دجەيمس كامەروننىڭ الەم جۇرتى كوپتەن ەلەڭدەي كۇتكەن كەزەكتى تۋىندىسى كورەرمەنگە جول تارتتى. “اۆاتار: سۋ جولى” ءفيلمنىڭ قازاقشا دىبىستالعان نۇسقاسىن كوردىك. ۇلكەن ەڭبەك. باسى-قاسىندا جۇرگەندەردىڭ قازاق دۋبلياجىن جاڭا دەڭگەيگە كوتەرۋگە تىرىسقاندارى بايقالادى.

ءتىلى جاتىق، ۇلتتىق قابىلداۋعا ۇيلەسىمدى. وسى قالپىمەن ىلگەرلەي بەرسە، دامۋ بولماق. يگى ىسكە مۇرىندىق بولىپ جۇرگەن مادەنيەت جانە سپورت مينيسترلىگى جاقسى ءداستۇردى ارى قاراي جالعاستىرامىز دەپ وتىر.

ەندى انا تىلىمىزدەگى كورسەتىلىمىنە ءبارىمىز بارىپ، سۇرانىس بار ەكەنىن كورسەتسەك جاقسى بولار ەدى. ءتيىمسىز ۋاقىتقا قويىلعانى تۋرالى دا ايتىلىپ جاتىر. ەگەر ونداي ماسەلە بولسا، زاڭدىق يا قوعامنىڭ بەلسەندىلىگى ارقىلى رەتتەۋگە بولادى دەپ ويلايمىن.

كارتينانى ارنايى بارىپ كورىپ، اسەردى سەزىنۋدىڭ وزىندىك ءلاززاتى بار. بيۋدجەتى ەڭ قىمبات تۋىندىنىڭ ءبىرى. ساللي وتباسىنىڭ باسىنان كەشكەندەرى تۋرالى ەپيكالىق عىلىمي فانتاستيكالىق فيلمنەن جاڭا انيماتسيالىق قۇرالداردىڭ اسەرى مەن ۆيزۋالدىق ەففەكتىلەر بىردەن بايقالادى.

تۇيگەنىمىز: وركەنيەتتەر قاقتىعىسى، رەسۋرس ءۇشىن كۇرەس. جاڭا ءورىس ىزدەگەن اگرەسسورلاردىڭ وزگە جەرلەرگە كوز الارتىپ، وزبىرلىق جاساپ، وتارلاۋعا ۇمتىلۋىنىڭ سوڭى باسقىنشىلاردىڭ كومۋسىز قالۋىنا اكەلەدى. تابيعات پەن ادام ۇيلەسىمدى ءومىر ءسۇرىپ جاتقان ورتادا اگرەسسورلارمەن كۇرەسكە شىققان جەرگىلىكتى تايپالارعا تابيعات تا، حايۋانات تا كومەككە كەلەدى... تۋعان جەر قاشان دا تىرەك.

الدا دەمالىس كۇندەرى. قازاقشا دۋبلياجدى نۇسقاسىنا بارايىق، شىققانىن اينالامىزعا ايتا جۇرەيىك. وتارلاۋدان قالعان جارانى جازۋ ءۇشىن كۇرەسىمىزدىڭ ءبىر امالى وسى بولسىن!

ەرجان تولەك

Abai.kz