بۇگىن پارلامەنت سەناتىنىڭ جالپى وتىرىسىندا جوعارى اۋديتورلىق پالاتانىڭ مۇشەلەرى تاعايىندالدى.

سەنات توراعاسى ماۋلەن اشىمباەۆ مەملەكەت باسشىسى كونستيتۋتسيالىق رەفورمالاردى ىسكە اسىرۋ ءۇشىن جاقىندا جوعارى اۋديتورلىق پالاتانىڭ ەرەجەسىن بەكىتكەنىن، اتالعان پالاتانىڭ توراعاسىن تاعايىنداعانىن ەسكە سالدى. قازاقستان رەسپۋبليكاسى كونستيتۋتسياسىنا سايكەس، پارلامەنتتىڭ ءار پالاتاسى جوعارى اۋديتورلىق پالاتانىڭ ءۇش مۇشەسىن بەس جىل مەرزىمگە قىزمەتكە تاعايىندايدى.

وسى ورايدا سەنات توراعاسى اتالعان قىزمەتتەرگە راشيت سايرانۇلى احمەتوۆتى، نۇرلان امانگەلدىۇلى نۇرجانوۆتى، راسۋل نۇرلانۇلى راحيموۆتى ۇسىندى. پالاتا دەپۋتاتتارى وسى ماسەلەنى قاراپ، اتالعان كانديداتۋرالاردى بەكىتتى.

ر. احمەتوۆ 1959 جىلى باتىس قازاقستان وبلىسىندا تۋعان. 2017 جىلعى ماۋسىمنان 2022 جىلعى ماۋسىمعا دەيىن رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ مۇشەسى بولدى.

ن. نۇرجانوۆ 1975 جىلى 8 ساۋىردە وڭتۇستىك قازاقستان وبلىسى سوزاق اۋدانىنىڭ شولاققورعان اۋىلىندا تۋعان. 2016 جىلعى 23 ماۋسىمنان قازىرگى ۋاقىتقا دەيىن رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ مۇشەسى قىزمەتىن اتقاردى.

ر. راحيموۆ 1978 جىلى 29 تامىزدا وسكەمەن قالاسىندا دۇنيەگە كەلگەن. 2021 جىلعى قىركۇيەكتەن باستاپ رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ مۇشەسى بولدى.

بۇدان بۇرىن حابارلانعانداي، 30 قاراشا كۇنى پارلامەنت ءماجىلىسى جوعارى اۋديتورلىق پالاتانىڭ ءۇش مۇشەسىن تاعايىندادى.

جاقىندا قازاقستان پرەزيدەنتى ناتاليا گودۋنوۆانى جوعارى اۋديتورلىق پالاتانىڭ توراعاسى لاۋازىمىنا تاعايىندادى.

Abai.kz