پۋتيننءىڭ ۋكرايناعا سوعىس اشقانىنا جىل تولۋعا ساناۋلى كۇندەر قالدى. نايزاعاي جىلدامدىعىمەن كيەۆتءى الىپ، قۋىرشاق ۇكىمەت ورناتۋ جوسپارى كوزدەن بۇلبۇل ۇشتى. مايدانداعى ەرەۋىلشىلەردىڭ ەكپىنىنەن قايمىعىپ، رەسەيگە باس ساۋعالاپ قاشقان يانۋكوۆءيچتىڭ تاعدىرىنان ەشكىمنىڭ ساباق الماعانى وكىنىشتى.

سول قاتاردا ءپۋتيننىڭ دوسى، ۋكراينانىڭ ەكس-دەپۋتاتى، تەرەڭ قالتالى وليگارح، ۋكراينادا رەسەيشىل پارتيا قۇرىپ، رەسەي ينتەگراتسياسىن ناسيحاتتاعان، سوعىس باستالعاندا وتانىن ساتىپ، رەسەي جاعىنا قىزمەت ەتكەن ۆيكتور مەدۆەچۋك تە بار. الىدە شىنايى بەت پەردەسىن جاسىرعان ول: «مەن قازىر ماسكەۋدە ءماجبۇرلى تۇردە تۇرىپ جاتىرمىن. مەن ۋكراينانى تاستاپ كەتكەم جوق. مەنى الماستىرىپ جىبەردى»، - دەپ وتىرىك شاعىمدانىپ، ۋكراينانى ورىستارعا كۇن كورسەتپەيتىن فاشيستەر ەلى ەتىپ كورسەتۋگە، ءپۋتيننىڭ قاندى سوعىسىن «ارناۋلى وپەراتسيا» ەتىپ كورسەتۋگە تىرىسىپ ءجۇر.

ورىستىڭ بيلىگىنە بۇيرەگى بۇرۋ، باتىستى قۇبىجىق كورۋ بىزگە دە تانىس جاعداي. كۇنى كەشە عانا پارلامەنتتىڭ ەسكى دەپۋتاتى ازامات ابىلداەۆتىڭ: «ءپۋتيننىڭ «ارناۋلى وپەراتسياسىن» قولدايمىن»، - دەپ، ارتىنان ورىس باسىلىمدارىنا: «رەسەيسىز قازاقستاننىڭ كۇنى قاراڭ»، - دەپ سۇحبات بەرگەنى شۋ تۋدىرعان ەدى. رەسەيشىل ازاماتتىڭ قاتارىنىڭ قالىڭ ەكەنى دە بەلگىلى. «لاتىن الىپبيىنە كوشسەك رۋسسكي ميردەن اجىراپ قالامىز»، - دەپ بايبالامعا باسقان يرينا سميرنوۆا حانىمدى ايتپاعاندا، قاراعاندىدا جيىرما جىل ماركسيزمنەن ساباق بەرگەن ەرمۇحامەت ەرتىسباەۆتى اتاۋعا بولادى. ءبارى ورىس باسىلىمدارىنا مۇڭ شاعۋعا، العىس ايتۋعا قۇمار. سىرتقا بىلدىرمەگەنىمەن قانشا لاۋازىمدى تۇلعانىڭ ىشىندە يت ءولىپ جاتقانىن ءبىر قۇداي بىلەدى.

الەۋمەتتىك جەلىدە ءپۋتيننىڭ ۋكرايناعا سوعىسىن قولداپ، باتىستى ايىپتايتىن قالامگەرلەر قاتارىنىڭ مولدىعى دا كوپ ايتىلادى. مۇنىڭ ءبارى كەڭەس كەزىندە عانا ەمەس، تاۋەلسىزدىك العالى بەرى دە ورىستىڭ اقپاراتتىق شىرعاسىندا ءومىر ءسۇرىپ جاتقانىمىزدى بىلدىرەدى.

ورىسسىزدانۋ جولىن تاڭداعان تاۋەلسىز ۋكراينانىڭ ءار كەزەك باسشىلارى اقپاراتتىق قاۋىپسىزدىككە اسا ءمان بەردى. كرەملدىڭ ورىس ءتىلىن بۇرىنعى كەڭەس قۇرامىندا بولعان رەسپۋبليكالاردى قايتا قۇرىقتاۋ قۇرالىنا اينالدىرعانىن جاقسى ءتۇسىندى. رەسەي ارنالارىن شەكتەپ، ۋكراينا تىلىنە باسىمدىق بەردى. مادەني سالادان باستالعان ساياسي كۇرەس قارقىن العاندا كىمنىڭ كىم ەكەنى ايپاراداي اشىلدى. ءار سالاداعى رەسەيشىل توپتاردىڭ ۇلكەن لەگى بەلگىلى بولدى. سوعىسقا دەيىن ولار دەموكراتيالىق جۇيەنىڭ مومىندىعىن پايدالانىپ، جىمىسقى ارەكەتتەرىن جالعاستىرىپ كەلدى. سوعىس باستالعان سوڭ ولاردىڭ بەتپەردەسى ايپاراداي بولدى. ءپۋتيننىڭ اتالمىش قۋىرشاق ۇكىمەتىنىڭ جوعارى لاۋازىمىنان دامەلىلەردىڭ ءۇمىتى ءبىر جولا كەسىلدى. زەلەنسكي بيلىگى سىرتقى جاۋدان بۇرىن، ىشتەگى ساتقىندارمەن كۇرەسۋگە ءماجبۇر بولدى. العاشقى كەلىسسوز كەزىندە-اق، ۋكراين تارابىنىڭ كەلىسسوز جوسپارىن كرەملگە ءبىرىن قالدىرماي جەتكىزىپ وتىرعان لاۋازىمدى تۇلعا انىقتالىپ، جازاسىن الدى.

ءسوز بوستاندىعىن باستى ورىنعا قوياتىن باتىس جۇرتى ىشكە-سىرتقا ەكى باعىتتا جۇمىس ىستەيتىن كرەملدىڭ اقپاراتتىق ۇگىت ماشيناسىنىڭ ءبىر جىل بويى سوعىس شىندىعىن بۇركەمەلەگەنىنە، حالىقتىڭ ميىن شايۋ قۋاتىنىڭ شەكسىزدىگىنە تاڭ قالىپ باستارىن شايقاپ وتىر. ازامات ابىلداەۆتىڭ مىسالى دا سونى كورسەتەدى. ءوز ىشىمىزدەگى ورىسقا قاراپ ۇليتىنداردىڭ ءۇنىن ءوشىرىپ، ساباق الامىز دەسەك، وسى باستان اقپاراتتىق قاۋىپسىزدىكتى دەرەۋ قولعا الىپ، قاتاڭ شارالار قابىلداۋ كەرەك. اسىرەسە جاستاردى كرەملدىڭ ۇگىت ماشيناسىنىڭ اسەرىنەن ساقتاۋدى باستى نازاردا ۇستاۋ كەرەك.

Abai.kz