قىزىلوردا وبلىسىنىڭ اكىمى 5 مىڭ ستۋدەنتتىڭ گازەتكە جازىلۋىنا سۋبسيديا بولمەك. بۇل تۋرالى استانادا وڭىرلىك مەرزىمدى باسىلىمدار فورۋمىندا «سىر مەديا» جشس باس ديرەكتورى امانجول وڭعارباەۆ مالىمدەدى.

استانادا ءوتىپ جاتقان وڭىرلىك مەرزىمدى باسىلىمداردىڭ العاشقى فورۋمىنا ەلىمىزدىڭ ءار وڭىرىنەن 200-دەن استام دەلەگات قاتىسىپ جاتىر. سونىڭ اياسىندا ءتۇرلى سەسسيالار، ماستەر-كلاسستار، تاعىلىمدى تالقىلار ۇيىمداستىرىلۋدا.

"ايماقتاعى باسىلىمداردى قارجىلاندىرۋ تەتىگى مەن ەرەجەلەرىن قايتا قاراستىرىپ جاتىرمىز. باق-قا بەرىلەتىن مەملەكەتتىك تاپسىرىستىڭ تالاپتارىن جەڭىلدەتۋگە مۇددەلىمىز. اتاپ ايتقاندا، جەرگىلىكتى باق-تى قولداۋ تاريفتەرى 2019 جىلدان بەرى وزگەرمەگەنى بەلگىلى. سوعان بايلانىستى ءبىز تاريفتەردى ۇلعايتۋدى جوسپارلاپ وتىرمىز. بۇل شارالار جوبالىق تاسىلدە وڭىرلىك مەملەكەتتىك اقپاراتتىق تاپسىرىستى قالىپتاستىرۋعا مۇمكىندىك بەرەدى. سونداي-اق جەرگىلىكتى باق-قا جاڭا سەرپىن بەرىپ، وڭ اسەر ەتەدى دەگەن ۇمىتتەمىز»، - دەدى اقپارات جانە قوعامدىق دامۋ ءمينيسترى دارحان قىدىرالى.

مينيستر وڭىرلىك مەرزىمدى باسىلىمداردىڭ جاعدايىنا ناقتى عىلىمي زەرتتەۋ جاسالۋ كەرەكتىگىن ايتتى. سونىمەن قاتار، دارحان قۋاندىقۇلى گازەت باسۋ، تاراتۋ ىسىندە، اۋداندىق باسىلىمدارىن جاڭا مەدياعا بەيىمدەۋدە قىزىلوردا وبلىسىنداعى “سىر مەديا” سەرىكتەستىگى جۇيەلى جۇمىس اتقارىپ وتىرعانىن اتاپ ءوتتى.

«سىر مەديا» جشس باس ديرەكتورى امانجول وڭعارباەۆتىڭ ايتۋىنشا، جاستار گازەت وقۋدان، رۋحانياتتان الشاقتاپ بارا جاتقان زاماندا قىزىلوردا وبلىسىنىڭ اكىمى نۇرلىبەك نالىباەۆ تىڭ باستامانى قولعا الماق. ياعني، 5 مىڭ ستۋدەنتتىڭ مەرزىمدى باسىلىمدارعا جازىلۋىنا رەسپۋبليكادا العاش بولىپ سۋبسيديا ءبولۋدى قاراستىرىپ جاتىر.

«مۇنى جاستارعا جاساعان جاناشىرلىعى ءارى ەلدىك مۇددەنى تۋ ەتكەن مەرزىمدى باسىلىمدارعا كورسەتكەن قولداۋى دەپ ءتۇسىنۋ كەرەك. قازىرگى تاڭدا سىر وڭىرىندەگى جوعارى وقۋ ورىندارىندا 15 مىڭنان استام ستۋدەنت، كوللەدجدەردە 20 مىڭنىڭ ۇستىندە ستۋدەنت وقيدى. سولاردىڭ اراسىنان ىقىلاس تانىتقان جاستارعا تەگىن گازەتكە جازىپ بەرۋ مۇمكىندىگى قاراستىرىلاتىن بولادى»، - دەدى امانجول ساقىپۇلى.

Abai.kz