LRT جوباسى كەلەسى جىلى اياقتالادى. بۇل تۋرالى حابار 24 ارناسىنداعى «President» باعدارلاماسىندا ەلوردا اكىمى جەڭىس قاسىمبەك ايتتى.

جەڭىس قاسىمبەكتىڭ سوزىنشە، جەرۇستى مەتروپوليتەنىنىڭ قۇرىلىسىن اياقتاۋ جۇمىسى وتكەن جىلى باستالعان.

ەندى قالعان بارلىق شارۋا كەلەر جىلدىڭ سوڭىندا اياقتالادى.

«وتكەن جىلى ۇكىمەت العاشقى قارجىنى بەردى. بيىل بۇل نىسان قۇرىلىسى بەلسەندى جۇرەدى. قازىر جۇمىستى پىسىقتاپ، تەحنيكا بويىنشا، وسى لرت-دا جۇمىس ىستەيتىن پويىزدار بويىنشا اۆانستىق تولەمدەر ءجۇرىپ جاتىر. جوبا 2023-2024 جىل ىشىندە جۇزەگە اسىرىلىپ، كەلەسى جىلدىڭ سوڭىنا دەيىن ىسكە قوسىلۋى ءتيىس دەپ جوسپارلانعان»، - دەدى شاھار باسشىسى جەڭىس قاسىمبەك.

ەسكە سالا كەتەيىك، قاڭتارداعى مەملەكەت باسشىسى قاسىم-جومارت توقاەۆتىڭ توراعالىعىمەن ەلوردانى دامىتۋ ماسەلەلەرى جونىندەگى كەڭەستە LRT جوباسى ءسوز بولدى.

پرەزيدەنتتىڭ ايتۋىنشا، LRT جوباسى قاتە بولدى، بىراق ونى توقتاتساق، شىعىن ودان دا كوپ بولادى.

ەلورداداعى LRT قۇرىلىسى 2019 جىلى ساۋىردە توقتاتىلعان بولاتىن.

2020 جىلدىڭ قاڭتارىندا LRT-عا قاتىستى ءىستى تەرگەۋ شارالارى اياقتالدى. سول جىلى قازاندا ءىس سوت قاراۋىنا جولداندى.

سونداي-اق، بىلتىر 13 تامىزدا استانا پروكۋراتۋراسى ەلوردا اكىمىنىڭ بۇرىنعى ورىنباسارى قانات سۇلتانبەكوۆ پەن «استانا LRT» جشس باسقارما توراعاسى تالعات اردانعا قاتىستى قىلمىستىق ءىستىڭ سوتقا جولدانعانىن حابارلادى. اتالعان ەكى كۇدىكتى قازىرگى ۋاقىتتا قىلمىستىق قۋدالاۋدان بوي تاسالاپ ءجۇر.

Abai.kz