بۇل تۋرالى اقپارات جانە قوعامدىق دامۋ ءمينيسترى دارحان قىدىرالى ءوزىنىڭ Facebook پاراقشاسىندا جازدى.

وتكەن جىلدىڭ سوڭىنان بەرى جۋرناليستەرگە جاسالعان شابۋىلدار كوبەيگەنى بەلگىلى.

مەملەكەت باسشىسى وسىعان وراي قۇقىق قورعاۋ ورگاندارىنا مۇقيات تەرگەۋ جۇرگىزۋدى تاپسىردى. سوعان بايلانىستى تاياۋدا جۋرناليستەر مەن بلوگەرلەرگە قارسى زاڭسىز ارەكەتتەر جاساعان 18 ادام ۇستالعان ەدى.

ەل پرەزيدەنتى بۇل زاڭسىز ارەكەتتەردىڭ ورىنداۋشىلارى عانا ەمەس، تاپسىرىس بەرۋشىلەرى دە انىقتالۋعا ءتيىس ەكەنىن باسا ايتقانى بەلگىلى. ەندى تاپسىرىس بەرۋشىلەر دە انىقتالا باستادى.

ءىىم جانە ۇقك ۆەدومستۆوارالىق جەدەل-تەرگەۋ توبى باق وكىلدەرىنە شابۋىل ۇيىمداستىردى دەپ كۇدىك كەلتىرىلگەن توپتىڭ ءىس-ارەكەتىن اشكەرەلەپ، جولىن كەستى.

«الماتىدا ارانداتۋشىلىق شابۋىلداردىڭ تىكەلەي ۇيلەستىرۋشىسى – شەتەلدىك ازامات، بىلىكتى حاكەر و.توكارەۆ ۇستالدى. ونىڭ ۋاقىتشا تۇرىپ جاتقان جەرىنەن شابۋىلداردى باسقارۋ، ءانونيمدى تەلەگرامم-اككاۋنتتاردا «تاپسىرىستار» بەرۋ، ورىنداۋشىلاردى تابۋ جانە ولاردىڭ اكتسيالارىنا اقى تولەۋ جۇرگىزىلگەن تەحنيكا تابىلىپ، تاركىلەندى»، – دەلىنگەن ءىىم اقپاراتىندا.

اتالعان توپ ۆ.بورەيكوعا، گ.باجكەنوۆاعا، گ.ەرعاليەۆاعا، س.يبراەۆاعا جانە بۇقارالىق اقپارات قۇرالدارىنىڭ باسقا دا وكىلدەرىنە قارسى 30-دان استام ارانداتۋشىلىق جاساعان.

كۇدىكتى ۋاقىتشا ۇستاۋ يزولياتورىنا قامالدى.

اتالعان ارانداتۋشىمەن بىرگە تۇپكى تاپسىرىس بەرۋشىلەر دە جاقىن ارادا انىقتالادى دەپ سەنەمىز.

اقپارات جانە قوعامدىق دامۋ مينيسترلىگى تەرگەۋ بارىسىن ءجىتى نازاردا ۇستايدى.

Abai.kz