ەلىمىزدىڭ باس پروكۋراتۋراسى 19 ناۋرىزدا وتەتىن ءماجىلىس جانە ءماسليحاتتار دەپۋتاتتارىن سايلاۋ الدىنداعى تىنىشتىق كۇنى تالاپتارىن ەسكە سالدى.

«بۇگىن ساعات 00:00-دە سايلاۋالدى ۇگىت جۇمىستارى كەزەڭى اياقتالادى. ەرتەڭ، 18 ناۋرىزدا جانە داۋىس بەرۋ كۇنى – 19 ناۋرىزدا كەز كەلگەن ۇگىت جۇرگىزۋگە تىيىم سالىنادى («قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 32-بابى). سونىمەن قاتار 14 ناۋرىزدانباستاپ باق-تا ساۋالناما ناتيجەلەرىن، سايلاۋ ناتيجەلەرىنىڭ بولجامدارىن، سايلاۋعا، كانديداتتاردى قولداۋعا داۋىس بەرۋگە بايلانىستى وزگە زەرتتەۋلەردى جاريالاۋعا دا جول بەرىلمەيدى. ياعني ساۋالنامانى داۋىس بەرۋگە ارنالعان ءۇي-جايدا نەمەسە بەكەتتە جۇرگىزۋگە بولمايدى («قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 28-بابىنىڭ 9-تارماعى)»، - دەدى باس پروكۋروردىڭ ورىنباسارى جاندوس ومىراليەۆ ورتالىق سايلاۋ كوميسسياسىنىڭ وتىرىسىندا.

ونىڭ ايتۋىنشا، ورتالىق سايلاۋ كوميسسياسىن جازباشا تۇردە حاباردار ەتكەن زاڭدى تۇلعالار عانا سايلاۋ ۋچاسكەلەرىنەن شىعا بەرىستە ساۋالناما جۇرگىزە الادى.

«اتالعان ساۋالنامالاردىڭ ناتيجەلەرىن باق-دا داۋىس بەرۋ كۇنىنەن كەيىن، ياعني 2023 جىلعى 20 ناۋرىز ساعات 00:00-دەن باستاپ جاريالاۋعا رۇقسات ەتىلەدى. كونستيتۋتسيالىق زاڭنىڭ وسى تالاپتارىن ورىنداماۋ اكىمشىلىك قۇقىق بۇزۋشىلىق تۋرالى كودەكستىڭ 102 جانە 120-باپتارىندا كوزدەلگەن جاۋاپكەرشىلىككە اكەپ سوعادى. اتالعان زاڭ تالاپتارى پارلامەنت ءماجىلىسى دەپۋتاتتارىمەن قاتار، بارلىق دەڭگەيدەگى ءماسليحاتتار دەپۋتاتتارىنىڭ كەزەكتەن تىس سايلاۋىنا دا قاتىستى»، - دەيدى ول.

Abai.kz