بۇگىن «Nauryz» ۇلتتىق سەريالدار بايگەسىنىڭ قورىتىندىسى شىقتى.
بايگە اقپارات جانە قوعامدىق دامۋ مينيسترلىگىنىڭ ۇيىمداستىرۋىمەن العاش رەت وتكىزىلىپ وتىر.

وعان اقپارات جانە قوعامدىق دامۋ مينيسترلىگىنىڭ مىندەتىن اتقارۋشى دارحان قىدىرالى، مادەنيەت جانە سپورت ءمينيسترىنىڭ مىندەتىن اتقارۋشى اسحات ورالوۆ، مەديا مەنەدجەرلەر، سونداي-اق، قىرعىزستان، وزبەكستان، ازەربايجان جانە تۇركيادان كەلگەن ماماندار قاتىستى.

ءوز سوزىندە دارحان قىدىرالى:
«ناۋرىز – جاڭارۋ مەن جاسارۋدىڭ، گۇلدەنۋدىڭ سيمۆولى. ءداستۇرلى جىل باسىندا وتكىزىلىپ وتىرعان بۇل بايقاۋ وتاندىق سەريالداردىڭ جاڭا ساتىعا كوتەرىلۋىنە سەپ بولادى دەپ سەنەمىز.
وزدەرىڭىزگە ءمالىم، سوڭعى جىلدارى ەلىمىزدە كرەاتيۆتى يندۋستريا، سەريالدار ءوندىرىسى وركەندەپ كەلەدى. مەملەكەت باسشىسى دا وسى سالانىڭ دامۋىنا ايىرىقشا ەكپىن بەردى", - دەدى.

بايگەنىڭ قورىتىندىسى بىلاي بولدى:

ۇزدىك تاريحي سەريال:
«مىرجاقىپ. ويان،قازاق!». «Qazaqstan» ۇلتتىق ارناسى
ۇزدىك درامالىق سەريال:
«اقجاۋىن». «Qazaqstan» ۇلتتىق ارناسى
ۇزدىك كومەديالىق سەريال:
«كەلىنجان». «حابار» تەلەارناسى
ۇزدىك ۆەب-سەريال:
«Serjan Bratan». Salem Social Media
ۇزدىك اكتەر:
دۋلىعا اقمولدا. «Serjan Bratan» سەريالى
ۇزدىك اكتريسا:
جانەل سەرگازينا. «نيانيا» سەريالى
ەكىنشى پلانداعى ۇزدىك اكتەر:
رۇستەم جانىامانوۆ. «كەلىنجان» سەريالى
ەكىنشى پلانداعى ۇزدىك اكتريسا:
كاماليا بايتەلەۋوۆا. «اق پەن قارا» سەريالى
ۇزدىك رەجيسسەر:
ەرلان نۋرمۋحامبەتوۆ. «قانىش.قازىنا». «Qazaqstan» ۇلتتىق ارناسى
ۇزدىك ستسەناريست:
بەكزات مىرزاحمەتوۆا. «Mystan». Salem Social Media
ۇزدىك قويۋشى – وپەراتور:
باعدات ارعىنوۆ. «SHEKER»، «Serjan bratan»، «5:32».Salem Social Media
ۇزدىك مونتاج:
راحيمجان ياحياروۆ. «اق پەن قارا». «حابار» تەلەارناسى
ۇزدىك ساۋندترەك:
«Sheker». Salem Social Media

قازىلار القاسىنىڭ شەشىمىمەن ناۋرىز ۇلتتىق بايقاۋىنىڭ ارنايى سىيلىعى - شەت ەلگە ساتىلعان ۇزدىك كوممەرتسيالىق «پاترۋل» سەريالىنا بەرىلەدى.

ەكىنشى ارنايى سىيلىق ءبىرىنشى وتاندىق «پەرەكرەستوك» سەريالىنا بەرىلدى.
​جەڭىمپازدار وتاندىق تەلەسەريالدار ءوندىرۋ سالاسىنداعى ەڭ جوعارى جەتىستىكتەرى ءۇشىن «Nauryz» مۇسىنشەسىنىڭ جانە 1 ميلليون تەڭگە كولەمىندەگى اقشالاي سىياقىنىڭ يەگەرى اتاندى.

Abai.kz