جۇما, 29 ناۋرىز 2024
سايلاۋ 2023: 2923 7 پىكىر 24 اقپان, 2023 ساعات 13:50

سايلاۋ: پارتيالار نە ىستەپ جاتىر؟

سايلاۋدىڭ ۇگىت-ناسيحات ناۋقانى ىزۋ-قىزۋ ءجۇرىپ جاتىر. كوشەدەگى باننەرلەردەن باستاپ، الەۋمەتتىك جەلىلەردە جاريالانعان ماتەريالداردى كورىپ-وقىپ ءجۇرمىز.

بۇعان دەيىن بولجاعانىمىزداي، وسى جولعى دەپۋتاتتار سايلاۋىنىڭ كوركىن قىزدىراتىن ءبىرمانداتتى وكرۋگتەر بويىنشا ءتۇسىپ جاتقان كانديداتتار بولاتىن سەكىلدى. ويتكەنى الەۋمەتتىك جەلىلەردەگى بەلسەندىلىگى وتە جوعارى. بۇل، ارينە، قۋانتارلىق جاعداي. باسەكە بار جەردە ساپا دا بولاتىنى بەلگىلى.

ال پارتيالار قالاي جۇمىس جۇرگىزىپ جاتىر؟

پارلامەنتتىڭ باسىم بولىگىن پارتيالىق تىزىممەن ۇسىنىلعان كانديداتتار قۇرايدى. 98 ورىننىڭ 70 پايىزىن پارتيالار ءوزارا بولىسكە سالادى.

بيلىك باسىندا بولعان، دومينانت باسىمدىققا يە بولىپ كەلگەن – «امانات»: قازىر كوشەلەردە باننەرلەر ءىلۋ، ارنايى بروشيۋرا تاراتۋمەن اينالىسىپ، الەۋمەتتىك جەلىلەر: TikTok, Facebook, Instagram پاراقشالارىندا ۇگىت-ناسيحات جۇمىستارىن مىقتاپ قولعا العان.

«امانات» پارتياسى، ادەتىنشە، سايلاۋالدى ۇگىت-ناسيحات جۇمىستارىن ەلىمىزدىڭ ايماقتارىنان باستادى. پارتيانىڭ سەنىمدى وكىلدەرى بىرنەشە توپقا ءبولىندى. ءبىر توبى – تۇركىستانعا، ءبىر توبى – استانا مەن ونىڭ جاقىن ايماقتارىنا اتتاندى، ەندى باسقا ءبىر توبى اۋىل-اۋىلدى ارالاپ ءجۇر. «اماناتتىڭ» فرونتمەندەرى: رينات زايىتوۆ، اسحات ايماعامبەتوۆ، ەرلان سايروۆ، ەلنۇر بەيسەنباەۆ، ەسەن ەلەۋكەن، نارتاي ارالبايۇلى، ماقسات تولىقباي.

«اق جول» پارتياسىنىڭ وسىعان دەيىنگى تۇراقتى اۋديتورياسى بار ەكەنىن ايتقان بولاتىنبىز. پارتياعا وتكەن سايلاۋدا 1 ملننان استام ادام داۋىس بەرىپتى. پوتەنتسيالدى اۋديتورياسىنا شاعىن جانە ورتا بيزنەس وكىلدەرى كىرەدى. قازىر «اق جولدىڭ» دا الەۋمەتتىك جەلىدە بەلسەندىلىك تانىتىپ، پارتيانىڭ سەنىمدى وكىلدەرى مەن ۇگىت-ناسيحات شتابى بەلسەندى جۇمىس ىستەپ جاتقانىن كورىپ وتىرمىز. TikTok, Facebook, Instagram جەلىلەرىندە «اق جولدىڭ» استانالىق شتابى عانا ەمەس، بۇكىل وڭىرلەر بويىنشا شتابتارى جۇيەلى تۇردە ىسكە كىرىسكەن. ايتا كەتەيىك، «اق جول» ءوزىنىڭ سايلاۋالدى ۇگىت-ناسيحاتىن قاسيەتتى ۇلىتاۋ تورىندەگى جوشى حاننىڭ كەسەنەسىنە تاعزىم ەتۋدەن باستاعان. بۇل دا ءبىر وزگەلەردەن ەرەكشەلەنگەن قادام بولدى. پارتيانىڭ نەگىزگى فرونتمەندەرى: ازات پەرۋاشەۆ، قازىبەك يسا، بەرىك دۇيسەنبينوۆ، دانيا ەسپاەۆا، ال ماسليحاتقا ءتۇسىپ جاتقان ۇمىتكەرلەردىڭ اراسىندا دا قاقاعان ايازدا جىلۋسىز قالعان ەكىباستۇزعا بارىپ، حالىقپەن كەزدەسۋ وتكىزىپ جۇرگەن فۋات ساتىباەۆ، تەرەڭ قالتالى كاسىپكەر دۋلات تاستەكەيلەر...

اتالعان ەكى پارتيادان كەيىن ءۇشىنشى بولىپ كەلە جاتقان جاڭادان قۇرىلعان جاس پارتيا – «رەسپۋبليكا» پارتياسى. پارتيادا مەديا تۇلعالار وتە كوپ. پارتيانىڭ ماجىلىسكە ءباس تىگىپ وتىرعانى دا وسى مەديا تۇلعالاردىڭ تانىمالدىعى بولسا كەرەك. قازىر «رەسپۋبليكا» پارتياسى ارنايى اۆتوبۋس دايارلاپ، وڭىرلەردى ارالاۋعا كىرىسىپ كەتتى، ءارى الەۋمەتتىك جەلىلەردە بەلسەندىلىگى جوعارى.

«اۋىل» پارتياسى دا سايلاۋالدى ۇگىت-ناسيحات جۇمىسىن قىزۋ باستاپ كەتكەندەردىڭ قاتارىندا. ولاردىڭ قالا كوشەلەرىنە ىلىنگەن باننەرلەرى، الەۋمەتتىك جەلىلەرگە جاريالاپ جاتقان ماتەريالدارى الدىڭعى ۇشتىكپەن سالىستىرعاندا ازداۋ. دەگەنمەن «بايتاق»، جسدپ، قحپ (كوممۋنيستىك پارتيا) سالىستىرا قاراساق، بەلسەندىگى جوعارى دەۋگە بولادى. پارتيانىڭ فرونتمەندەرى بىلتىر پرەزيدەنت سايلاۋىنا تۇسكەن اتىشۋلى جيگۋلي دايراباەۆ، قاراقات ابدەن، تولەۋتاي راقىمبەكوۆ پەن داۋلەتكەرەي كاپۇلى بولىپ تۇر.

«بايتاق» جاسىلدار پارتياسى دا الەۋمەتتىك جەلىلەردى قولدانۋعا تىرىسىپ جاتىر، دەگەنمەن الدىڭعى تورتتىكپەن سالىستىرعاندا بەلسەندىلىگى تومەن.

جەلىدەگى بەلسەندىگى ءتىپتى، بايقالمايتىن پارتيالار وپپازيتسيالىق جسدپ پارتياسى مەن قازاقستان حالىق پارتياسى (كوممۋنيستىك پارتيا).

جوعارىدا ايتىلعان پارتيالاردىڭ ىشىندە ەڭ نەگاتيۆتى اتقا يە بولعان – قازاقستان حالىق پارتياسى ەكەنىن ايتا كەتۋىمىز كەرەك. ويتكەنى پارتيا توراعاسى ەرمۇحامبەت ەرتىسباەۆتىڭ الەۋمەتتىك جەلىدە رەسەيلىك پروپاگاندالىق ارنالارعا بەرگەن سۇحباتتارى ءجيى جارىققا شىعىپ جاتىر. بۇل الەۋمەتتىك جەلى قولدانۋشىلارىنىڭ پارتياعا تەرىس پىكىرىن قالىپتاستىرۋدا. ازىرگە پارتيالاردىڭ سايلاۋلادى ۇگىت-ناسيحات جۇمىستارى وسىلاي ءجۇرىپ جاتىر.

Abai.kz

7 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1578
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2280
عيبىرات

قايسار رۋحتى عازيز جان

مۇحتار قۇل-مۇحاممەد 3597