جەكسەنبى, 23 ماۋسىم 2024
2056 6 پىكىر 24 ناۋرىز, 2023 ساعات 14:32

ناتو: ۋكرايناعا قارۋ جەتكىزبەسەك، رەسەيدى جەڭۋ قيىن

ناتو باس حاتشىسى يەنس ستولتەنبەرگتىڭ پىكىرىنشە، باتىس ەلدەرى ۋكرايناداعى سوعىستىڭ ۇزاققا سوزىلۋىنا دايىندالۋى كەرەك، سەبەبى جانجال شەشىلەتىن ءتۇرى جوق. بۇل تۋرالى The Guardian گازەتى حابارلادى.

سولتۇستىك اليانس باسشىسى ۋكرايناداعى اسكەري قيمىلداردى «تيتىقتاتۋ سوعىسى» دەپ اتاپ، باتىس ەلدەرىن ۋكرايناعا قارۋ-جاراقتى كوبىرەك جەتكىزۋ ءۇشىن ونەركاسىپ قۋاتىن ارتتىرۋعا شاقىردى. "قارۋ-جاراقتى قولدانۋ جىلدامدىعى ونەركاسىپ جىلدامدىعىنان ارتىعىراق بولىپ تۇر", - دەيدى ناتو باس حاتشىسى.

سول سەبەپتى باتىس ەلدەرى، ەڭ الدىمەن اقش، ۇلىبريتانيا، فرانتسيا جانە گەرمانيا ۋكراينانى قارۋمەن كوپ ۋاقىت قامتاماسىز ەتۋگە دايىن بولۋى ءتيىس، دەپ ەسەپتەيدى ستولتەنبەرگ.

ونىڭ ايتۋىنشا، سوعىستىڭ قالاي اياقتالاتىنىن ء"وندىرىس قۋاتىنداعى باسەكەلەستىك پەن ۇزاق ۋاقىت قولداۋ كورسەتۋ مۇمكىندىگى شەشەدى".

ۋكرايناعا اقش پەن باسقا دا ەلدەر اسكەري كومەك كورسەتىپ وتىرعانىنا قاراماستان، ءالى دە بولسا رەسەي اگرەسسياسىن تويتارۋعا كۇش پەن قارۋ جەتپەي جاتىر، دەپ جازدى The Washington Post.

"ۋاقىت رەسەيگە جۇمىس ىستەيتىنى انىق. ونىڭ اۋقىمدى مايداندا ۇزاق سوعىسۋعا ساربازى مەن ماتەريالدىق رەسۋرسى جەتكىلىكتى. ۋكراينادا ونداي مۇمكىندىك جوق. قارۋ تەز جەتكىزىلىپ تۇرماسا، ۋكراينانىڭ رەسەي جەتىستىكتەرىنە تويتارىس بەرۋى قيىنداي تۇسەدى", - دەپ ەسەپتەيدى اتلانتيكالىق كەڭەس ساراپشىسى رەيچەل ريتستسو.

ماسەلە قارۋ-جاراقتى تەز جەتكىزۋدە عانا ەمەس، ماسەلە ۋكراينانىڭ بىرقاتار تالاپتارىنىڭ ورىندالماۋىندا بولىپ وتىر. ۋكرايناعا سوۆەت تانكىلەرى مەن ارتيللەرياسىنا توتەپ بەرۋ ءۇشىن جويعىشتار، ۇشاققا ۇشاتىن رەاكتيۆتى ارتيللەريالار قاجەت، دەپ جازدى باسىلىم.

وسى اپتادا ەۋروپا وداعىنىڭ ەلدەرى ۋكرايناعا 12 ايدا 1 ميلليون ارتيللەريالىق وقتۇمسىق جەتكىزۋ جونىندە شەشىم قابىلدادى. اقش مەملەكەتتىك دەپارتامەنتى دە ۋكرايناعا 350 ميلليون دوللاردىڭ كەزەكتى اسكەري كومەگىن بەرەتىنىن مالىمدەدى. اسكەري كومەك پاكەتىنە HIMARS جۇيەسىنىڭ جاراقتارى، گاۋبيتسالار، تانكىلەرگە قارسى قارۋ جانە ناتو-نىڭ باسقا دا ارتيللەريالارى كىرەدى.

 

Abai.kz

6 پىكىر