جەكسەنبى, 26 مامىر 2024
تالقى 2357 0 پىكىر 14 ءساۋىر, 2023 ساعات 14:10

اداستىرىلعان شۋماق

مادەنيەت جانە سپورت ءمينيسترىمىز
ا.ر.ورالوۆ مىرزانىڭ نازارىنا!

«ءاندى سۇيسەڭ، مەنشە ءسۇي...» دەگەن ابەكەڭنىڭ، اباي اتامىزدىڭ، «كوزىمنىڭ قاراسى» ءان-ولەڭىن ءيسى قازاقتىڭ كوڭىلى كوكتەم بولىپ تولقىپ، جانى جاز بولىپ بالقىپ تىڭدايتىنى، ال ءانشى ەمەسىنىڭ الىنە قاراي ايتاتىنى دا حاق. جيىنى 22 شۋماق ولەڭ وقىپ وتىرعان بوزبالانى جاۋقازىن ءراۋىشتى سەزىمىن تەربەتە باۋراپ جۇرگەن قىزعا ءوزى جازىپ وتىرعانداي اسەم اسەرلى كۇيگە بولەسە، جىگىتاعالارىن دا، ەرەسەكتەردى دە سۇيىندىرەدى ەمەس پە؟! ولەڭنىڭ باستاپقى مىنا 4 شۋماعى كونتسەرتتىك باعدارلاماعا ەنگىزىلىپ، ۇلكەن-كىشى انشىلەرىمىزدىڭ دە، تىڭداۋشىلاردىڭ دا ايىزىن قاندىرۋدا عوي:

«كوزىمنىڭ قاراسى،
كوڭىلىمنىڭ ساناسى،
بىتپەيدى ىشىمدە
عاشىقتىڭ جاراسى.

قازاقتىڭ داناسى،
جاسى ۇلكەن اعاسى.
بار دەمەس سەندەي ءبىر
ادامنىڭ بالاسى.

جىلايىن، جىرلايىن،
اعىزىپ كوز مايىن.
ايتۋعا كەلگەندە
قالقاما ءسوز دايىن.

جۇرەكتەن قوزعايىن،
ادەپتەن وزبايىن.
ءوزى دە بىلمەي مە،
كوپ سويلەپ سوزبايىن».

جىگىتتىڭ عاشىقتىق جىرى. كىرشىكسىز سۇيىسپەنشىلىكتىڭ ىستىق ءۇنى. 4 شۋماعى عانا ەمەس، 22 شۋماعى تۇگەلدەي دەرلىك...

ماعان بۇل «دەرلىكتى» ايتقىزعان – ەكىنشى شۋماعى.

ابەكەڭنىڭ ولەڭدەرىن قايتالاپ وقىپ جۇرەتىن ادەتىممەن بىردە «كوزىمنىڭ قاراسىن» وقي باستاپ، ەكىنشى شۋماعىنا قالايدا كىدىرگەنىم. وزگەنىڭ ولەڭ جولدارى سياقتاندى... ءمان بولەك... جىگىتتىڭ قىزعا ماحاببات سىرىن شەرتەر-شەرتپەستە ءوزىن ءوزى «قازاقتىڭ داناسى...» دەپ قولپاشتاۋى ويعا قونبايدى. قىزدىڭ ايتا قويعان جاۋابى دەۋدىڭ رەتى جانە جوق، جىگىت پەن قىزدىڭ ايتىسى ەمەس. بۇل قالاي؟ ويلاندىم...  «قازاقتىڭ داناسى...». ماقتاۋ. قىز... ۋاۋ، ابەكەڭنىڭ «قىز ءسوزى» ولەڭىندە مىناعان ۇقساس سوزدەر بار سياقتى ما، قالاي؟.. كىتاپتى دەرەۋ پاراقتاپ، «قىز ءسوزىن شولدىم:

«قيىستىرىپ ماقتايسىز،
ويلاساڭ نە تاپپايسىز؟
بىزدە ەرىك جوق، ءوزىڭ ءبىل،
الدە نەگە باستايسىز.

ءبىز دە اركىمدى بايقايمىز،
تاپ بەرگەننەن تايقايمىز.
سىزدەي اسىل كەز بولسا،
قايتىپ باستى شايقايمىز؟ -دەگەنىنەن سوڭ:

قازاقتىڭ داناسى،
جاسى ۇلكەن اعاسى.
بار دەمەس سەندەي ءبىر
ادامنىڭ بالاسى»، -بولىپ تۇرسا، ابدەن قيسىندى!

مەنىڭشە، اقىننىڭ جۇرتقا اۋىزشا تاراعان ولەڭدەرىن جيناعانداردىڭ ءبىرى نە ايتۋشىنىڭ قاتەسىن اڭعارمادى، نە ءوزى جيناعان ولەڭدەردى قايتالاپ كوشىرۋدە اعاتتىق جاساپ الدى.

الداعى ۋاقىتتا اباي شىعارمالارى جيناعىن قايتالاپ باستىرۋدا ايتىلعان وسى جاڭساقتىقتى تۇزەتۋ قاجەت. سونداي-اق، اباي اندەرىن ەندى ايتاتىن جاس انشىلەر ەسكەرتىلسە ەكەن!

قوسىمشا ايتارىم: مينيسترلىكتىڭ اتىن وزگەرتۋ قاجەت. بىلتىر مەن بيىلدا سپورتشى قىزدارىمىز بەن جىگىتتەرىمىز الەمدىك دەڭگەيدەگى باسەكەلەردە جەڭىمپاز بولىپ، قازاقستاننىڭ، قازاقتىڭ اتتارىن قۇرمەتتەتتى جانە ءالى دە جەڭىستەن جەڭىسكە جەتە بەرەدى! ياعني بىزدە سپورت مينيستىرلىگى نەمەسە رەسپۋبيكالىق سپورت كوميتەتى قۇرىلسا دەيمىن. سان سالالى جۇمىسى جەتىپ-ارتىلىپ جاتقان مادەنيەت مينيسترىلىگى جەكە وتاۋ بولعاي!

عابباس قابىشۇلى

Abai.kz

0 پىكىر

ۇزدىك ماتەريالدار

قۇيىلسىن كوشىڭ

باس گازەت ورالماندارعا نەگە شۇيلىكتى؟

ءالىمجان ءاشىمۇلى 2347
ادەبيەت

«سولاي ەمەس پە؟»

عابباس قابىشۇلى 2690
قوعام

دوس كوپ پە، دۇشپان كوپ پە؟

ءابدىراشيت باكىرۇلى 2937
ەل ءىشى...

ۇلتتىق بىرەگەيلەنۋ: قانداستاردىڭ ءرولى قانداي؟

ءومارالى ادىلبەكۇلى 1770