سەيسەنبى, 23 ءساۋىر 2024
1851 3 پىكىر 8 جەلتوقسان, 2023 ساعات 10:38

«ساعاتتى ارتقا شەگەرۋ»: قازاقستان بىرىڭعاي ۋاقىت بەلدەۋىنە كوشپەك

قر ساۋدا جəنە ينتەگراتسيا مينيسترلىگى "قازاقستان رەسپۋبليكاسى اۋماعىندا ۋاقىت ەسەپتەۋ ءتارتىبى تۋرالى" قازاقستان رەسپۋبليكاسى ۇكىمەتىنىڭ قاۋلىسىنا وزگەرىستەر ازىرلەدى، دەپ حابارلايدى Qaz365.kz.

قۇجاتقا سايكەس، استانا، الماتى، شىمكەنت قالالارىنىڭ، اباي، اقمولا، الماتى، جامبىل، جەتىسۋ، قاراعاندى، قوستاناي، پاۆلودار، سولتۇستىك قازاقستان، تۇركىستان، ۇلىتاۋ، شىعىس قازاقستان وبلىستارىنىڭ اكىمدىكتەرى 2024 جىلعى 29 اقپاننان 2024 جىلعى 01 ناۋرىزعا قاراعان ءتۇنى (ساعات 00:00-دە) جەرگىلىكتى ۋاقىتتى 1 ساعاتقا ارتقا اۋىستىرادى.

وسىلايشا قازاقستاننىڭ بۇكىل اۋماعى 5-ساعاتتىق بەلدەۋدە ورنالاسادى.

قازاقستان رەسپۋبليكاسىندا ەكى ۋاقىت بەلدەۋى قولدانىلادى (UTC+5, UTC+6). اتىراۋ، باتىس قازاقستان، ماڭعىستاۋ، اقتوبە جانە قىزىلوردا وبلىستارى – 4- ساعات بەلدەۋىندە (UTC+4+1). استانا، الماتى، شىمكەنت قالالارى جانە قالعان وبلىستار (قوستاناي، سولتۇستىك قازاقستان، اقمولا، قاراعاندى، ۇلىتاۋ، تۇركىستان، جامبىل، پاۆلودار، شىعىس قازاقستان، اباي، جەتىسۋ، الماتى) 5-ساعات بەلدەۋىنە (UTC+5+1) جاتادى.

بۇل رەتتە، بۇگىندە قازاقستان رەسپۋبليكاسى ازاماتتارىنىڭ ەداۋىر بولىگى (قوستاناي، اقمولا، سولتۇستىك قازاقستان، قاراعاندى، پاۆلودار، الماتى، تۇركىستان، جامبىل، ۇلىتاۋ، جەتىسۋ جانە اباي وبلىستارىنىڭ، استانا جانە الماتى، شىمكەنت قالالارىنىڭ تۇرعىندارى) ءوزىنىڭ گەوگرافيالىق ۋاقىتىنان وزىپ-UTC+6 اكىمشىلىك ۋاقىت بەلدەۋى بويىنشا ءومىر سۇرەدى. اۋماقتىق كورسەتىلگەن ايماقتار UTC + 5 ۋاقىت بەلدەۋىندە ورنالاسقان.

بۇل ماسەلەنى كەشەندى پىسىقتاۋ ماقساتىندا قازاقستان رەسپۋبليكاسىنىڭ ساۋدا جانە ينتەگراتسيا مينيسترلىگى جانىنان ءتيىستى جۇمىس توبى قۇرىلدى، ونىڭ قۇرامىنا 60-تان استام مۇشە، ونىڭ ىشىندە قازاقستان رەسپۋبليكاسى پارلامەنتىنىڭ دەپۋتاتتارى، ورتالىق جانە جەرگىلىكتى مەملەكەتتىك ورگانداردىڭ كوپشىلىگى، عىلىمي ينستيتۋتتار، مەديتسينالىق جوعارى وقۋ ورىندارى مەن قوعام قايراتكەرلەرى كىردى.

جۇمىس توبىنىڭ باستاماشىل مۇشەلەرى "قازاقستان رەسپۋبليكاسىنداعى ۋاقىتتى ەسەپتەۋدى زەرتتەۋدىڭ نەگىزگى ناتيجەلەرى" ەسەبىن دايىندادى، وندا ۋاقىت بەلدەۋلەرىن رەتتەۋ نەمەسە ولاردى كۇن (تابيعي) ۋاقىتپەن ۇندەستىرۋ حالىقتىڭ دەنساۋلىعىنا، ەكونوميكاعا، بىلىمگە، قاۋىپسىزدىككە جانە قورشاعان ورتاعا ايتارلىقتاي اسەر ەتەتىندىگى اتاپ وتىلەدى.

وزىق ۋاقىتتىڭ الەۋمەتتىك سالدارلارى – ادامنىڭ سوزىلمالى ۇيقىسىنىڭ قانباۋى، يممۋنيتەتتىڭ، فيزيكالىق جانە اقىل-وي بەلسەندىلىگىنىڭ تومەندەۋىنە اكەپ سوعادى.

2024 جىلعى 1 جەلتوقسانداعى جۇمىس توبىنىڭ وتىرىسىندا قاراۋ ناتيجەسىندە ەسەپ بەكىتىلدى جانە قازاقستان رەسپۋبليكاسىندا UTC+5 بىرىڭعاي ۋاقىت بەلدەۋىن ەنگىزۋ ۇسىنىلدى. ساراپشىلاردىڭ پىكىرىنشە، بۇل نۇسقا ەڭ دۇرىس جانە قولايلى نۇسقا بولىپ تابىلادى، قازاقستاننىڭ كوپتەگەن وڭىرلەرى ءۇشىن تابيعيعا جاقىن ۋاقىتتى پايدالانۋعا مۇمكىندىك بەرەدى.

تۇزەتۋلەر جوباسى 2023 جىلعى 22 جەلتوقسانعا دەيىن قوعام بولىپ تالقىلاۋ ءۇشىن اشىق نقا پورتالىندا جاريالاندى.

Abai.kz

3 پىكىر