ۋكراينا اسكەرى رەسەيدىڭ "ەنگەلس" اۋەجايىنا درونمەن سوققى جاساپ، ءۇش ادام قازا تاپتى. بۇل اقپاراتتى رەسەي قورعانىس ءمينيسترى دە راستادى. 

"ەنگەلس" اۋەجايىنا ءبىر ايدىڭ ىشىندە ەكىنشى مارتە سوققى جاسالدى. دۇيسەنبىگە قاراعان ءتۇنى الەۋمەتتىك جەلىدە ساراتوۆ وبلىسىنىڭ، "ەنگەلس" اۋەجايىندا جويقىن جارىلىس بولعانى جايلى اقپارات تارادى. و باستا جەرگىلىكتى بيلىك بۇل اقپاراتتى جوققا شىعارىپ، جالعان ماعلۇمات بەرەتىندەردى سوتقا تارتاتىنىن ەسكەرتتى. ارتىنشا وبلىس حالقىنا ەش قاۋىپ جوق ەكەنىن ايتىپ، اسكەري اۋەجايداعى جارىلىستى ماماندار زەرتتەپ جاتقانىن جەتكىزدى.

ەستەرىڭىزدە بولسا، بۇل اۋەجايدا رەسەيدىڭ ستارتەگيالىق بومبالاۋشى ۇشاقتارى سانالاتىن تۋ-160 جانە تۋ-95مس ورنالاسقان. وقيعاعا بايلانىستى رەسەي قورعانىس ءمينيسترى رەسمي مالىمدەمە جاساپ، بىلاي دەدى: "26 جەلتوقسان، ماسكەۋ ۋاقىتى بويىنشا 01:35-تە رەسەي اۋە قورعانىس كۇشتەرى ساراتوۆ وبلىسى، ەنگەلس اۋەجايىنا جاقىن قاشىقتىقتا ۇشىپ كەلە جاتقان ۋكراين درونىن جويدى". كەيىن رەسەيلىك ارنالار "درون قالدىقتارى اۋەجايعا قۇلاپ، ءۇش ادام اۋىر جاراقات الىپ، كوز جۇمدى" دەدى. رەسەيلىك اسكەريلەردىڭ ايتۋىنشا اۋەجايداعى ۇشاقتار مەن تىكۇشاقتارعا زاقىم كەلمەگەن.

بۇل ءبىرىنشى شابۋىل ەمەس. 5-جەلتوقسان كۇنى ۋكراينا رەسەيدىڭ ريازان جانە ساراتوۆ وبلىسىنداعى ەكى ستراتەگيالىق ماڭىزعا يە اۋەجايلارعا سوققى جاسادى. سوققى جاساۋعا كەڭەستىك "ستريج" جانە "رەيس" ءوزۇشارلارىن قولدانعان. ريازان ماڭىنداعى دياگيلەۆ اۋەجايىندا سوققىدان ءۇش رەسەيلىك سارباز كوز جۇمعان بولاتىن. اراعا جيىرما كۇن سالىپ، تاعى دا سوققى جاسالدى.

ۋكراينا اسكەرى "اۋەجايعا سوققىنى ءبىز جاسامادىق" دەيدى. ولار "رەسەي اسكەرىنە تىيىم سالىنعان اۋماقتا شىلىم شەگۋدى دوعارۋ قاجەت" دەپ كەڭەس ايتتى. باتىستىق ساراپشىلار شابۋىلداردى كيەۆ ىسكە اسىردى، ارنايى جاساق بىرنەشە اپتا شابۋىلدى ىسكە اسىرۋ جولىن ويلاستىرعان دەيدى. 26-جەلتوقسان كۇنى ۋكراينانىڭ سوققى جاساۋشى درونى شابۋىل جاساعان دەگەن دە اقپارات بار. ال رەسەي پۆو-سى تاعى دا ستراتەگيالىق ماڭىزدى نىساندى ءتيىستى دارەجەدە قورعاي المادى.

كا مىرزا

Abai.kz