سەنبى, 10 ماۋسىم 2023
ايقاي 2222 0 پىكىر 19 قاڭتار, 2023 ساعات 13:27

ءپۋتينشىل دەپۋتات پارتيادان شىعارىلدى

ءماجىلىس دەپۋتاتى ازامات ابىلداەۆتىڭ "ازاتتىق" راديوسىنا بەرگەن سۇحباتى ەل اراسىندا قىزۋ تالقى بولۋدا. ول سۇحبات بارىسىندا ءپۋتيننىڭ ۋكرايناعا اشقان سوعىسىن اشىق قولدايتىنىن جاسىرمادى. 

“مەن رەسەي پرەزيدەنتىن قولدايمىن. وسى جازعا دەيىن زەلەنسكيدى ءوز حالقى ۇستاپ، سوتقا بەرەدى دەپ ويلايمىن. مەن ۋكرايناداعى ارنايى وپەراتسيانى قولدايمىن. سوعىستان قاشىپ قۇتىلۋ مۇمكىن ەمەس ەدى، ال ۋكراينا بيلىگىندە ناتسيستەر وتىر”، - دەدى ول.

بۇل قازاق ينتەرنەت سەگمەنتىن ءدۇر سىلكىندىردى. دەپۋتات "اق جول" پارتياسىنان بولعاندىقتان، تىلشىلەر پارتيا توراعاسى ازات پەرۋاشەۆتىڭ پىكىرىن ءبىلدى. “مەن بۇل تۋرالى بىلمەيمىن. ول ونىڭ جەكە پىكىرى. ءبىزدىڭ پارتيا سوعىستى قولدامايدى”,- دەدى ازات پەرۋاشەۆ.

ارتىنشا ازات پەرۋاشەۆ ءوزىنىڭ تەلەگرام ارناسىندا كەلەسىدەي مالىمدەمە جاسادى: "دەپۋتات ا.ابىلداەۆتىڭ ماسەلەسى ەرتەڭ پارتيانىڭ ۇلتتىق كەڭەسىندە قارالادى. 

1. ا.ابىلداەۆتىڭ سوزدەرى “اق جول” پارتياسىنىڭ پوزيتسياسىنا قاراما-قايشى جانە سونىمەن قاتار پارتيالىق جانە دە دەپۋتاتتىق ەتيكانى دا بۇزىپ تۇر.

2. “اق جول” پارتياسى قاشان دا رەسپۋبليكامىزدىڭ جانە باسقا دا دوس مەملەكەتتەردىڭ تاۋەلسىزدىگى مەن جەر تۇتاستىعىن قۇرمەتتەيدى جانە قولدايدى.

3. دەپۋتاتتاردىڭ تارتىپتىك ماسەلەسىن قاراستىرۋ پارتيانىڭ ۇلتتىق كەڭەسىنىڭ قۇزىرەتىنە كىرەتىندىكتەن، دەپۋتات ا.ابىلداەۆتىڭ سوزدەرىنە ساياسي باعا بەرۋ جانە ماسەلەسىن قاراۋ ءۇشىن ەرتەڭ پارتيانىڭ ۇلتتىق كەڭەسىنىڭ پلەنۋمى شاقىرىلۋدا", - دەدى.

بۇگىن پارتيانىڭ ۇلتتىق كەڭەسىنىڭ پلەنۋمى ءوتتى. دەپۋتاتتىڭ ماسەلەسى پلەنۋم بارىسىندا قارالدى. ول بويىنشا پارتيا ءوزىنىڭ رەسمي سايتىندا كەلەسىدەي اقپارات جاريالادى:

"اق جول" دەموكراتيالىق پارتياسى ۇلتتىق كەڭەسى ءماجىلىس دەپۋتاتى ا.ابىلداەۆتىڭ ماسەلەسىن قارادى.

بۇگىن 2023 جىلى 19 قاڭتاردا "اق جول" دەموكراتيالىق پارتياسى ۇلتتىق كەڭەسىنىڭ پلەنۋمى ءوتتى.

پارتيا توراعاسى ازات پەرۋاشەۆتىڭ توراعالىعىمەن وتكەن جيىندا ءماجىلىس دەپۋتاتى ا.ابىلداەۆتىڭ جۋرناليستكە بەرگەن سۇحباتىندا ۋكرايناداعى سوعىس تۋرالى ايتقان سوزدەرى سارالانىپ، ءتيىستى ساياسي باعا بەرىلدى.
ۇلتتىق كەڭەس مۇشەلەرى ا.ابىلداەۆتىڭ سوزدەرى “اق جول” پارتياسىنىڭ پوزيتسياسىنا قاراما-قايشى ەكەنىنە، پارتيالىق جانە دەپۋتاتتىق ەتيكانى دا بۇزعانىنا باسا نازار اۋداردى.

اتاپ ءوتۋ كەرەك، كەشە پارتيا پرەزيديۋمى حابارلاعانداي، “اق جول” پارتياسى قاشان دا رەسپۋبليكامىزدىڭ جانە باسقا دا دوس مەملەكەتتەردىڭ تاۋەلسىزدىگى مەن جەر تۇتاستىعىن قۇرمەتتەيدى جانە قولدايدى.

ۇلتتىق كەڭەس:
1. ا.ابىلداەۆتى "اق جول" دەموكراتيالىق پارتياسىنان شىعارۋ تۋرالى شەشىم قابىلدادى.

2. "اق جول" دەموكراتيالىق پارتياسىنان شىعارىلعانىنا بايلانىستى
ا.ابىلداەۆتىڭ دەپۋتاتتىق مانداتىن توقتاتۋ تۋرالى «اق جول» پارتياسى ورتالىق سايلاۋ كوميسسياسىنا حات جولدادى.

Abai.kz

 

0 پىكىر