بۇگىن ماسكەۋدەگى ەكىنشى دۇنيەجۇزىلىك سوعىستىڭ 78 جىلدىعىنا ارنالعان اسكەري شەرۋگە تمد ەلدەرىنىڭ 7 پرەزيدەنتى باردى. ونىڭ ىشىندە ءوزىمىزدىڭ مەملەكەت باسشىسى قاسىم-جومارت توقاەۆ تا بار.

رەسەي استاناسىنا بەلارۋس پرەزيدەنتى الەكساندر لۋكاشەنكو، قىرعىزستان پرەزيدەنتى سادىر جاپاروۆ، ارمەنيا پرەمەر-ءمينيسترى نيكول پاشينيان، تاجىكستان پرەزيدەنتى ەمومالي راحمون، وزبەكستان پرەزيدەنتى شاۆكات ميرزيەەۆ جانە تۇرىكمەنستان پرەزيدەنتى سەردار بەردىمۇحامەدوۆ كەلدى.
ال گرۋزيا پرەزيدەنتى سالومە زۋرابيشۆيلي مەن ءازىربايجان باسشىسى يلحام اليەۆ ءپۋتيننىڭ شاقىرتۋىنان باس تارتقان.

امەريكالىق سوعىستى زەرتتەۋ ينستيتۋتىنىڭ جازۋىنشا، پۋتين بۇل شەرۋدى رەسەيدىڭ ورتالىق ازياداعى ىقپالىق كورسەتۋ ءۇشىن وتكىزىپ وتىر.

«2022 جىلى بىردە-ءبىر شەتەلدىك كوشباسشى جەڭىس كۇنىن تويلاۋعا ماسكەۋگە بارعان جوق. قازاقستان، قىرعىزستان جانە وزبەكستان پاندەمياعا بايلانىستى بىلتىر اسكەري شەرۋ وتكىزگەن جوق. ورتالىق ازيا ەلدەرى كوشباسشىلارىنىڭ ماسكەۋگە باراتىنى تۋرالى جەمە-جەمگە كەلگەندە حابارلانۋى، ولاردىڭ سوعىسقا اشىق تۇردە قولداۋ كورسەتكەندەي بولعىسى كەلمەۋىنەن بولۋى مۇمكىن»،-دەپ جازدى ISW.

پۋتين بۇگىنگى جىيندا ءسوزىن «رەسەيگە قارسى سوعىس ءجۇرىپ جاتىر» دەگەننەن باستاپتى. ەندى رەسەيدىڭ بولاشاعى «ارنايى وپەراتسياعا» كەتكەندەردىڭ قولىندا دەيدى ول.

«ءبىز حالىقارالىق تەرروريزمگە قارسى تۇردىق. دونباستىڭ تۇرعىندارىن جانە ءوزىمىزدىڭ قاۋىپسىزدىگىمىزدى قورعايمىز»،-دەيدى رەسەي باسشىسى.

ونىڭ سوزىنشە، الەمدەگى قاندى قىرعىنداردىڭ بارىنە ادەتتەگىدەي باتىس ەلدەرى كىنالى. «باتىس مەملەكەتتەرىنىڭ ەليتاسى اگرەسسيۆتى ۇلتىشىلدىق پەن رۋسوفوبيانىڭ كۇشەيتىپ» وتىر.

«ولاردىڭ ماقساتى – ءبىزدىڭ ەلىمىزدىڭ قۇلاعانى، ىدىراعانى. ەكىنشى دۇنيەجۇزىلىك سوعىستىڭ ناتيجەسىن جويىپ جىبەرگىسى كەلەدى. ولار جاھاندىق قاۋىپسىزدىك پەن حالىقارالىق قۇقىق جۇيەسىن تۇبەگەيلى بۇزۋدى كوزدەپ وتىر»،-دەپتى پۋتين.

وسىلايشا كرەمل باسشىسى باتىسقا، ياعني ناتو مەن ەۋرووداققا قوسىلۋعا ۇمتىلىپ، رەسەيدىڭ ىقپالىنان شىعۋعا تىرىسقان ۋكراينانىڭ تاياق جەپ وتىرعانىن جەتكىزدى.

«شامادان تىس وزىمشىلدىك، تاكاپپارلىق، وزىمبىلەرلىكتىڭ ارتى وسىنداي تراگەدياعا اكەلەدى. ۋكراينا حالقىنىڭ باستان كەشىپ جاتقان تراگەدياسىنىڭ سەبەبى دە – وسى. ول باتىس قوجايىندارىنىڭ قىلمىستىق رەجيمىنىڭ كەپىلىنە اينالدى. باتىستىڭ قاتىگەز جوسپارلارىن جۇزەگە اسىرۋعا پايدالانىپ قۇرالعا اينالدى»،-دەدى پۋتين تمد مەملەكەتتەرىنىڭ باسشىلارىن جيناعان شارادا.

Abai.kz