جىل باسىنان بەرى قازاقستاندىقتارعا 549,3 ملرد تەڭگە سوماسىندا زەينەتاقى تولەندى، دەپ حابارلايدى BAQ.KZ.

قر ەڭبەك جانە حالىقتى الەۋمەتتىك قورعاۋ مينيسترلىگى ءباسپاسوز قىزمەتى دەرەكتەرىنە سۇيەنسەك، 2023 جىلعى قاڭتاردا رەسپۋبليكالىق بيۋدجەتتەن 549,3 ملرد تەڭگە سوماسىنا زەينەتاقى تولەندى، ونىڭ ىشىندە بازالىق زەينەتاقى – 168,7 ملرد تەڭگە، ىنتىماقتى زەينەتاقى – 380,6 ملرد تەڭگە.

2023 جىلعى 1 ناۋرىزداعى جاعداي بويىنشا زەينەتكەرلەر سانى – 2 ملن 292 مىڭ ادام.

2023 جىلعى 1 ناۋرىزداعى جاعداي بويىنشا جيىنتىق زەينەتاقىنىڭ ورتاشا مولشەرى 120 992 تەڭگەنى قۇرادى، ونىڭ ىشىندە ىنتىماقتى زەينەتاقى مولشەرى – 83 089 تەڭگە، بازالىق زەينەتاقى – 37 903 تەڭگە.

2018 جىلعى 1 شىلدەدەن باستاپ مەملەكەتتىك بازالىق زەينەتاقى تولەمى زەينەتاقى جۇيەسىندەگى ءوتىلىن ەسكەرە وتىرىپ، ءار الۋشىعا جەكە تاعايىندالاتىنىن ەسكە سالامىز.

بۇل رەتتە 1998 جىلعى 1 قاڭتارداعى جاعداي بويىنشا ىنتىماقتى جۇيەدە جۇمىس ىستەگەن ۋاقىتى، سونداي-اق مىندەتتى زەينەتاقى جارنالارى (بۇدان ءارى – مزج) تولەنگەن كەزەڭدەر زەينەتاقى جۇيەسىندەگى ەڭبەك وتىلىنە قوسىلادى.

ەگەر ازاماتتىڭ زەينەتاقى جۇيەسىندەگى ءوتىلى 10 جىل نەمەسە ودان از بولسا، سونداي-اق مۇلدە جوق بولسا، بازالىق زەينەتاقى ەڭ تومەنگى كۇنكورىس دەڭگەيىنىڭ 60%-نا تەڭ بولسا، سودان كەيىن 10 جىلدان اسقان ءار جىل ءۇشىن ونىڭ مولشەرى 2 %-عا ارتادى. ال ەگەر ءسىزدىڭ ءوتىلىڭىز 20 جىل بولسا، بازالىق زەينەتاقى تومەنگى كۇنكورىس دەڭگەيىنىڭ 80 %-ىن قۇرايدى. ەڭبەك ءوتىلى 30 جىل نەمەسە ودان كوپ بولسا، كۇنكورىس دەڭگەيىنىڭ ەڭ جوعارعى مولشەرىندە ياعني 100% بەلگىلەنەدى، - دەلىنگەن ۆەدومستۆو حابارلاماسىندا.

ەگەر ءبىر اي ىشىندە مىندەتتى زەينەتاقى جارنالارى بىرىڭعاي جيناقتاۋشى زەينەتاقى قورىنا بىرنەشە رەت اۋدارىلسا، جيناقتاۋشى جۇيەگە قاتىسۋ مەرزىمى ءبىر ايدى قۇرايدى.

وسىلايشا مىندەتتى زەينەتاقى جارنالارى نەعۇرلىم تۇراقتى جانە تولىق كولەمدە اۋدارىلاتىن بولسا، زەينەت جاسىنا جەتكەندە بازالىق زەينەتاقى تولەمدەرىنىڭ مولشەرى سوعۇرلىم كوپ بولادى.

ءوز كەزەگىندە ازاماتتىڭ جاسىنا بايلانىستى زەينەتاقى تولەمدەرىنىڭ مولشەرى 1998 جىلعى 1 قاڭتارداعى جۇمىس وتىلىنە (كەم دەگەندە 6 اي قاجەت) جانە زەينەتكەرلىككە دەيىنگى كەزەڭدەگى ورتاشا ايلىق تابىسىنا بايلانىستى بولادى.

Abai.kz