تجم: ءيليننىڭ ورنىنا ءشارىپحانوۆ تاعايىندالدى
بۇگىن قازاقستان پرەزيدەنتىنىڭ جارلىعىمەن قازاقستاننىڭ توتەنشە جاعدايلار مينيسترلىگىن 2020 جىلدان بەرى باسقىرىپ كەلگەن يۋري يلين قىزمەتىنەن الىنعان ەدى.
يۋري يلين رەسەيدىڭ كۋيبىشەۆ قالاسىندا دۇنيەگە كەلگەن. ول الماتى قالالىق توتەنشە جاعدايلار باسقارماسىندا 1996 جىلدان باستاپ قىزمەت ەتتى. 1998 جىلدان باستاپ قالالىق تجد-دا باسشىلىق قىزمەتتەردە بولدى. 2013 جىلى قالا اكىمىنىڭ ورىنباسارى بولدى. ال 2015 جىلى ونىڭ لاۋازىمى بىردەن ءوسىپ، قر پرەزيدەنت اكىمشىلىگىنە باردى. 2016 جىلى قر ءىىم ورىنباسارى بولىپ ءجۇرىپ، 2020 جىلى قايتا قۇرىلعان تجم-نى تىزگىندەگەن.
ونىڭ مينيسترلىگى تۇسىندا قازاقستان تاريحىنداعى ەكى الاپات ءىرى ءورت ورىن الدى. ءبىرى – بىلتىر قوستاناي وبلىسىنداعى ءورت بولسا، ەكىنشىسى – قازىر ءالى تولىق اۋىزدىقتالماعان اباي وبلىسىنداعى ورمان ءورتى.
بۇگىن قىزمەتىنەن الىنعان يۋري ءيليننىڭ ورنىنا سىرىم دۇيسەنعازىۇلى ءشارىپحانوۆ قر توتەنشە جاعدايلار ءمينيسترى بولىپ تاعايىندالدى. بۇل تۋرالى قر پرەزيدەنتىنىڭ جارلىعى جاريا بولدى.
«مەملەكەت باسشىسىنىڭ جارلىعىمەن سىرىم دۇيسەنعازىۇلى ءشارىپحانوۆ قازاقستان رەسپۋبليكاسىنىڭ توتەنشە جاعدايلار ءمينيسترى لاۋازىمىنا تاعايىندالدى»، - دەپ جازىلعان جارلىقتا.
سىرىم ءشارىپحانوۆ توتەنشە جاعدايلار ءمينيسترى بولىپ تاعايىندالدى. ول 1967 جىلى 1 مامىردا الماتى قالاسىندا دۇنيەگە كەلگەن.
*1991 جىلى قازان قالاسىنداعى م.چيستياكوۆ اتىنداعى زىمىران اسكەرلەرىنىڭ جوعارى اسكەري كوماندالىق-ينجەنەرلىك ۋچيليششەسىن ءتامامدادى. تەحنيكا عىلىمدارىنىڭ دوكتورى، گەنەرال-مايور. *1997 جىلعى ماۋسىمنان 1999 جىلعى اقپانعا دەيىن – جامبىل وبلىستىق توتەنشە جاعدايلار باسقارماسىنىڭ دايىندىق جانە وقىتۋ ورتالىعىنىڭ باستىعى.
*2008 جىلعى قىركۇيەكتەن 2010 جىلعى اقپانعا دەيىن – الماتى قالاسى توتەنشە جاعدايلار دەپارتامەنتى ازاماتتىق قورعانىس باسقارماسىنىڭ باستىعى.
*2014 جىلعى قازاننان 2020 جىلعى قاراشاعا دەيىن – قازاقستان رەسپۋبليكاسى ىشكى ىستەر مينيسترلىگى توتەنشە جاعدايلار كوميتەتىنە قاراستى كوكشەتاۋ تەحنيكالىق ينستيتۋتىنىڭ باستىعى.
*2021 جىلدىڭ 3 قىركۇيەگىنەن بۇگىنگە دەيىن – قازاقستان رەسپۋبليكاسى توتەنشە جاعدايلار مينيسترلىگىنە قاراستى مالىك عابدۋللين اتىنداعى ازاماتتىق قورعاۋ اكادەمياسىنىڭ باستىعى قىزمەتىن اتقاردى.
Abai.kz
