جۇما, 29 ناۋرىز 2024
1565 6 پىكىر 31 مامىر, 2023 ساعات 13:27

ۋكراينا سوتى "ۆاگنەرلىك" قازاقتى سوتتادى

ۋكراينا سوتى قازاقستاننىڭ 23 جاستاعى ازاماتى شىڭعىس سەيپيەۆتى اسكەرگە جالدانۋ قىلمىسىنا قاتىستى ءىس بويىنشا توعىز جىلعا سوتتادى. بۇل تۋرالى "گراتي" ۋكراين باسىلىمى سوت ۇكىمىنە سۇيەنە وتىرىپ حابارلادى.

ءىس ماتەريالدارىنا سايكەس، 2022 جىلعى قازاندا سەيپيەۆتى "ۆاگنەر" جەكەمەنشىك اسكەري كومپانياسى ۋكرايناعا قارسى سوعىسۋعا كوندىرگەن. 18 قاراشادا ونى ۇشاقپەن تۇمەننەن روستوۆ وبلىسىنا جەتكىزگەن. سول جەردە ول كەلىسىم-شارتقا قول قويعان. اسكەري كومپانيا وعان اي سايىن 200 مىڭ رۋبل تولەۋگە ۋادە بەرگەن. سەيپيەۆ اقشانى كەلىسىم-شارت مەرزىمى اياقتالعان سوڭ الۋى ءتيىس بولعان.

جەلتوقساننىڭ باسىنا دەيىن سەيپيەۆ اسكەري دايىندىقتان وتكەن، ودان سوڭ لۋگانسك وبلىسىنىڭ كرەمەننايا قالاسىنا بارعان. 24 جەلتوقساندا ونى دونەتسك وبلىسى باحمۋت اۋدانىنىڭ ياكوۆلەۆكا اۋىلىنا جىبەرگەن. سول جەردە ول ءبىر اپتا سوعىسقان، ال 30 جەلتوقساندا تۇتقىنعا تۇسكەن.

تەرگەۋدى ۋكراينا قاۋىپسىزدىك قىزمەتى جۇرگىزگەن. تەرگەۋ نۇسقاسىنا قاراعاندا، سەيپيەۆتى № 2 تۇمەن كولونياسىندا سوعىسقا بارۋعا ۇگىتتەگەن. بۇل ۋاقىتتا ول كىسى زورلاۋ قىلمىسى ءۇشىن 10 جىلدىق جازانى وتەپ جۇرگەن. "ۆاگنەر" جەكەمەنشىك اسكەري كومپانياسىمەن جاسالعان كەلىسىم-شارتتا سىياقى تولەۋ عانا ەمەس، قىلمىستىق جازادان بوساتۋ تۋرالى دا ايتىلعان.

"ۆاگنەر" اسكەري كومپانياسى 2022 جىلعى جازدان بەرى كولونيادا جازاسىن وتەۋشىلەردى سوعىسقا ۇگىتتەۋمەن اينالىسىپ كەلگەن. كومپانيانىڭ نەگىزىن قالاعان ەۆگەني پريگوجين كولونيالاردى ءوزى ارالاپ، اسا اۋىر قىلمىس جاساعانداردى ۋكرايناعا قارسى سوعىسۋعا كوندىرگەن. الايدا 2023 جىلعى اقپاندا پريگوجين سوتتالعانداردى ۇگىتتەۋ توقتادى دەپ مالىمدەگەن.

قاڭتاردىڭ باسىندا پريگوجين ءبىرىنشى توپ راقىمشىلىققا ىلىنگەنىن حابارلاعان. "اگەنستۆو" باسىلىمى مەن BBC ورىس قىزمەتىنىڭ جۋرناليستەرى راقىمشىلىق العاندار اراسىندا ۇرلىق-قارلىق، ەسىرتكى ساۋداسى، كىسى ءولتىرۋ قىلمىستارى ءۇشىن سوتتالعاندار بار ەكەنىن انىقتاعان.

مامىردا "ۆاگنەر" جەكەمەنشىك اسكەري كومپانياسى ۋكرايناداعى سوعىستا 20 مىڭ جالدامالى جاۋىنگەر وپات بولعانىن، ولاردىڭ جارتىسى سوتتالعاندار ەكەنىن مالىمدەگەن.

Abai.kz

6 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2257
عيبىرات

قايسار رۋحتى عازيز جان

مۇحتار قۇل-مۇحاممەد 3536