الداسپان جىردىڭ نارقىزى
ايتتىم، سالەم، قالامقا-ا-ا-اس...
ساعان قۇربان مال مەن باس!
(ابايدىڭ ءانى)
اۋەلەتە شىرقالاتىن اباي انىندەگى قالام قاستى ارۋدىڭ اتىن نارەستەسىنە ەنشىلەگەندە اتا-انا قىزدارىنىڭ بولاشاق تاعدىرىنا – اۋەلەتە شىرقالعان ءان جەتەر شىرقاۋ بيىكتە اتى جۇرەرىنە نيەت ەتتى مە، كىم بىلەدى؟...
اتى الەمگە ايگىلى، ورال ءوڭىرى توپىراعىندا دۇنيەگە كەلگەن، قازاقتىڭ ءان-جىر قازىناسىنا سۇبەلى ۇلەسىن قوسقان، قازاق قازاق بولعالى وسى ءبىر ەجەلدەن دامىعان اسقاق ءان ونەرىندە وزىندىك ءىز قالدىرعان مۇحيت مەرالىۇلىنىڭ شوبەرەسى شايقى مۇحيتوۆتىڭ اسا كورنەكتى ءانشى، قازاقستاننىڭ حالىق ءارتىسى، مەملەكەتتىك سىيلىقتىڭ لاۋرەاتى عاريفوللا قۇرمانعاليەۆتىڭ ۇستازى بولعانىن ەسكەرسەك، ءوزىنىڭ قىسقا عۇمىرىن قازاقتىڭ جىر-تەرمەسىنە ارناعان قالامقاس وراشەۆانىڭ وسى عارەكەڭنىڭ ونەر مەكتەبىنەن ءدارىس الۋىندا اللاتاعالانىڭ ءوزى ۇزىلمەۋگە جازعان قۇدىرەتتى ءبىر ساباقتاستىق جاتىر. اڭىزعا بارا-بار وسىنداي قۇبىلىس قاي ونەردە بولماسىن كەزدەسەتىن، ونەر ءورىسىنىڭ كەڭەيە تۇسۋىندەگى زاڭدىلىق. قازاقتىڭ كەڭ ساحاراسىن، دارحان بولمىسىن، الىپ جۇرەگىن باۋراعان جىر ولمەيىنشە، قازاق ەشقاشان ماڭگۇرت بولمايدى، دەپ ءباس تىگە ايتۋعا حاقىلىمىز!
ايتتىم، سالەم، قالامقا-ا-ا-اس...
ساعان قۇربان مال مەن باس!
(ابايدىڭ ءانى)
اۋەلەتە شىرقالاتىن اباي انىندەگى قالام قاستى ارۋدىڭ اتىن نارەستەسىنە ەنشىلەگەندە اتا-انا قىزدارىنىڭ بولاشاق تاعدىرىنا – اۋەلەتە شىرقالعان ءان جەتەر شىرقاۋ بيىكتە اتى جۇرەرىنە نيەت ەتتى مە، كىم بىلەدى؟...
اتى الەمگە ايگىلى، ورال ءوڭىرى توپىراعىندا دۇنيەگە كەلگەن، قازاقتىڭ ءان-جىر قازىناسىنا سۇبەلى ۇلەسىن قوسقان، قازاق قازاق بولعالى وسى ءبىر ەجەلدەن دامىعان اسقاق ءان ونەرىندە وزىندىك ءىز قالدىرعان مۇحيت مەرالىۇلىنىڭ شوبەرەسى شايقى مۇحيتوۆتىڭ اسا كورنەكتى ءانشى، قازاقستاننىڭ حالىق ءارتىسى، مەملەكەتتىك سىيلىقتىڭ لاۋرەاتى عاريفوللا قۇرمانعاليەۆتىڭ ۇستازى بولعانىن ەسكەرسەك، ءوزىنىڭ قىسقا عۇمىرىن قازاقتىڭ جىر-تەرمەسىنە ارناعان قالامقاس وراشەۆانىڭ وسى عارەكەڭنىڭ ونەر مەكتەبىنەن ءدارىس الۋىندا اللاتاعالانىڭ ءوزى ۇزىلمەۋگە جازعان قۇدىرەتتى ءبىر ساباقتاستىق جاتىر. اڭىزعا بارا-بار وسىنداي قۇبىلىس قاي ونەردە بولماسىن كەزدەسەتىن، ونەر ءورىسىنىڭ كەڭەيە تۇسۋىندەگى زاڭدىلىق. قازاقتىڭ كەڭ ساحاراسىن، دارحان بولمىسىن، الىپ جۇرەگىن باۋراعان جىر ولمەيىنشە، قازاق ەشقاشان ماڭگۇرت بولمايدى، دەپ ءباس تىگە ايتۋعا حاقىلىمىز!
ال ءان مەن جىر قازاقى بولمىسىمەن مىڭ ءولىپ، مىڭ تىرىلگەن جانى ءسىرى وسى حالىقتىڭ رۋحىنىڭ ماڭگى ولمەيتىندىگىن، ونەرىنىڭ دە، قاسيەتىنىڭ دە جەر بەتىنەن جويىلىپ، ءوشىپ كەتپەيتىندىگىنىڭ ايقىن دالەلى ىسپەتتى! ولاي دەۋگە سوناۋ جىلدارداعى ۇلتتىق مۇراعا كەلگەندە شەكتەۋى شەكسىز كەڭەستىك ءداۋىردىڭ وزىندە ونەر وردالارى اتىنان حالىق اراسىنا شىعىپ، ونەر زەرتتەۋشىلەرىنىڭ اسىل قازىنانى زەرتتەپ، زەردەلەۋىنە تىيىم سالىنباعانى دالەل. «ەل ءىشى – ونەر كەنىشى» دەگەن قاعيدامەن، سول كەنىشتەن قازاقتىڭ جىر مايەگىنىڭ ەل اراسىندا ساقتالعان نۇسقالارىن حالىق قازىناسىنا قوسۋعا ەڭبەك سىڭىرگەن جىرشى قىزدارىمىزدىڭ ءبىرى – قالامقاس وراشەۆا ەدى.
ءان-جىردى ەنشىلەگەن رۋح يەسى، حالقىنىڭ اياۋلى پەرزەنتى قالامقاس وراشەۆا بيىلعى ناۋرىزدىڭ جيىرما تورتىندە ءتىرى جۇرسە، الپىسقا كەلەدى ەكەن! ولشەۋلى عۇمىر كەسىلگەن تاعدىرىندا ونەر سالاسىندا كوپ ەڭبەك ءسىڭىرىپ، تۋعان وڭىرىندە دامىعان جىر-تەرمەنىڭ اۋەنىن اۋەلەتە شىرقاعان قايران ءانشىنىڭ ارتىندا ءۇش قىزى – قارلىعاشتاي اسىل دا اياۋلى پەرزەنتى، ونەردەگى وشپەس ءىزى قالدى. اقمارالى اناسىنىڭ ونەر جولىنا دەن قويىپ، ا. جۇبانوۆ اتىنداعى مەكتەپتە شاكىرتتەرگە دومبىرادان ءدارىس بەرەدى.
قالامقاس جىرشى مۇراسىنا قولدا بار دەرەكتەرگە سۇيەنە وتىرىپ، توقتالا كەتەلىك.
ونەر جولىنا كىشكەنتايىنان جەتەكتەپ ءجۇرىپ باۋلىعان ءسىڭلىسى مەيرامكۇل وراشەۆا بۇگىندە اپاسىنىڭ جولىن قۋىپ، جىر-تەرمەنى سۇيەتىن تىڭدارماندارىن ءتانتى ەتىپ جۇرگەن ونەر جولىن كيە تۇتىپ،قاستەرلەپ جۇرگەن قىزداردىڭ ءبىرى. قالامقاس ءبىلىم العان وقۋ ورداسىندا شاكىرت بولعان جىلدارىن ەسىنە السا: «اپامنىڭ ەڭ اسىل ارماندارىنىڭ ءبىرى – مەنى ءوز قادىرلەيتىن قازاقتىڭ جىر-تەرمەسىن ناقىشىنا كەلتىرە ورىنداۋعا تاربيەلەۋ بولاتىن. مەن بويىما دارىعان ونەردى سۇيە تۇرا، جاستىعىم با، الدە اپاما ەركەلەدىم بە، ايتەۋىر باستاپقىدا سونشالىقتى ەڭبەكقور بولا قويمادىم. ال، اپام، ماعان تاپسىرما بەرىپ قويىپ، ءوزى شارۋاسىمەن اينالىساتىن. وقتىن-وقتىن كەلىپ تەكسەرەدى. ءبىر قوراپ سىرىڭكەنىڭ شىرپىسىن الدىما قويادى، ءار ورىنداعان سايىن ءبىر تالدان شەگەرىپ وتىراسىڭ، دەيتىن، مەن اپامنىڭ كوزىن الا بەرىپ، ەكى-ءۇش تالىن شەگەرەمىن... بالالىق قوي. قازىر اپام بار سول داۋرەن قايتا ورالسا عوي... بىردە مىناداي وقيعا بولدى. ۇستازىم وزگە شاكىرتتەرىمەن دايىندىق جۇرگىزىپ جاتقان. ماعان، سەنى قالامقاس اپكەڭ مەن جەزدەڭ دايىنداسىن، ۇيگە قايتا عوي دەدى. كەيىن ويلاسام، ۇستازىمنىڭ ەرىنگەنىنەن ەمەس، مەنىڭ قالامقاس اپام مەن جەزدەم جاقسىلىقتىڭ الدىندا ولاردىڭ ونەرىنە باس يگەندىگىن ءتۇسىندىم. ويتكەنى، ول كىسىلەر تازا ورىنداۋشى عانا ەمەس، كىم-كىمگە دە قالتقىسىز ۇستازدىق ەتەتىنىن كوپشىلىككە مويىنداتقان جىرشىلار ەدى. نەبارى وتىزدان ەندى اسقان قوس جىرشى ەل ەسىندە ماڭگى قۇرمەت تۇعىرىندا قالىپ ەدى...» دەپ، سىر تارقاتادى.
قالامقاس دۇنيەگە كەلگەن ناۋرىز ايى – جىل باسى. اتا ءداستۇر جاڭعىرىپ، ناۋرىز تويى ەلىمىزدە تۇڭعىش تويلانعان، وتكەن عاسىردىڭ سەكسەن سەگىزىنشى جىلىنىڭ ناۋرىزىن قالامقاستىڭ ومىرلىك دوسى، قيماس قۇربىسى ءسانيا باقتىگەرەەۆا بىرگە وتكىزگەن از عانا جىلداردى اڭگىمەلەسە، كوز الدىڭا ولمەس رۋح يەسىنىڭ شىنايى بەينەسىن اكەلەدى. ويتكەنى، جانىنداي سۇيگەن ادال دوسىن جادىنان كۇندىز دە، تۇندە دە ءبىر شىعارا الماي، جىلدار بويى تورىعا ءجۇرىپ، قالامقاستىڭ قايعىسىنا قابىرعاسى قايىسا ايتقان اڭگىمەسى تۇگەسىلىپ بىتپەيتىن داستان. وزىمەن بىرگە وتكىزگەن، ءوزارا تىلەكتەس، جۇپتارى جازىلماعان كۇندەرىن ەسىنە السا، اڭگىمە بۇگىن-ەرتەڭ اياقتالار دەپ كۇتپەڭىز. سول جىلعى ناۋرىز تويى، ەلىمىزدە تۇڭعىش اتالىپ وتكەن ناۋرىزدا تۇسكەن، قايتالانباس ءساتتىڭ بەلگىسى – فوتوسۋرەتتەرگە قاراپ وتىرىپ، بولمىسىنان سەزىمتال، نازىك تە اسەرشىل ءسانيا اپاي داۋسى دىرىلدەپ، وكىنىش پەن ساعىنىش ارالاس مۇڭىن شاقتى. ...ناۋرىزعا كەرەمەت ازىرلەندىك. قالامقاس ماعان ورنەكتەپ كەستەلەگەن قىزىلكۇرەڭ شاپاندى سىيعا تارتتى. بالالارىمىز قاتار، ولاردا دا ءۇش قىز، مەندە دە ءۇش قىز. التى قىزدىڭ ءبىر جەردە ويناپ، تىپ-تىنىش وتىرعانىن كىم كورگەن. شەتىنەن ويىن بالالارى، جۇگىرىپ، جان-جاعىن قىزىقتاپ، اسىر سالىپ، لەزدە ساياباقتا قىدىرىپ جۇرگەن توپ-توپ ادامدارعا ارالاسىپ كەتە بارادى. ولاردان كوز جازىپ قالمايىن دەپ زىر جۇگىرىپ ءجۇرىپ، قالامقاس، قالامپىرلار سۋرەتكە تۇسكەندە، مەنى تابا الماي قالىپتى. قايتالانباس ءساتتىڭ ءبىر كورىنىسى مىناۋ ەدى دەپ، ءسانيا اپاي قالامقاس وراشەۆا، قالامپىر راحيموۆا جانە بۇلبۇل كوبەلەكوۆا ۇشەۋى تۇسكەن سۋرەتتى ۇسىندى. قازىر ۇشەۋى دە و دۇنيەلىك بولدى. سۋرەتكە تۇسپەگەن ماعان ولاردى ساعىنۋ عانا بۇيىرىپتى... اپاي كۇرسىنە وتىرىپ تاعى دا ەستەلىككە كەزەك بەرەدى. وتكەن كۇننىڭ ايشىقتى سۋرەتىنە نازار سالايىق.
...وزبەكستان جەرىنە گاسترولگە شىققان ەرلى-زايىپتى جاقسىلىق پەن قالامقاسقا ساپارلاس بولىپ تۇرەكەڭ (وتاعاسى), كىشى قىزىم گۇلجان بەسەۋمىز ون سەگىزىنشى سوۆحوز دەگەن مەكەنگە كەلىپ جەتتىك. قازاقتار كوپ، جەر وزبەك اعايىنداردىكى. شارۋاشىلىق باسشىلارى كەرەنەۋ تارتا، اسا قۇراق ۇشپاي، كەڭەستىك ستاندارتتا سالىنعان كلۋبتى اشىپ، كونتسەرتكە جينالعان حالىق ىشكە لاپ قويدى. ميكروفوننىڭ جوق ەكەنىن ەستىگەن قالامقاس ءتىپتى ارقالانىپ الدى. جىر توگىلدى، توگىلىپ ەمەس-اۋ، قاناتتانىپ، زالدى باۋراپ اكەتتى. اسقاق ءۇننىڭ اۋەنى زالدى كەرنەپ كەتتى. قابىرعانى قايىستىرا جىرلاعان، جىرشى قىزدىڭ داۋسى بىرەسە رۋحىڭدى سەرپىلتە، تىنىسىڭدى كەڭەيتسە، بىردە قۋ جانىڭدى شۇبەرەككە تۇيگىزىپ، ءبىر ۋىس حالگە تۇسىرەدى... وسى ءحالدى باسىنان كەشىرە وتىرىپ، ساعاتتاپ ساحنادان تۇسىرمەي جىرشىعا تابىنىپ، ۇيىپ حالىق وتىر. كەڭ ساحارادا كوسىلە شاپقان جۇيرىكتىڭ تۇياعىنىڭ استىندا يلەنىپ جاتقان قارا جەردەي ابدەن ءيى قانسا دا، جىرعا سۋساعان كوڭىل شولدەرى باسىلار ەمەس. بىردە توپەلەگەن قارا نوسەر سەلدەتە كوڭىل كىرىن جۋعانداي، ەندى بىردە الاي دا تۇلەي الاقۇيىن ەتەك-جەڭىڭدى جيناتپاي قانكوبەلەك ۇشىرعانداي اپشىڭدى قۋىرىپ ءبىر تىندى-اۋ!
شاردارا، جەتىساي، ءمىرزاشول ساپارلارى دا ەستەن كەتپەس قىزىقتى ساپارلاردىڭ ءبىرى ەدى... وتكەن كۇننەن بەلگى كوپ... قالامقاس وتە مەيىرىمدى، ونەرگە شەكسىز بەرىلگەن، ءارى تاكاپپار، كوزدەرىنەن ۇشقىن اتىپ تۇراتىن جالىندى ەدى! قالامقاسقا كوز ءتيدى، ونىڭ بويىندا بۋىرقانعان قانى جاپ-جاس، وتتى-جىگەرلى بولمىسىنا سىيماي، ورلىگى مەن ونەرى ونى ورتەپ كەتتى، دەپ اياقتادى ءسانيا اپاي ءسوزىن، نەمەرەسى ءاميرانىڭ شەكەسىنەن مەيىرلەنە يىسكەپ، ساعىنىش ماۋقىن باسقانداي بولىپ. تاعى دا كوزىنە جاس الدى!..
بۇگىنگىدەي ەگەمەندىككە قول جەتكىزگەن بايراقتى ەل بولعان باقىتتى كۇنگە كۋا بولۋدى سول ساڭلاق ءانشىنىڭ – قازاق ونەرىنىڭ ءىنجۋ-مارجانىن جوقتاۋشىلاردىڭ ءبىرى قالامقاستىڭ ماڭدايىنا جازباعان تاعدىرعا شارا بار ما! ارتىندا قالعان، ونىڭ ونەرىنە تابىنىپ، اتىن ارداقتاعان تىڭداۋشىلار، ءبىزدىڭ مىندەتىمىز ءار كەزدە تام-تۇمداپ ول تۋرالى جازىلعان، ايتىلعان دەرەكتەردى، تىم بولماعاندا، ءتىرى بولسا وسىنشاما جاسقا تولار ەدى دەگەن نيەتپەن ەل ەسىندە جاڭعىرتىپ وتىرۋ عانا. ونەردى قاستەرلەپ، ءومىرىن ارناعان، بار-جوعى وتىز بەس جاسىندا باقيعا اتتانعان اياۋلى قازاق پەرزەنتىنىڭ رۋحىنا تاعزىم ەتىپ، كەيىنگىلەرگە تانىستىرۋ.
وراشەۆا قالامقاس قوجاحمەتقىزى 1953 جىلى 24 ناۋرىزدا باتىس قازاقستان وبلىسى، اقجايىق اۋدانى، العاباس اۋىلىندا ون بالالى وتباسىندا دۇنيەگە كەلگەن قالامقاستىڭ بويىنا جاستايىنان قازاقي تاربيە مەن ونەرگە دەگەن قۇشتارلىقتىڭ ءدانىن ەككەن اجەسى - ءباتيما، ول كىشەنتاي قالامقاستىڭ وجەت تە زەردەلى، ءان-جىردى قايدان ەستىسە دە قۇلاعىنا قۇيىپ الاتىن قابىلەتىن قولداپ، مەيىرلەنە ايتىپ وتىراتىن. ءتىپتى كىشكەنتاي قالامقاس گازەت-جۋرنالدان وقىعان ولەڭدەرىن ماقامداي ايتىپ، جاتتاپ الۋعا بەيىم ەدى. اكەسى قوجاحمەت قىزىنىڭ بويىنداعى ۇشقىندى ەرتە تانىدى. «قىزىم اتاقتى ءانشى بولادى، تەلەديداردان ءالى-اق تاماشالاپ تىڭدارمىز» دەپ وتىرادى ەكەن. ورتا مەكتەپتىڭ جوعارى سىنىپتارىن ورال قالاسىندا وقىعان قالامقاس وبلىس كولەمىندە وتكەن ونەر سايىستارىنا قاتىسا ءجۇرىپ، تەرمە ورىنداۋدا ەرەكشەلەنىپ، كوزگە تۇسەدى. ەل ىشىندە ونەرلى جاستاردى ىرىكتەپ جۇرگەن استانالىق (الماتىلىق) ونەر قامقورشىلارى قالامقاسقا الماتىدا ءبىلىم الۋ كەرەكتىگىن ايتادى.
قالامقاستىڭ جىرشى-تەرمەشىلىك قابىلەتىنىڭ شەكسىزدىگى سونداي، ۇزاق تەرمەلەردىڭ ءوزىن لەزدە جاتتاپ، ماقامىن دا كەلىستىرە ورىنداۋدى ماقسات ەتەتىن. ول ءۇشىن دەمالىس دەگەننىڭ ءوزى – الداعى رەپەرتۋاردى پىسىقتاۋ بولاتىن. بالا تاربيەسى، جانۇيانىڭ تاۋقىمەتى قالامقاستى ونەر جولىنان قالدىرىپ كورگەن ەمەس. ومىرلىك جارى جاقسىلىق ەكەۋى بايانسىز قىسقا عۇمىردا كوپتەگەن ءىس تىندىردى.
قالامقاس وراشەۆا 1971 جىلى ورتا مەكتەپتى بىتىرگەن سوڭ الماتى قالاسىنداعى رەسپۋبليكالىق ەسترادا تسيرك ونەر ستۋدياسىنىڭ قازاق سسر-نىڭ حالىق ءارتيسى، مەملەكەتتىك سىيلىقتىڭ لاۋرەاتى عاريفوللا قۇرمانعاليەۆتىڭ كلاسىنا قابىلدانىپ، 1973 جىلى ۇزدىك اياقتادى. مەملەكەتتىك قازاقكونتسەرت گاسترول بىرلەستىگىنە ءانشى بولىپ جۇمىسقا ورنالاسادى. سول جىلدان باستاپ، قازاقستاننىڭ بارلىق ايماعىن، سونىمەن قاتار وزبەكستان، قاراقالپاقستان، تۇركمەنستان، قىرعىزستان، رەسەي مەملەكەتتەرىن ارالاپ، قازاقتىڭ ءان ونەرىن كەڭىنەن ناسيحاتتاي باستايدى. وزبەكستانعا ءجيى ساپار شەگەتىن، سول وڭىردەن جىرشى-تەرمەشى كەلىپتى دەگەندى ەستىسە بولدى، وزدەرىنىڭ پاتەر جالداپ جۇرگەنىن دە ۇمىتاتىن، دەرەۋ، ولاردى قوناق ەتىپ، تەرمەنىڭ قىزىعىمەن تاڭ اتىپ، كۇننىڭ باتقانىن دا ەلەمەيتىن. ساياسي ءمانى بار گاسترولدىك ساپارلارمەن شەت مەملەكەتتەردە دە ونەر كورسەتكەن. رەپەرتۋارىندا حالىق اندەرىمەن قاتار اسان قايعى، بۇقار، ماحامبەت، شەرنياز، بازار، مايلىقوجا، ناۋرىزبەك، تۇرماعامبەت، سارتاي، تەرمە-تولعاۋلارىن تىڭداۋشىعا ناشىنە كەلتىرە شىرقاعان تەگەۋرىندى داۋسى ءالى قۇلاقتان وشكەن جوق. اسىرەسە نۇرپەيىس بايعانيننىڭ «نارقىز»، «تورەحان» جىر-داستاندارى قالىڭ كوپشىلىككە قالامقاس ەسىمىن ايگىلەدى. اقۇشتاپ باقتىگەرەەۆانىڭ «انا ماحابباتى» تولعاۋى دا كوپشىلىك نازارىنا العاش رەت قالامقاستىڭ ورىنداۋىندا ۇسىنىلدى.
1983-86 جىلدارى كسرو حالىق ءارتيسى، مەملەكەتتىك سىيلىقتىڭ لاۋرەاتى، ايگىلى ديريجەر شامعون قاجىعاليەۆتىڭ شاقىرۋىمەن، جۇبايى ءانشى جاقسىلىق سارسەنعاليەۆ ەكەۋى قازاقتىڭ قۇرمانعازى اتىنداعى مەملەكەتتىك اكادەميالىق حالىق اسپاپتارى وركەسترىنە قىزمەتكە ورنالاسادى. 1986 جىلدان ءومىرىنىڭ سوڭىنا دەيىن ءسۇيىنباي اتىنداعى الماتى وبلىستىق فيلارمونياسىندا قىزمەت اتقاردى.
حالىقتىڭ سۇيىكتى ءانشى، تەرمەشى، جىرشى قىزى 1988جىلى 12 قاراشادا الماتى قالاسىندا دۇنيە سالدى. سوڭىندا ءۇش قىزى قالدى.
بەس جىل سايىن ورال وبلىسىندا قالامقاس اتىنداعى بايقاۋ ءوتىپ تۇرادى، قىز-كەلىنشەكتەر اراسىندا وتكىزىلىپ تۇرادى. ەلۋ جىلدىعىندا، ەلۋ بەس جىلدىعىندا وتكىزىلدى.
ءيا، قالامقاس اپكەسى جايىندا ونىڭ تۋعان ءسىڭلىسى، ونەردەگى ءىزباسارى، جوقتاۋشى شىراقشىسى مەيرامگۇل وراشەۆا تەبىرەنبەي ءسوز ايتپاس ەدى. بۇگىندە قالامقاس ورىنداعان تەرمەلەردى وزدەرى ورىنداپ، ۇزىلگەندى جالعاۋعا تالپىنىپ جۇرگەن ونەرپاز وتباسىمەن سۇحباتتاسۋ كىم-كىمگە بولسا دا ءلاززاتتى اسەر قالدىرادى. شىركىن، ونەردىڭ كيەلى جولى! اۋەلى ونەردى سەن شارىقتاتىپ، ونەر جولىندا تەر توكسەڭ ونەر سەنىڭ اتىڭدى بيىككە جەتكىزەرى حاق!
ۇلت تاريحىندا كوكىرەكتەرىنەن توگىلتە اقتارىپ كۇمبىرلەگەن كۇيلەرىن، اۋەلەگەن اسقاق ۇندەرىن قالدىردى، ول مۇرا ساقتالىپ بۇگىنگىگە جەتتى، سول مۇرا – ەرتەڭگە اپارار قازىنامىز.
قالامپىر كەنجەعاليقىزى، جۋرناليست.
الماتى.
Abai.kz
