«بايتاق» جاسىلدار پارتياسى مەن Respublica پارتياسى بىرقاتار وڭىردە ءماسليحات دەپۋتاتتارىن سايلاۋعا قاتىسادى. بۇل تۋرالى بۇگىن ورتالىق سايلاۋ كوميسسياسىنىڭ وتىرىسىندا ايتىلدى.

«قازاقستاننىڭ «بايتاق» جاسىلدار پارتياسى 2023 جىلعى 21 قاڭتارداعى قاۋلىمەن ءماسليحات دەپۋتاتتارىن سايلاۋعا تەك ءۇش وبلىسقا عانا جىبەرىلدى. قازىرگى ۋاقىتتا پارتيا فيليالدارى بىرقاتار باسقا وبلىستاردا جانە الماتى، شىمكەنت پەن استانا قالالارىندا قۇرىلدى. Respublica پارتياسى دا قازىرگى ۋاقىتتا وزدەرىنىڭ فيليالدارىن قۇرعان ايماقتاردا عانا ءماسليحات دەپۋتاتتارىن سايلاۋعا جىبەرىلەدى. وسىعان وراي «قازاقستاننىڭ «بايتاق» جاسىلدار پارتياسىن» اقتوبە، الماتى، باتىس قازاقستان، جامبىل، قوستاناي، ماڭعىستاۋ، پاۆلودار، تۇركىستان، شىعىس قازاقستان وبلىستارىنىڭ، الماتى، شىمكەنت جانە استانا قالالارىنىڭ بارلىق دەڭگەيدەگى ءماسليحاتتارىنىڭ دەپۋتاتتارىن سايلاۋعا قاتىسۋعا جىبەرۋدىڭ كەيبىر ماسەلەلەرى تۋرالى قاۋلىنى، Respublica پارتياسىنىڭ اباي، اقمولا، اقتوبە، الماتى، باتىس قازاقستان، جامبىل، جەتىسۋ، قارعاندى، قوستاناي، قىزىلوردا، ماڭعىستاۋ، پاۆلودار، سولتۇستىك قازاقستان، تۇركىستان، ۇلىتاۋ، شىعىس قازاقستان وبلىستارىنىڭ، الماتى، شىمكەنت جانە استانا قالالارىنىڭ بارلىق دەڭگەيدەگى ءماسليحاتتارىنىڭ دەپۋتاتتارىن سايلاۋعا قاتىسۋعا جىبەرۋ تۋرالى قاۋلىنى قابىلداۋ ۇسىنىلادى»، - دەدى وسك وتىرىسىندا كوميسسيا مۇشەسى شاۆكات وتەمىسوۆ.

ءماسليحاتتار دەپۋتاتتىعىنا كانديداتتار تىزىمدەرىن ۇسىنۋ كەزەڭى 8 اقپان كەشكى ساعات 18-00-دە اياقتالادى.

Abai.kz