جۇما, 29 ناۋرىز 2024
اۋىس-ءتۇيىس 2372 9 پىكىر 8 ماۋسىم, 2023 ساعات 12:08

كولگىنوۆ ەندى نەمەن اينالىسپاق؟..

سۋرەت: ۆلاديسلاۆ ۆودنەۆ

مەملەكەت باسشىسىنىڭ جارلىعىمەن التاي كولگىنوۆ پرەمەر-ءمينيستردىڭ ورىنباسارى قىزمەتىنەن بوساتىلدى. ونىڭ ورنىنا ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا باردى. كولگىنوۆتىڭ ساياسي مانسابى قالاي جالعاساتىنى ازىرگە بەلگىسىز. ونىڭ جەكە كاسىپكەرلىككە بەت بۇراتىنى تۋرالى دا ايتىلادى، دەگەنمەن ناقتى اقپارات جوق. بۇل تۋرالى پوليتپروسۆەت.kz تەلەگرام ارناسى جازادى.

45 جاستاعى التاي كولگىنوۆ قوجا احمەت  ياسساۋي اتىنداعى حالىقارالىق قازاق-تۇرىك ۋنيۆەرسيتەتىندە جانە قر پرەزيدەنتى جانىنداعى مەملەكەتتىك باسقارۋ اكادەمياسىندا وقىعان.  ول سونداي-اق «بولاشاق» باعدارلاماسى بويىنشا ءبىلىم الىپ، ابەردين بريتان ۋنيۆەرسيتەتىندە قۇقىق ماگيسترى دارەجەسىن الىپ شىقتى.

ول ەڭبەك جولىن باس پروكۋراتۋرا جانىنداعى قۇقىقتىق ستاتيستيكا جانە اقپارات ورتالىعىندا باستاعان، كەيىن باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ كوميتەتىنىڭ قۇقىقتىق ستاتيستيكانى قالىپتاستىرۋ باسقارماسىنىڭ پروكۋرورى بولدى.

2003-2007 جىلدارى استانا قالاسى بويىنشا مەملەكەتتىك قىزمەت ىستەرى اگەنتتىگى باسقارما باسشىسىنىڭ ورىنباسارى، ءبىر جىلعا جۋىق ادىلەت مينيسترلىگىنىڭ زاڭعا تاۋەلدى اكتىلەردى تالداۋ جانە ازىرلەۋ باسقارماسىنىڭ باستىعى بولدى. 2008 جىلى «الاش مەديا گرۋپپ» جشس جەكە كومپانياسى باس ديرەكتوردىڭ قۇقىقتىق ماسەلەلەر جونىندەگى ورىنباسارى بولىپ قىزمەت اتقارعان.

2010 جىلى مەملەكەتتىك قىزمەتكە ورالىپ، پرەزيدەنت اكىمشىلىگىنىڭ مەملەكەتتىك باقىلاۋ جانە اۋماقتىق – ۇيىمداستىرۋ جۇمىس ءبولىمىنىڭ مەملەكەتتىك ينسپەكتورى لاۋازىمىن اتقاردى. ودان كەيىن باتىس قازاقستان وبلىسى اكىمىنىڭ ورىنباسارى، ورال قالاسىنىڭ اكىمى، باتىس قازاقستان وبلىسىنىڭ اكىمى جانە استانا قالاسىنىڭ اكىمى بولدى.

2022 جىلدىڭ قىركۇيەگىندە التاي كولگىنوۆ پرەمەر-ءمينيستردىڭ ورىنباسارى بولىپ تاعايىندالدى.

ءبىر قىزىعى كولگىنوۆ ەكى كۇن بۇرىن ەلوردا اكىمى بولعان كەزىندەگى قۇرىلىسقا قاتىستى ايىپتاۋلارعا جاۋاپ بەرىپ، وتكەندى ەسىنە العان بولاتىن.

«ەلوردا ەكونوميكاسىنىڭ نەگىزگى درايۆەرى - قۇرىلىس، سونىمەن قاتار شاعىن جانە ورتا بيزنەس سالاسى. سوندىقتان مەملەكەتتىك ورگانداردىڭ الدىندا ەڭ اۋەلى ينۆەستيتسيا تارتۋ مىندەتى تۇر. استانالىقتاردى تۇرعىن ۇيمەن قامتۋ دا ماڭىزدى. تەك 2021 جىلدىڭ وزىندە وتباسى بانكى ارقىلى كەزەكتە تۇرعاندار مەن سالىمشىلارعا 10 مىڭ پاتەر بەرىلدى. ونىڭ 7 مىڭى - كەزەكتە تۇرعاندارعا. ەگەر سىزدەردە قۇرىلىس، تۇرعىن ءۇي سالۋ بويىنشا ناقتى فاكتىلەر بولسا، تىڭداۋعا دايىنبىز. فاكتىلەر بۇرمالانباي، ناقتى جوبا بويىنشا كەلتىرىلگەنى ءجون. جالپى قۇرىلىسقا قاتىستى سۇراقتار بويىنشا قالا اكىمدىگىنە حابارلاسىڭىز. مەن وتكەن جىلدان بەرى ەلوردا اكىمى ەمەسپىن»، - دەدى التاي كولگىنوۆ.

سونىمەن قاتار جۋرناليستەر ەلوردا تۇرعىندارىنىڭ ء“سىزدى كولگىنوۆ – 20 پايىز" دەپ اتايتىنىن بىلەسىز بە؟”، دەگەن سۇراق قويدى.

كولگىنوۆ قالا تۇرعىندارىنىڭ سىنىنا اشۋلانىپ، اكىم كەزىندە جۇمىسىن ادال اتقارعانىن، ال ايتىلىپ جۇرگەن اڭگىمەلەردىڭ تاپسىرىسپەن ورىندالىپ جاتقانىن جەتكىزدى.

«ارتىق اڭگىمە كەرەك ەمەس. ول ءۇشىن جاۋاپ بەرەسىز. بۇل مەملەكەتتىك قىزمەتكەردى كوپشىلىك الدىندا ايىپتاۋ بولىپ سانالادى. وندايمەن اينالىسۋدىڭ قاجەتى جوق، ول ءۇشىن جاۋاپكەرشىلىك قاراستىرىلعان. مەملەكەتتىك قىزمەتكەرگە قارسى ونداي شابۋىلدار بولىپ تۇرادى، ول تاپسىرىسپەن جاسالادى. ەلوردا اكىمى بولعاندا ءوز مىندەتىمدى ءتيىستى دەڭگەيدە اتقاردىم. ءوز جۇمىسىمنان قىسىلمايمىن»، - دەدى ەكس-اكىم.

Abai.kz

9 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1567
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2261
عيبىرات

قايسار رۋحتى عازيز جان

مۇحتار قۇل-مۇحاممەد 3552