11 جىل قاماۋدا وتىرىپ، وسىدان ءۇش جىل بۇرىن شارتپەن بوساعان جاكىشەۆ بۇگىن فەيسبۋك پاراقشاسىنا "باس بوستاندىعىمنان ايىرىلۋ مەرزىمىم اياقتالدى. مەن بوسپىن!" دەپ جازدى.
ونىڭ قاماق مەرزىمى 2009 جىلى 21 مامىردا قاماۋعا الىنعان كۇنىنەن باستالعان.
مۇحتار جاكىشەۆ 2020 جىلى 19 ناۋرىزدا مەرزىمىنەن بۇرىن بوساپ شىققان. 2009 جىلى "جەمقورلىق جاسادى" دەگەن ايىپپەن جابىق سوتتا 14 جىلعا سوتتالعان. جاكىشەۆ تاعىلعان ايىپتى تەرىسكە شىعارعان.
قۇقىق قورعاۋشىلار مەن جاكىشەۆتىڭ جاقتاستارى تاعىلعان ايىپتىڭ ساياسي استارى بار ەكەنىن بىرنەشە رەت مالىمدەگەن. قازاقستان قۇقىق قورعاۋشىلارى ونى ساياساتپەن اينالىسپاسا دا ساياسي تۇتقىندار تزىمىنە قوسقان. حالىقارالىق قۇقىق قوراۋ ۇيىمدارى مۇحتار جاكىشەۆتى بوساتۋ جونىندە استاناعا الدەنەشە رەت ۇندەۋ تاستاعان.
2020 جىلى 3 ناۋرىزدا سوت جاكىشەۆتىڭ ءوتىنىشىن ورىنداپ، شارتتى جازامەن بوساتقان. باستاپقىدا "قازاتومونەركاسىپ" پەن ونىمەن ەنشىلەس كومپانيالارعا 99,6 ميلليارد تەڭگە زالالىن وتەمەدى دەپ سوت ونىڭ ارىزىن قاراعاتتاندىرۋدان باس تارتقان.
جاكىشەۆتىڭ قامالعانى الۋان ءتۇرى بولجامدى كوبەيتكەن. قازاقستان قۇقىق قورعاۋشىلارىنىڭ كەيبىرى ونى 2009 جىلى ەلدەن كەتكەن وپپوزيتسيونەر مۇحتار ابليازوۆپەن دوستىعى ءۇشىن قامالدى دەپ سانايدى. رەسەيدىڭ ۋران ءوندىرىسىنىڭ مۇددەسىنە جاكىشەۆ كەدەرگى جاسادى دەگەن دە جورامال بولعان.
جاكىشەۆ "قازاتومونەركاسىپپەن" سەرىكتەس بولعىسى كەلگەن جاپونيانىڭ Toshiba كومپانياسى ارقىلى كانادانىڭ Uranium One كومپانياسىنىڭ "جولىن كەستى" دەيتىندەر دە بار. جاكىشەۆتىڭ ءوزىنىڭ سوزىنشە، قاماۋعا الىنۋىنا وسى فاكتورلاردىڭ ءبارىنىڭ جيىنتىعى اسەر ەتكەن.
