بەيسەنبى, 28 ناۋرىز 2024
جاڭالىقتار 3602 0 پىكىر 9 ماۋسىم, 2013 ساعات 19:20

مەندەگى جالعىزدىق – اقىننىڭ ىشكى الەمىنىڭ جالعىزدىعى، وقشاۋلىعى، بولەكتىگى

ەرلان ءجۇنىس، اقىن:

ەرلان ءجۇنىس، اقىن:

ەرلان، ەلورداعا كوش تۇزەگەن زيالى قاۋىمنىڭ ىزىمەن «استانا – بولاشاقتىڭ قالاسى» دەپ ۇلكەن ارمانمەن  استاناعا قونىس اۋدارىپ ەدىڭىز. الماتىعا قايتىپ كەلۋىڭىزگە نە سەبەپ؟ الدە مۇنداعى ادەبي ورتانى ساعىندىڭىز با؟
– الماتىعا قايتىپ كەلۋىمنىڭ الەۋمەتتىك سەبەبى دە، رۋحاني سەبەبى دە بار. باسىندا تۇرعىلىقتى باسپاناسى جوق ادام ءوزى قالاعان قالادا تولىق ەركىندىكتە ءومىر سۇرە المايدى. ياعني ءبىر جەرگە قازىق بولىپ قادالىپ، بايلانا المايدى. ايتسە دە باسپانام بولماعاندىقتان استانادا تۇراقتاپ قالا المادىم دەپ تە شاعىنا المايمىن. ويتكەنى، نارىقتىڭ زامانىندا كەز كەلگەن قازاقتىڭ باسىنداعى جاعدايدى مەن دە كەشىپ ءجۇرمىن. اقىن ەكەنمىن دەپ جانىمدى قازاقتىڭ قايبىر بالاسىنىڭ جانىنان ارتىق سانامايمىن. وتىزعا جاسى كەلگەن، ەكى-ءۇش بالاسى بار ءبىز سياقتى ازاماتتار كەزى كەلگەندە ءۇي  السا، ءبىز دە الارمىز. سوندىقتان ءۇيىم جوق دەپ جوعارى جاقتا وتىرعان اعالارىمىزدىڭ كابينەتىن توزدىرىپ، ەشكىمنىڭ الدىندا ايتقان ەمەسپىن. ءارى رۋحاني جاعىنان الماتىنى ساعىنعانىم دا راس.
– استانادا جىلدان استام ۋاقىت تۇرىپ كەلدىڭىز عوي. وندا وزىڭىزگە تىرەك بولار رۋحاني، ادەبي ورتا تابا الدىڭىز با؟
– ادەبي ورتا بەلگىلى ءبىر توپتان عانا تۇرمايدى، ول ءار ادامنىڭ ءوز ىشىندە بولادى. ءبىر ويشىلدىڭ «تانىمال رومانداردىڭ الەمى – كەششەلەردىڭ جۇماعى» دەپ ايتاتىنى بار. اقىن ءوزىنىڭ رۋحىمەن، كىتاپحاناسىمەن جەكە قالعان كەزدە  ولىلەر الەمىنەن قۇرىلعان ادەبي ورتامەن قالادى. جانە ول ورتا اقىنعا تىرىلەردىڭ ورتاسىنان گورى كوپ پايدا بەرەدى دەپ ويلايمىن. مەن سول ءوزىمنىڭ ادەبي ورتامدا كوبىرەك بولدىم دەسەم بولادى. استانادا ولەڭنىڭ جاعدايىن جاسادىم. «جۇرەك ماۋسىمدارى» اتتى تولىق ءبىر كىتاپ جازىپ ءبىتىردىم. ەندى ول كىتاپتى باسپادان شىعارۋ عانا قالدى.
– دەگەنمەن دە استانادا شىعارماشىلىقتىڭ توڭىرەگىندە وي ءبولىسىپ، رۋحاني اڭگىمە ايتىپ كىمدەرمەن سىرلاسا الدىڭىز؟ قانشا دەگەنمەن استانادا زيالى قاۋىمنىڭ شوعىرى قالىپتاستى عوي قازىر...
– ۇلتتىق اكادەميالىق كىتاپحانانىڭ جانىنان اشىلعان «جانسۋسار» جاس قالامگەرلەر كلۋبى بار. سول كلۋبتىڭ توڭىرەگىندە امانگەلدى كەڭشىلىكۇلى باستاعان داۋرەن بەرىكقاجىۇلى، تاناكوز تولقىنقىزى، اقبەرەن ەلگەزەك، ەربول بەيىلحان، قالقامان سارين، داۋلەتكەرەي كاپۇلى، ازامات ەسالى، ۇلاربەك دالەي، ولجاس ساندىبەك، حاميت ەسامان، اسىلزات ارىستانبەك، سايان ەسجان، گۇلسارا شالقار سىندى شىعارماشىل جاستار مەن ادەبيەتسۇيەر ستۋدەنتتەر توپتاسقان. «جانسۋسار» ايىنا ءبىر رەت كىشىگىرىم كەڭەس اشىپ، ايماقتاعى اقىنداردىڭ شىعارماشىلىق كەشىن دە وتكىزىپ تۇراتىن. ءبىر سوزبەن ايتقاندا، استانا ماعان شىعارماشىلىق شابىت سىيلاي الدى. ەلوردانىڭ ءونبويىندا رۋحاني سەرگەكتىك، جاستىقتىڭ رۋحى تۇر. بۇل – قانداي جاس اقىنعا بولسىن ەرەكشە شابىت بەرەتىن مەتومورفوزا.
– ولەڭدەرىڭىزدە كۇزدى كوپ ءسوز ەتەسىز. سوعان قاراعاندا كۇزدە كوپ جازاسىز-اۋ...
– بۇرىن ءوزىمدى كۇزدىڭ اقىنىمىن دەپ ويلايتىنمىن. ويتكەنى ولەڭدەرىمنىڭ بارلىعىن دەرلىك كۇزدە جازاتىنمىن. بىراق بيىلعى جازدا ءبىر كىتاپ جازىپ شىقتىم. تۇسىنگەنىم مەن ولەڭدى جاز بەن كۇزدە جانە تۇندە جازادى ەكەنمىن. مەن العاشقى جيناعىمدى 16 جاسىمدا جارىققا شىعاردىم. اراعا ون ءبىر جىل سالىپ، ەكىنشى كىتابىم جارىق كوردى. قازىر ءۇشىنشى كىتابىمدى جازىپ قويدىم. ءبىر قاراعاندا ءۇش كىتاپ وتىزعا جەتپەگەن جان ءۇشىن مارقاياتىنداي-اق ەڭبەك. پەندەلىكپەن وسىعان ماستانسام دا بولار ەدى. بىراق اعىلشىننىڭ دجونن كيتس دەگەن اقىنى 21 جاسىندا-اق الەم اقىنى بولىپ، الەمدى مويىنداتقان ەكەن. ءبىزدىڭ ماعجان مەن تولەگەندەر 24 جاسىنا دەيىن قالىپتاسىپ، ءوزىن مويىنداتىپ ۇلگەردى. ورىستىڭ ەسەنينى مەن لەرمونتوۆى دا وتىزعا  جەتپەي-اق الەم اقىنى بولىپ قالىپتاستى. سولاردى ويلايمىن دا، ءوزىمدى وتە كەش قالعان اقىن سەزىنەمىن. ءبارىن ەرتەرەك جازۋىم كەرەك ەدى. ءدال قازىر مەنىڭ گۇل مەن كوبەلەكتى جىرلاپ جۇرەتىن كەزىم ەمەس ەدى. ونداي جاستا ەمەس ەدىم. الدەقايدا تەرەڭ، باسقا دۇنيەلەردى جازۋىم كەرەك سياقتى كورىنەدى دە تۇرادى. مەنىڭ ناعاشى جۇرتىم – كيەلى تاراز ءوڭىرى. بالالىق شاعىم سوندا ءوتتى. تاراز – ەكى مىڭ جىل بويى ءموۋلاۆي، ھافەز، ساعدي، رۋداكي سىندى شىعىس جۇلدىزدارىنا ارقاۋ بولعان قالا. رۋداكي: «ەۋ، جيھانكەز، ماساتتانبا، رۋم مەن تارازدىڭ اراسىن جاۋلاساڭ دا» – دەپ جازعان كەزىندە. ريم مەن تاراز زامانىندا  الەمدىك وركەنيەتتىڭ قوس نۇكتەسى بولعان. شىعىستىڭ تالاي اقىنى تارازدى جىرىنا قوسقان. مەن تاراز جايلى جازعان بۇكىل شىعىس اقىندارىنا جاۋاپ جازعىم كەلەدى. شىعىس اقىندارىنا جاۋاپ رەتىندە تارازدان ءبىر كىتاپ جازىلۋى ءتيىس سياقتى كورىنەدى دە تۇرادى ماعان. بۇلاي دەۋىمنىڭ سەبەبى دە بار، ۋنيۆەرسيتەتتە پارسى ءتىلىن وقىپ، شىعىس اقىندارىن تۇپنۇسقادان وقۋىما مۇمكىندىگىم بولدى. «تاراز ارۋلارى» اتتى تۇتاس ءبىر كىتاپ جازعىم كەلگەن. العاشقى ولەڭدەرى جازىلدى دا. بىراق ۋاقىت پەن ورىن مەنى باسقاعا جەتەلەدى. سوعان وكىنەمىن.
– پوەزياڭىزعا جالعىزدىقتى كوپ ارقاۋ ەتەسىز. «جالعىزدىقتىڭ جالعىز دوسىمىن» دەيسىز...
– مەندەگى جالعىزدىق – اقىننىڭ ىشكى الەمىنىڭ جالعىزدىعى، وقشاۋلىعى، بولەكتىگى. مەن اتادان جالعىزبىن، اكەسىز ءوستىم. ءارى مەنىڭ جىرلارىمداعى جالعىزدىق – تاۋەلسىزدىك العاننان كەيىنگى بارشا قازاقتىڭ وتكەن تاريحى مەن بولاشاعىنىڭ اراسىنداعى جالعىزدىعى. ول جالعىزدىقپەن مەن دە دەرتتەندىم. ونىڭ ۇستىنە ومىردە بارلىق نارسە جالعىز: كۇن دە، اي دا، جەر دە، ءتىپتى جاراتۋشىنىڭ ءوزى دە جالعىز. ءار ادام قايتالانباس الەم. اقىندار سونى كوبىرەك سەزىنەتىن شىعار، بالكىم.
– «باسقاشا بولعانمەن ولەڭدە،
باسقاشا بولا الماي ومىردە» – دەپ كەلەتىن جولدارىڭىز بار. ومىردە قاندايسىز سوندا؟
– قانداي ادامسىڭ دەپ مەنەن كىشكەنە كۇنىمدە سۇراعان بولساڭىز ايتار ما ەدىم. بۇگىندە ءوزىمنىڭ قانداي ادام ەكەنىمدى بىلمەيمىن. بالكي قالىپتاسۋ ۇستىندە شىعارمىن.  ومىردەگى ەرلاندى ءوزىم ونشا جاقسى كورمەيمىن. ەرلان ءجۇنىستىڭ ءوزىمنىڭ الدىمدا سۇيكىمى جوق. جاڭا زاماننىڭ ادامى بولعانىممەن مەن وتە كونسەرۆانت ەكەنمىن. ءبىر تۇسىنگەنىم ادام ۇيرەتىلەدى، بەيىمدەلەدى، جۇمسالادى ەكەن. وڭ سولىمدى تانىپ، ءوزىمدى ازامات رەتىندە سەزىنە باستاعان ۋاقىتتا ءوزىمنىڭ ادەبيەتتىڭ ادامى بولاتىنىمدى ءتۇسىندىم. جانە مۇنى ىشتەي ءوز-وزىمە قايتالاپ ايتقانىم دا ەسىمدە. بۇل – ماعان العاش ولەڭنىڭ قونعان ۋاقىتى بولۋى كەرەك. ويلاپ وتىرسام، باسقا تاڭداۋى بار ادام سىندى «ادەبيەتتىڭ ادامى بولامىن» دەپ ايتىپپىن. قازىر ويلاپ قاراسام، مەندە تاڭداۋ بولماعان ەكەن.
– ءبىر اقىندار قالامىنا سۇيەنىپ تۇرادى، ەندى بىرەۋلەرى قالامىن سۇيەپ تۇرادى دەيدى. ءسىز سونىڭ قايسىسىنا جاتاسىز؟
– ءوزىڭ تۋرالى ايتۋ  قيىن. قالامىما سۇيەپ تە، سۇيەنىپ تە تۇرعان جوقپىن. مۇمكىن، قالامنىڭ ىشىندە شىعارمىن، قايدان بىلەيىن... شىعارماشىلىق ادامى بارلىعىنان تاۋەلسىز، سويتە تۇرا بارلىعىنا تاۋەلدى. تاۋەلسىزدىك العاننان كەيىنگى قوعامدا تەگىن قىزمەت ەتىپ كەلە جاتقان كاسىپتىڭ يەسى ول – قالامگەرلەر. ولەڭدى ەشكىم كاسىپ ءۇشىن جازبايدى. جىر جازعانىڭ ءۇشىن ەشكىم اقشا تولەمەيدى، جازباساڭ تاعى بولمايدى، ولەڭ  – ءوزىڭنىڭ تابيعاتىڭ ويتكەنى. ولەڭىڭدى باسقالاي جازىپ، باسقالاي ءومىر سۇرە بەرەمىن دەۋگە تاعى كەلمەيدى. ەكىجۇزدى ەمەسسىڭ عوي. اۋىستىرىپ كيەتىن كيىمىڭ بولعانمەن، اۋىستىرىپ كيەتىن جانىڭ جوق. كەيدە باسقا ادام بولعىم كەلەدى شىنىن ايتقاندا...
– نەگە؟ اقىن بولعانىڭىزعا وكىنەسىز بە سوندا؟
– جوق، ول وكىنۋ نە اقىندىقتان جەرىنۋ دە ەمەس. بالكىم، وسىدان جيىرما جىل ەرتەرەك نە كەشىرەك تۋىلۋىم كەرەك پە ەدى؟!. ويتكەنى، ءولىارا كەزەڭگە تاپ كەلگەندەي، ارپالىسقان كەزەڭدەردى باسىمنان كوپ كەشەمىن. باسقا ۋاقىتتى، باسقا ورىندى، ءتىپتى باسقا تاعدىردى تاڭداعىم كەلىپ كەتەتىن كەزدەرىم دە بار.
– ءسىز مىنا ومىرمەن استاسا الماعانداي، اينالاڭىزداعىلار ءسىزدى تۇسىنە الماعانداي، شىعارماشىلىعىڭىزدى باعالاي الماعانداي، سوعان وكىنگەندەي سويلەپ وتىرسىز اڭعارعانىم... «باسقا ۋاقىتتا تۋىلۋىم كەرەك پە ەدى» دەپ قالدىڭىز. قازىر شىعارماشىلىق اتاۋلى ەكىنشى كەزەكتە قالىپ قويعان، نارىقتىڭ زامانى. ءسىز شىعارماشىلىق جوعارى باعالانعان، قالامگەر قاۋىمىنىڭ سىيلى بولىپ، حالىق قوشەمەتىنە بولەنگەن كەڭەستىك كەزەڭدى اڭساپ وتىرعان سياقتىسىز...
– اندرەي ۆوزنەسەنسكيدىڭ «گولوس تەريايۋ، تەپەر نە پرو ناس گوستەلەراديو» دەگەن ولەڭى بار ەدى، وسى ولەڭ ءبىر ءداۋىردىڭ ياعني كىتاپ ءداۋىرىنىڭ باسقا فازاعا ءوتۋىن انىق كورسەتەدى عوي دەيمىن. شوۋدىڭ ەمەس، ويدىڭ زامانىن كوبىرەك اڭسايتىن شىعارمىن...
– وندا قازىرگى ەرلان ءجۇنىس قانداي بولاتىن ەدى؟
– بىلمەيمىن، وتە قيىن سۇراق...  بىلەتىنىم – اقىندار كىنالى بولىپ تۋىلادى. بىرەۋدىڭ جاساعان قىلمىسى ءۇشىن، ساتقىندىعى، وپاسىزدىعى، الەمدەگى وسپادارلىعى ءۇشىن بارىنە كىنالى. قازاقستاننىڭ باتىسىندا ءبىر بالا جىلاپ جاتسا، شىعىستاعى ءبىر اقىن شاتتىقتىڭ جىرىن جازا المايدى. مەن ءوزىمدى كوشەدە قايىر سۇراپ جۇرگەن ادام ءۇشىن، بازاردا اربا سۇيرەپ جۇرگەن قازاق ءۇشىن كىنالى سانايمىن. كوپتەگەن اقىنداردىڭ باسپا بەتىن كورگەن، گازەت بەتىنە شىققان ولەڭدەرىن ەمەس، تارتپادا جاتقان ولەڭدەرىن وقىساڭىز، اقىن جانىن تەرەڭىرەك تۇسىنەر ەدىڭىز دەپ ويلايمىن.
– ءبىراز بۇرىن جارىققا شىققان «كيەلى تۇندەردىڭ دۇعاسى» اتتى جيناعىڭىزدى وقىپ شىققان ەدىم. بىراق قانشا وقىسام دا «دۋالوگتار» بولىمىندەگى ولەڭدەرىڭىزدى تۇسىنە المادىم. بۇل ءسىزدىڭ ەكسپەريمەنتكە بارعاندىڭىز شىعار، بىراق بۇل ولەڭدەرىڭىزدە ويلارىڭىز بولعانىمەن، سەزىم مەن سۋرەت جوق سىندى كورىندى ماعان... اسىرەسە «رومبتارىڭىزدى» قايتالاپ قانشا وقىسام دا، تۇسىنە المادىم، سەزىنە المادىم...
– شابىت جانە شالىق دەگەن نارسە بولادى. ادامعا بىردە پەرىشتە سىبىرلايدى، بىردە جىن سىبىرلايدى دەيدى عوي. پەرىشتە سىبىرلاعاندا شابىت كەلەدى، اقتارىلىپ ولەڭ جازاسىڭ. ال شالىق – اقىننىڭ ىشكى كۇيزەلىستەرمەن نە ءولى ەمەس، نە ءتىرى ەمەس كەيىپتە جۇرگەن كەزى. مەنىڭ تۇسىنىگىمدە ءاربىر ادام – ماڭگىلىكتى ىزدەۋشى. سول جولدا بەلگىلى ءبىر اقيقاتتى، ءوز قوعامىن، زامانىن، جاراتۋشىسىن، ءتۇپتىڭ تۇبىندە ءوزىن ىزدەيدى. «دۋالوگتاردا» ايتقىم كەلگەنى دە وسى، ياعني ءوزىمدى ىزدەۋ. و باستا «بوزبالا» اتتى پوەما جازباقشى بولعام. ءسىز ايتىپ وتىرعان «تۇسىنىكسىز» ولەڭدەر سول پوەماداعى ديالوگتار بولاتىن. پوەما جازباسام دا، ول ديالوگتاردى كىتابىما «دۋالوگتار» دەپ كىرگىزدىم.
– ءسىزدىڭ سىرشىل ليريكاڭىز بار. ول ليريكا فيلوسوفيامەن استاسىپ، فيلوسوفيالىق ليريكاعا اينالدى. سىزگە ەكسپەريمەنت نە ءۇشىن قاجەت بولدى؟ بۇلاي سۇراپ وتىرعانىم، وسى ۋاقىتقا دەيىن جازعان ولەڭدەرىڭىزگە ەكسپەريمەنتتىك دۇنيەلەرىڭىز كولەڭكەسىن ءتۇسىرىپ، جولىن تۇسايدى، سول ارقىلى پوەزياڭىزداعى تەرەڭدىك تۇسىنىكسىزدىككە، كۇڭگىرتتىككە ۇلاسىپ كەتەدى دەپ  قورىقپايسىز با؟
– كۇڭگىرتتىك دەگەن «كلەيمونى» امانحان ءالىمۇلى اعام تاڭىپ بەردى-اۋ دەيمىن ماعان. امانحان اعامدى وتە جاقسى كورەمىن، سىيلايمىن، بىراق رەنجىمەسىن مەنىڭ پوەزيام جايلى ول كىسىنىڭ پىكىرى جوپەلدەمەدە ايتا سالعان وي مەنىڭشە. اعام مەنىڭ ولەڭدەرىمدى تۇتاستاي قاراپ شىققان، پوەزياممەن تولىقتاي تانىس دەپ ويلامايمىن. بەس-التى ولەڭىمدى قارادى دا، پوەزيامدى كۇڭگىرت دەي سالدى. بىراق، شىعارماشىلىعىم جايلى مۇنداي جانىما باتار، قاجىتار  ءسوزدى ءوز زامانداستارىم ايتسا، ول ماعان اۋىر تيەر ەدى. ال  اعامنىڭ ايتقانىن جاناشىرلىق دەپ قابىلدادىم. ءارى اعامنىڭ زامانى باسقا، مەنىڭ زامانىم باسقا عوي. مەن تۇسىنىكسىزدىككە، كۇڭگىرتتىككە ۇرىنامىن دەپ قورىقپايمىن. ەكسپەريمەنتكە بارعان مەن ەمەس، مەنىڭ قوعامىم. ەكسپەريمەنتكە جەتەلەگەن – XXI عاسىرداعى الەم، ول ءبارىن جاڭادان باستاعىسى كەلەدى. ءتىپتى تاۋەلسىزدىك العان جيىرما جىلدىڭ ىشىندە ءبىزدىڭ قوعام تەك قانا ەكسپەريمەنتپەن كەلە جاتىر. قازاق بۇرىندارى كەشپەگەن سەزىمدەر مەن ويلاردى، كۇردەلى قۇرىلىمداردى وسى جيىرما جىل ىشىندە باسىنان كەشىردى. تانىم تۇسىنىگى وزگەردى، ءتىپتى قوعامدىق-الەۋمەتتىك، باسقا دا سەكتورلاردىڭ بارىندە جاڭا كەزەڭدەر اشىلدى. مۇنىڭ بارلىعى سول قوعامدا ءومىر ءسۇرىپ جاتقان مەنىڭ جانىما اسەر ەتپەۋى مۇمكىن ەمەس ەدى. بۇل قوعامنان بولەكتەنىپ، ءتورت قابىرعاعا قامالىپ، XIX عاسىرداعى ەسكى اقىندارشا جىرلاسام، ماعان جاراسپاس تا ەدى. ءاربىر ەكسپەريمەنت ءوزىڭدى ىزدەۋ عانا ەمەس، ءوز زامانداسىڭدى ىزدەۋ. ادەبيەتتە ەكسپەريمەنتتەر مەن رەفورمالار بولماسا تاعى بولمايدى. مەن ءوز ەكسپەريمەنتتەرىمنىڭ قۇربانىنا اينالۋىم مۇمكىن، ودان مەن ۇتىلعانمەن، مەنىڭ زامانداستارىم ۇتىلمايدى.
– ءوز ەكسپەريمەنتىڭىزدى ءساتتى دەي الاسىز با ءوزىڭىز؟
– ءساتتى نە ءساتسىز دەپ ايتپاي-اق قويايىن، ءبىر ايتارىم – قازاق ادەبيەتىنە  كەرەگى جاڭا فورما ەمەس، جاڭا مازمۇن.
– كوپ وقيتىنىڭىز، كوپ بىلەتىنىڭىز ولەڭدەرىڭىزدەن بايقالىپ تۇرادى. پوەزياڭىزدا تەرەڭدىك بار. ادەبيەتتەگى اعالارىڭىزدىڭ دا ءسىزدى ءبىلىمدى، تەرەڭ دەپ ايتىپ جۇرگەنىن تالاي ەستىدىك. وسى ۋاقىتقا دەيىن كىمدەردىڭ ەڭبەكتەرىن وقىپ تاۋىستىڭىز؟ كىمدەردى وقىعانىڭىزدى ماقتانىپ ايتا الاسىز؟
– مەنىڭ زامانداستارىم نە وقىسا مەن سونى وقىدىم. ادەبيەتشى بولامىن دەگەن ادام وقۋعا مىندەتتى ۇزىن-ىرعاسى ءۇش  جۇزگە جۋىق كىتاپ بار. سول ءۇش ءجۇز كىتاپتىڭ ارى كەتسە، وتىزىن وقىعان شىعارمىن. ءوزىمدى ءبىلىمدى سانامايمىن.
– «پوەزيادا گەنەرال جوق» – دەيمىز. ايتكەنمەن دە ءوز بۋىنىڭىزدىڭ، قازىرگى جاس اقىنداردىڭ اراسىندا گەنەرال بولۋعا لايىقتىسى قايسى دەسە، كىمدى اتار ەدىڭىز؟
– مەن  كىم مىقتى، كىم گەنەرال دەگەن توڭىرەكتە ويلانعان ەمەسپىن. ەرتە مويىندالۋ، ەرتە تانىلۋ دەگەندەر مىقتىلىقتى تانىتپايدى. ءدال قازىر پالەن مىقتى دەپ ءوز قاتارىمداعى ءبىر اقىندى اتاسام، ءبىزدىڭ تولقىننىڭ تاعى ءبىرى ءدال وسى ۋاقىتتا ۇلى شىعارما تۋدىرىپ، سونىڭ سوڭعى نۇكتەسىن قويىپ جاتۋى مۇمكىن. ادەبيەتتە ەشكىم ءبىرىنشى  ەمەس، ونىڭ سەبەبى: ءبارى – ءبىرىنشى.
– «ەڭ قاتىگەز ۇستازى جاس اقىننىڭ – جاس سۇلۋدىڭ جۇرەگى لۇپىلدەگەن» دەيسىز. قىزدارعا ءجيى عاشىق بولاسىز با؟
– ءيا، بىراق سۇلۋعا ەمەس، سۇلۋلىققا.

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2253
عيبىرات

قايسار رۋحتى عازيز جان

مۇحتار قۇل-مۇحاممەد 3516