ەكس-مينيستر سوت ۇكىمىنە قاتىستى حالىقارالىق سوتقا جۇگىنەتىنىن ايتتى. جوعارعى سوت بۇرىنعى دەنساۋلىق ساقتاۋ ءمينيسترى ەلجان ءبىرتانوۆتىڭ شاعىمىن قاراۋدان باس تارتتى. بۇل تۋرالى Halyq Uni تىلشىسىنە ەكس-مينيستر مالىمدەدى.

بۇعان دەيىن ەلجان ءبىرتانوۆ سوت ۇكىمىنە بايلانىستى جوعارعى سوتقا شاعىم تۇسىردى.

- وكىنىشكە قاراي جوعارعى سوتقا ناۋرىزدا جىبەرگەن ارىزىمىز 5 مامىردا قارالدى، بىراق قابىلدانعان جوق. ارىزدى الدىن الا تىڭداۋ كەزىندە ءۇش سۋديا قاراستىردى. ەشقانداي نەگىز جوق، قاراۋعا جاتپايدى دەپ قايتارىپ بەردى. ءوزىمىز دە تۇسىنبەي قالدىق. زاڭسىزدىق جالعاسىپ جاتىر، - دەدى بۇرىنعى دەنساۋلىق ساقتاۋ ءمينيسترى ەلجان ءبىرتانوۆ.

ەلجان ءبىرتانوۆ ەندى سوت ۇكىمىنە قاتىستى حالىقارالىق سوتقا جۇگىنەتىنىن ايتتى.

- ءارى قاراي نە ىستەيتىنىمىزدى اقىلداسىپ جاتىرمىز. حالىقارالىق سوتقا دايىندالىپ جاتىرمىز. كونستيتۋتسيالىق سوتقا، جوعارعى سوتقا دا قوسىمشا تاعى دا بارامىز دەپ جوسپارلاپ وتىرمىز، - دەدى ەلجان ءبىرتانوۆ.

ايتا كەتەيىك، 2022 جىلدىڭ 28 قازانىندا سوت شەشىمىمەن ەلجان ءبىرتانوۆ 5 جىلعا، ولجاس ابىشەۆ 4 جىلعا باس بوستاندىعىنان شەكتەۋ جازاسىنا كەسىلدى. ەكەۋى دە ءومىر بويىنا مەملەكەتتىك قىزمەتتە جۇمىس ىستەۋ قۇقىعىنان ايىرىلدى.

دەنساۋلىق ساقتاۋ مينيسترلىگى بۇرىنعى ءمينيستردى «پاتسيەنتتەر، ءدارى-دارمەكتەر جانە مەديتسينالىق بۇيىمدار تۋرالى بارلىق دەرەكتى بىرىكتىرۋگە ءتيىس بولعان جۇمىس ىستەمەيتىن اقپاراتتىق پلاتفورمانى قابىلداپ، پايدالانۋعا بەرگەن» دەپ ايىپتاپ، 1,5 ملرد تەڭگە شىعىن كەلتىردى دەپ سوتقا تالاپ ارىز بەرگەن.

سوت ونى ءىشىنارا قاناعاتتاندىرىپ، 1,3 ملرد تەڭگەنى مەملەكەتكە قايتارۋدى مىندەتتەدى.

2022 جىلدىڭ 9 قاراشاسىندا ەكس-مينيستر ەلجان ءبىرتانوۆتىڭ ادۆوكاتتارى سوتقا اپەللياتسيالىق شاعىم ءتۇسىردى.

2023 جىلدىڭ 10 اقپانىندا استانا سوتىنىڭ اپەللياتسيالىق القاسى ەكس-مينيستر ەلجان ءبىرتانوۆ پەن ونىڭ ورىنباسارى بولعان ولجاس ابىشەۆتىڭ ءىسىن قايتا قاراپ، ءبىرىنشى ينستانتسيانىڭ سۋدياسى يبراگيم الكەنوۆ شىعارعان ۇكىمدى وزگەرىسسىز قالدىردى.

Abai.kz