قاسىم-جومارت توقاەۆقا باتىس قازاقستان وبلىسىنىڭ اكىمى ناريمان تورەعاليەۆ ءوڭىردىڭ بيىلعى الەۋمەتتىك-ەكونوميكالىق دامۋىنىڭ نەگىزگى كورسەتكىشتەرى تۋرالى باياندادى. سونداي-اق، ينۆەستيتسيالىق جوبالاردىڭ جانە جۇمىسپەن قامتۋ جول كارتاسىنىڭ جۇزەگە اسىرىلۋ بارىسى تۋرالى مالىمەت بەرىلدى.

پرەزيدەنتتىڭ قابىلداۋىندا بولعان پاۆلودار وبلىسىنىڭ اكىمى اسايىن بايحانوۆ ەكىباستۇز جەس-ءىنىڭ جىلۋ جەلىلەرىندەگى اپاتتىڭ سالدارىن جويۋعا باعىتتالعان شارالار جونىندە ەسەپ بەردى. ونىڭ ايتۋىنشا، ەكىباستۇز قالاسىنىڭ جىلۋ جۇيەسىن قالپىنا كەلتىرۋ جۇمىستارى 15 جەلتوقسانعا دەيىن اياقتالادى. كەزدەسۋدە وبلىستىڭ نەگىزگى الەۋمەتتىك-ەكونوميكالىق كورسەتكىشتەرى جانە اۋىل شارۋاشىلىعىن دامىتۋ، اۋىل حالقىن ساپالى اۋىزسۋمەن قامتاماسىز ەتۋ، كولىك ينفراقۇرىلىمى مەن تۇرعىن ءۇي قۇرىلىسىن دامىتۋ جونىندەگى تاپسىرمالاردىڭ ورىندالۋ بارىسى باياندالدى.

بۇدان كەيىن مەملەكەت باسشىسىنىڭ قابىلداۋىندا سولتۇستىك قازاقستان وبلىسىنىڭ اكىمى ايداربەك ساپاروۆ بولدى. ول ءوڭىردى دامىتۋ جوسپارى مەن بەرىلگەن تاپسىرمالاردىڭ ورىندالۋى جونىندە مالىمەت بەردى.

قاسىم-جومارت توقاەۆقا قۇمار اقساقالوۆ قوستاناي وبلىسىنىڭ قازىرگى الەۋمەتتىك-ەكونوميكالىق دامۋىنىڭ نەگىزگى كورسەتكىشتەرى تۋرالى ەسەپ بەرىپ، وڭىردەگى الەۋمەتتىك-ەكونوميكالىق ءوسىم مەن ينۆەستيتسيا تارتۋ جونىندە باياندادى. سونىمەن قاتار، اكىم پرەزيدەنتكە قوستانايدا وتەتىن ءحىح وڭىرارالىق فورۋمعا دايىندىقتىڭ باستالعانىن جەتكىزدى.

مەملەكەت باسشىسى جاڭادان تاعايىندالعان وبلىستاردىڭ اكىمدەرىنە وڭىرلەردى دامىتۋ جانە تۇرعىنداردىڭ ءال-اۋقاتىن ارتتىرۋ جونىندە بىرقاتار ناقتى تاپسىرما بەردى. سونداي-اق، اۋىل شارۋاشىلىعىنا جان-جاقتى قولداۋ كورسەتۋ ارقىلى اۋىلداردىڭ وركەندەۋىن قامتاماسىز ەتۋدى، ينفراقۇرىلىمداردى جاڭعىرتىپ، كولىك-لوگيستيكالىق احۋالدى جاقسارتۋدى تاپسىردى.

Abai.kz