جۇما, 29 ناۋرىز 2024
1613 5 پىكىر 31 مامىر, 2023 ساعات 13:08

ەكس-پرەزيدەنتكە ءتىل تيگىزۋگە بولا ما؟

قىلمىستىق كودەكستەن نۇرسۇلتان نازارباەۆقا ءتىل تيگىزگەنى ءۇشىن جازاعا تارتاتىن 373 جانە 374-باپتار الىنىپ تاستالۋى مۇمكىن، دەپ جازادى قازاقپارات. 

پارلامەنت دەپۋتاتتارىنىڭ باستاماسىمەن ازىرلەنگەن قۇجاتتىڭ جوباسى ءماجىلىستىڭ رەسمي سايتىندا 23 مامىردان بەرى تۇر.

قۇجاتتىڭ تولىق اتاۋى – «قازاقستان رەسپۋبليكاسىنىڭ كەيبىر زاڭنامالىق اكتىلەرىنە زاڭسىز ساتىپ الىنعان اكتيۆتەردى مەملەكەتكە قايتارۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى.

ءماجىلىس سايتىنداعى سالىستىرمالى كەستەدە قىلمىستىق كودەكستەن تۇڭعىش پرەزيدەنتتى كوپشىلىك الدىندا قورلاۋ جانە ونىڭ ابىرويى مەن قادىر-قاسيەتىنە نۇقسان كەلتىرۋ (سونداي-اق ونىڭ سۋرەتىن ءبۇلدىرۋ، ونىڭ زاڭدى قىزمەتىنە كەدەرگى جاساۋ), تۇڭعىش پرەزيدەنتكە قول سۇقپاۋشىلىق كەپىلدىگىن جويۋ ءۇشىن قىلمىستىق جاۋاپكەرشىلىكتى كوزدەيتىن 373 جانە 374-باپتاردى الىپ تاستاۋ ۇسىنىلعانىن كورۋگە بولادى.

قازىرگى ۋاقىتتا زاڭ جوباسى قر پارلامەنتى ماجىلىسىندە قارالۋدا.

ادىلەت مينيسترلىگىندەگىلەر زاڭناماعا وسىنداي وزگەرىس ەنگىزۋ ۇسىنىلىپ، ءماجىلىس قاراۋىندا جاتقانىن راستادى.

«زاڭ جوباسى شەڭبەرىندە قىلمىستىق كودەكستەن تۇڭعىش پرەزيدەنتتى كوپشىلىك الدىندا قورلاۋ جانە ونىڭ ابىرويى مەن قادىر-قاسيەتىنە نۇقسان كەلتىرۋ (سونداي-اق ونىڭ سۋرەتىن ءبۇلدىرۋ، ونىڭ زاڭدى قىزمەتىنە كەدەرگى جاساۋ), تۇڭعىش پرەزيدەنتكە قول سۇقپاۋشىلىق كەپىلدىگىن جويۋ ءۇشىن قىلمىستىق جاۋاپكەرشىلىكتى كوزدەيتىن 373 جانە 374-باپتاردى الىپ تاستاۋ جوسپارلانۋدا.

قازىرگى ۋاقىتتا زاڭ جوباسى قر پارلامەنتى ماجىلىسىندە قارالۋدا»، - دەپ جازىلعان مينيسترلىكتىڭ ءباسپاسوز قىزمەتى ۇسىنعان مالىمەتتە.

ايتا كەتەيىك، قىلمىستىق كودەكستىڭ قولدانىستاعى رەداكتسياسىنىڭ 373-بابىندا «قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ ار-نامىسى مەن قادىر-قاسيەتىنە جاريا تۇردە قورلاۋ جانە وزگە دە قول سۇعۋ، قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ بەينەلەرىن قورلاۋ، قازاقستان رەسپۋبليكاسىنىڭ تۇڭعىش پرەزيدەنتى-ەلباسىنىڭ زاڭدى قىزمەتىنە كەدەرگى جاساۋ» ارەكەتتەرى ءۇشىن ەكى مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا نە سول مولشەردە تۇزەۋ جۇمىستارىنا نە ەكى جىلعا دەيىنگى مەرزىمگە باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋ جازاسى كوزدەلگەن.

ال بۇل ارەكەتتەر بۇقارالىق اقپارات قۇرالدارىن نەمەسە تەلەكوممۋنيكاتسيا جەلىلەرىن پايدالانۋ ارقىلى جاسالعان بولسا، ءۇش مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا نە سول مولشەردە تۇزەۋ جۇمىستارىنا نە ءۇش جىلعا دەيىنگى مەرزىمگە باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋ جازاسى كەسىلەدى.

سونداي-اق، نۇرسۇلتان نازارباەۆتىڭ ءوزى مەن ونىمەن بىرگە تۇراتىن وتباسى مۇشەلەرىنە ونىڭ زاڭدى قىزمەتىنە كەدەرگى جاساۋ ماقساتىندا قانداي دا ءبىر نىساندا ىقپال ەتۋ ارەكەتى بەس مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا نە سول مولشەردە تۇزەۋ جۇمىستارىنا نە بەس جىلعا دەيىنگى مەرزىمگە باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋ جازاسىنا اكەپ سوقتىرادى.

ال 374-باپ بويىنشا نۇرسۇلتان نازارباەۆتىڭ جانە ونىمەن بىرگە تۇراتىن وتباسى مۇشەلەرىنىڭ مۇلكىنە، تۇرعىن جانە قىزمەتتىك ءۇي-جايلارىنا، جەكە جانە قىزمەتتىك كولىك قۇرالدارىنا قول سۇعىلماۋشىلىق كەپىلدىكتەرىن بۇزۋ، حات جازىسۋدىڭ، ولار پايدالاناتىن بايلانىس قۇرالدارىنىڭ، بانك قۇپياسىنىڭ جانە بانك شوتتارىنا قول سۇعىلماۋشىلىق كەپىلدىكتەرىن بۇزۋ ارەكەتتەرى بەس مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا نە سول مولشەردە تۇزەۋ جۇمىستارىنا نە بەس جىلعا دەيىنگى مەرزىمگە باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋ جازاسىنا اكەپ سوقتىرادى.

 

Abai.kz

5 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1567
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2261
عيبىرات

قايسار رۋحتى عازيز جان

مۇحتار قۇل-مۇحاممەد 3551