم حان گازاداعى قانقاساپقا قاتىستى يزرايل مەن حاماس باسشىلىعىنداعى بىرقاتار لاۋازىمدى تۇلعالاردى تۇتقىنداۋعا وردەر تالاپ ەتتى. بۇل تۋرالى Mezgil.kz اقپاراتتىق پورتالى جازدى

كارىم حان تۇتقىنداۋعا وردەر سۇراعان تۇلعالار كىمدەر؟ قاراڭىز:

* يزرايل پرەمەر-ءمينيسترى – بەنيامين نەتانياحۋ;

* يزرايل قورعانىس ءمينيسترى – يواۆ گالانت;

* حاماس ليلەرى – ياحيا سينۆار;

* حاماس ساياسي بيۋروسىنىڭ باسشىسى – يسماليل حانيا;

* حاماس-تىڭ اسكەري قاناتىنىڭ كومانديرى – مۇحامماد دياف.

يزرايلدەن ەكەۋ، حاماستان ۇشەۋ: ولارعا قانداي ايىپتار تاعىلۋدا؟

حالىقارالىق قىلمىستىق سوت پروكۋرورى كارىم حان بۇل اتالعان تۇلعالاردىڭ بارلىعىن دەرلىك: «گازاداعى سوعىس ءۇشىن جاۋاپتى تۇلعالار جانە ولار قىلمىسكەرلەر»، - دەپ اتادى. تۇتقىنداۋعا وردەر سۇراۋدىڭ باستى سەبەبى – «حاماس-تىڭ يزرايلگە شابۋىلى» جانە «ءيزرايلدىڭ گازا سەكتورىنداعى جاۋاپ وپەراتسياسى».

حاماستىقتارعا تاعىلعان ايىپ:

كارىم حان حقس سايتىندا حاماس باسشىلارى تۋرالى, اتاپ ايتقاندا حاماس ليلەرى – ياحيا سينۆار، حاماس ساياسي بيۋروسىنىڭ باسشىسى – يسماليل حانيا مەن حاماس-تىڭ اسكەري قاناتىنىڭ كومانديرى – مۇحامماد دياب (مۇحاممەد دياب ءال-ماسري) تۋرالى: «ولار ادامزاتقا قارسى قىلمىستار مەن اسكەري قىلمىستار ءۇشىن كىنالى. يزرايلگە شابۋىل جاساپ، بەيبىت ادامداردى ءولتىردى. ەڭ كەمى 245 تۇتقىندى كەپىلگە الدى»، - دەپ جازادى.

يزرايل باسشىلارىنا تاعىلعان ايىپ:

ال يزرايل پرەمەرى بەنيامين نەتانياحۋ مەن يزرايل قورعانىس ءمينيسترى يواۆ گالانتتى:  «اشارشىلىقتى سوعىس امالى رەتىندە پايدالاندى، بەيبىت تۇرعىنداردى ءولتىردى جانە وزگە دە اسكەري قىلمىستار جاسادى»، - دەپ ايىپتاعان.

1716223862625620.jpg

(سۋرەت: news.un.org)

پروكۋرور كارىم حان ايىپتاۋلاردى جازىپ، كۇدىكتىلەردى تۇتقىنداۋعا وردەر سۇرادى. ەندى حقس سوتتارى شەشىم قابىلدايدى. اتالعىن قىلمىستاردىڭ دالەلىن تەكسەرەدى. حقس شەشىم قابىلداۋعا قانشا ۋاقىت جۇمسايتىنى ازىرگە بەلگىسىز. شەشىم قابىلداۋ بىرنەشە اپتاعا نەمەسە ايلارعا سوزىلۋى مۇمكىن.

يزرايل پرەمەرى نەتانياحۋ وسىعان دەيىن«ەگەر حقس ءيزرايلدىڭ ۇكىمەت مۇشەلەرىنە گازاداعى سوعىس ءۇشىن تۇتقىنداۋ وردەرىن شىعاراتىن بولسا، بۇل تاريحي اۋقىمداعى داۋ بولماق»، - دەپ مالىمدەگەن.

حقس ءيزرايلدىڭ گازاداعى ءىس-ارەكەتتەرىن تەرگەپ جاتقانىنا 3 جىلدىڭ ءجۇزى بولدى. ال بۇل تاعىلعان ايىپ پەن تۇتقىنداۋ وردەرىنە سەبەپ – 2023 جىلدىڭ 7 قازانىنداعى حاماس-تىڭ يزرايلگە شابۋىلى مەن ءيزرايلدىڭ گازاداعى جاۋاپ وپەراتسياسىنا عانا قاتىستى تاعىلىپ وتىر.

ەسكەرتە كەتەيىك، يزرايل حقس قۇزىرەتىن مويىندامايتىن مەملەكەت.

حاماس سودىرلارى مەن وزگە دە ءىرىلى-ۇساقتى قارۋلى توپتار 2023 جىلدىڭ 7 قازانىندا ءيزرايلدىڭ وڭتۇستىگىنە باسىپ كىرىپ، شابۋىل ۇيىمداستىردى. ناتيجەدە 1200 ادام (دەنى بەيبىت تۇرعىندار) قازا تاپتى. حاماس 240-تان استام ادامدى كەپىلگە، تۇتقىنعا الدى.

ونان سوڭ، يزرايل گازا سەكتورىندا جاۋاپ رەتىندە ناعىز قانقاساپ وپەراتسيا باستادى. قازىرگە دەيىن انكلاۆ تۇرعىندارىنىڭ ىشىندە قازا تاپقاندار سانى 35 مىڭنان اسقان. قازا تاپقانداردىڭ باسىم كوپشىلىگى ايەلدەر مەن بالالار.

حالىقارالىق قىلمىستىق سوتتىڭ بۇل تەرگەۋىنەن وزگە ءيزرايلدى ايىپتاعان تاعى ءبىر شاعىمدى وڭتۇستىك افريكا رەسپۋبليكاسى بۇۇ-نىڭ حالىقارالىق سوتىنا تۇسىرگەن. وار بۇۇ حالىقارالىق سوتىنان: «يزرايل گازادا پالەستينالىقتارعا قارسى گەنوتسيد جاساپ جاتىر ما، سونى تەكسەرۋدى سۇرايمىز»، - دەگەن.

حالىقارالىق قىلمىستىق سوت پەن بۇۇ حالىقارالىق سوتىنىڭ ايىرماشىلىعى – بۇۇ حالىقارالىق سوتى قانداي دا ءبىر قىلمىسى ءۇشىن كۇدىكتى نەمەسە ايىپتى دەگەن تۇلعالاردى قۋدالاي المايدى.

Abai.kz

5 پىكىر