بۇگىن شىمكەنتتە ۇلىستىڭ ۇلى كۇنى قارساڭىندا جاڭا يپپودروم اشىلدى. سالتاناتتى شارا ەلىمىزدىڭ  ءار ءوڭىرىنىڭ سالت-ءداستۇرىن ناسيحاتتايتىن باتىس پەن شىعىستىڭ، سولتۇستىك پەن وڭتۇستىكتىڭ  كەرۋەنىن كۇتىپ الۋدان باستالدى. 

ودان سوڭ اتالعان يپپودروم قۇرىلىسىن جۇرگىزگەن BI GROUP كومپانياسىنىڭ پرەزيدەنتى ايدىن راحىمباەۆ شىمكەنت قالاسىنىڭ اكىمى مۇرات ايتەنوۆكە يپپودروم سيمۆولى بولىپ سانالاتىن تاعانى تابىستادى.

سونداي-اق، شارانىڭ اشىلۋ راسىمىنە قر ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ تا ارنايى كەلىپ قاتىستى.

سالتاناتتى جيىندا ءسوز سويلەگەن شىمكەنت قالاسىنىڭ اكىمى مۇرات ايتەنوۆ بارشا قوناقتاردى ناۋرىز مەرەكەسىمەن قۇتتىقتادى.

«بۇگىن قالامىز ءۇشىن ەرەكشە قۋانىشتى كۇن. ۇلىستىڭ ۇلى كۇنى ناۋرىز مەرەكەسىنە وراي اشىلعالى تۇرعان كەرەمەت يپپودروم شىمكەنتتىكتەر ءۇشىن ەلەۋلى جاڭالىق ەكەنى بەلگىلى. وسىناۋ يپپودرومنىڭ قۇرىلىسىن جۇرگىزگەن BI GROUP كومپانياسىنا، سونداي-اق بۇگىنگى شاراعا ارنايى كەلىپ، ات سالىسىپ، ۇلتتىق سپورتىمىزدى دارىپتەپ، دامىتۋىنا ۇلەس قوسىپ جۇرگەن قر ۇلتتىق سپورت قاۋىمداستىعىنا العىسىمدى بىلدىرەمىن» دەپ ايتتى ءوز سوزىندە مۇرات دۇيسەنبەكۇلى.

وسىناۋ مەرەكەلىك كۇنى ەلىمىزدىڭ ءداستۇرلى جانە ەسترادا جۇلدىزدارى شىمكەنت قالاسىنىڭ تۇرعىندارى مەن قوناقتارىنا ارناپ ونەر كورسەتتى.

ۇلىستىڭ ۇلى كۇنى ناۋرىز مەيرامىن تويلاۋ جانە جاڭا يپپودرومنىڭ اشىلۋى اياسىنداعى شارا «GREAT QAZAQ GAMES» رەسپۋبليكالىق ەتنوفەستيۆالىمەن جالعاستى.

فەستيۆال اياسىندا مىنا كاتەگوريالار بويىنشا جارىستار باستالدى:

ۇلتتىق تاعامدار: ەت اسۋ، سىرنە، قۋىرداق، باۋىرساق، جەنت، قىمىز، شۇبات;

ۇلتتىق ويىندار: كوكپار، الامان بايگە، توپ بايگە، قۇنان بايگە، تەڭگە ءىلۋ، اۋدارىسپاق، قازاق كۇرەسى، ساداق اتۋ، جامبى اتۋ;

ۇلتتىق كيىم: ەرلەر كيىمى، شاپان، كامزول، ۇيلەنۋ كيىمى، ساۋكەلە، تاقيا;

ۇلتتىق ونەر: ايتىس، جىر-تەرمە، ءداستۇرلى ءان، كۇي قوبىز، كۇي دومبىرا، جەتىگەن، بي.

وسىناۋ ۇلتتىق سپورتتىق جارىستارعا قىرعىزستان، وزبەكستان، مونعوليا، رەسەي، قىتاي، تاجىكستان، يوردانيا، ساۋد ارابياسى، پولشا، تۇركيا ەلدەرىنەن سپورتشىلار قاتىسۋدا.

ءىس-شارانىڭ جۇلدە قورى - 75 ميلليون تەڭگە بولىپ تابىلادى.

ايتا كەتەيىك، اتالمىش سايىستاردىڭ اقتىق ويىندارى 22 ناۋرىز كۇنى وتەتىن بولادى.

Abai.kz