بەيسەنبى, 28 ناۋرىز 2024
جانايقاي 2212 12 پىكىر 13 جەلتوقسان, 2022 ساعات 13:02

بوروداۆكينگە نە دەپ وكپەلەيمىز؟..

انا ءتىلىمىز جايلى از ايتىپ جۇرگەن جوقپىز. الايدا ونى ءارتۇرلى پيعىلى جامان، نيەتى دۇرىس ەمەس جانداردان جاپپاي قورعاۋعا كەلگەندە مۇلدە ەنجارلىق تانىتاتىن سەكىلدىمىز.

وتكەندە راميل مۋحورياپوۆ دەگەن بايشىكەش ورىسشا سۇراعانعا قازاقشا جاۋاپ بەرۋ مادەنيەتسىزدىك قانا ەمەس، ونى ۇلتشىلدىقتىڭ كورىنىسىنە جاتقىزعان. ول ءبىراز شۋ تۋدىرىپ، جاڭاعى پىسىقاي قازاقتاردان كەشىرىم سۇراپ، قۇتىلىپ كەتەمىن دەگەن قۋلىعى جۇزەگە اسپاي، ءبىراز داۋدىڭ استىندا قالدى. حالىق ونى جاۋاپقا تارتۋدى تالاپ ەتتى. وبالى نە، پروكۋراتۋرا ونىڭ ۇستىنەن ءىس قوزعادى. الايدا، ءبىر وكىنىشتىسى، بىزدەگى قالىپتاسقان ادەتتەگىدەي سوزبۇيداعا سالۋ اۋرۋى باستالىپ كەتسىن.

«الدىمەن ونىڭ ايتقان سوزدەرىنە تەرەڭ فيلولوگيالىق ساراپتاما جاسايمىز، سوسىن قاتىرامىز»، - دەپ ءبىراز جەلپىنگەن. بار باتىرلىعى وسىدان اسپاپتى. سودان بەرى بۇل ىستەن ەش حابار جوق. ءسىرا، «ساراپتاما جاسايمىز» دەگەنى ءبىزدى الداۋ ءۇشىن سىرت كوزگە جاساعان قۋلىقتارى بولسا كەرەك. ايتپەسە، اسا تەرەڭ وبرازدى ءسوز ەمەس، ناقتى ايتىلعان ايىپتاۋدى دالەلدەۋ ءۇشىن ايلاپ ساراپتاما جاساۋ دەگەن كۇلكىلى اڭگىمە ەمەس پە؟ «ۇلتشىلدىقتىڭ كورىنىسى» دەگەندى باسقاشا قالاي ۇعۋعا بولادى؟ الدە «بۇل سوزىمەن ول بوتەن بىردەڭە ايتقىسى كەلدى» دەگەن تۇجىرىمدى ويلاپ تابۋعا تىرىسىپ جاتىر ما ەكەن؟

قانشا دەگەنمەن، بۇل مۋحورياپوۆىڭىز كوشەدە جۇرگەن بىرەۋ ەمەس، ءبىزدىڭ موينىمىزعا باياعىدا-اق ءمىنىپ العان مىقتى بيزنەس ەليتانىڭ وكىلى. ول سەنىڭ اناۋ-مىناۋ قالجىڭىڭدى كوتەرمەيدى. وندايلارمەن تىم سىپايى ءارى اسا مادەنيەتتى سويلەسۋ كەرەك. ايتپەسە، قاتتى رەنجىپ قالۋى مۇمكىن. قازىرگى ءبىزدىڭ قوعامدا اقشاسى بار الىپ تا جىعادى، شالىپ تا جىعادى.

ايتپاقشى، ءبىزدىڭ پروكۋراتۋرا كەرەك كەزىندە، اسىرەسە، ءوزىمىزدىڭ ۇلتجاندى ازاماتتارىمىزعا كەلگەندە وتە جەدەل قيمىلدايدى. وسىدان بىرەر اي بۇرىن سوعىستان باس ساۋعالاپ، ءوز وتانىنان وسىندا قاشقان ورىستاردان پەتروپاۆلدىق قۇزايىروۆ دەگەن جاس بلوگەر: «قالاي ويلايسىزدار، قىرىم قاي ەلدىكى؟» دەپ سۇراعانى ءۇشىن عانا ءدال سول مەزەتتە ءاي-شايعا قاراماستان، جەدەل ۇستاپ اكەتىپ، «ۇلتارالىق قاتىناسقا قاتتى زيان كەلتىردى» دەگەن ايىپتى موينىنا جەدەل ءىلىپ، كوزىن بوزارتىپ، بەس تاۋلىككە قاماپ تاستاعانى بار.

ال مۋحورياپوۆتىڭ مۇرتى قيسايماستان، ءبىزدىڭ زاڭىمىزدان دا، وزىمىزدەن دە ەش قىمسىنباستان شىرت-شىرت تۇكىرىپ، كەۋدەسىمەن اسپان تىرەپ ءجۇرىپ جاتقان جايى بار. ال وسىناۋ ماسقارا جايدى پروكۋراتۋرا ورىندارىنىڭ ەسىنە قايتا-قايتا ءتۇسىرىپ، زاڭ الدىندا نەگە جاۋاپ بەرمەيتىندىگىن تالاپ ەتىپ جۇرگەن كىم بار؟

مىنە، ءوز ەلىمىزدەگى وسىنداي باسسىزدىقتى كورگەننەن كەيىن، رەسەيدىڭ ەلشىسى بوروداۆكين دەگەندەر قايدان ەسىرمەسىن؟ وعان ءتىپتى، وكپەلەۋدىڭ ءوزى ورىنسىز سەكىلدى. ءبىز بىرەۋگە اقىل ايتۋدان بۇرىن ءوز ەلىمىزدە ءتارتىپ ورناتىپ الايىق. ايتپەسە ىشكى جاۋدىڭ دا، سىرتقى جاۋدىڭ دا باسقا سەكىرەتىندىگىنە تاڭ قالۋعا بولماس.

ساق بولايىق، بىرگە بولايىق، اعايىن!

ايتپاقشى، ءبىزدىڭ مىقتىلاردىڭ كەي ىستەردە ەرەكشە جىلدامدىق تانىتاتىندىعىن قايتەرسىڭ. جاقىندا رەسەيدىڭ جيلين دەگەن وفيتسەرى: «مەن ۋكراين حالقىن قىراتىن باسقىنشىلىق سوعىسقا قارسىمىن جانە مۇنداي ارانداتۋشىلىققا قاتىسپايمىن» دەپ ايەلىمەن ءبىزدىڭ ەلگە قاشىپ كەلىپتى. ءسىرا، ءبىزدىڭ ەلدى پانا تۇتقىسى كەلگەن بولار. الايدا ورىستىڭ وسى ءبىر ادال وفيتسەرىنىڭ ءۇمىتى اقتالمادى. ونى بىزدەگىلەر تەز ارادا تۇتقىنداپ، قاشقىن رەتىندە قايتادان رەسەيگە ۇستاپ بەردى. ءپۋتيننىڭ مۇندايلاردى ايامايتىندىعىن ەسكەرسەك، ەندى ول بايعۇس ونداعان جىلدار بويعى ءومىرىن تەمىر توردىڭ ار جاعىندا وتكىزەتىندىگىنە كۇمان بولماس. ءيا، بىزدەگى جاعداي وسىنداي ەندى.

جايبەرگەن بولاتوۆ

Abai.kz

12 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2253
عيبىرات

قايسار رۋحتى عازيز جان

مۇحتار قۇل-مۇحاممەد 3518