بەيسەنبى, 28 ناۋرىز 2024
46 - ءسوز 2601 7 پىكىر 30 قاراشا, 2022 ساعات 15:55

قۇلدىڭ ارمانى - قۇل ۇستاۋ!

 

ەكىباستۇزدىقتاردىڭ تىستەرى تىستەرىنە تيمەي، تۇنىمەن جاڭعاق شاعىپ جاتقاندارىنا اپتاعا اينالدى. وسى جاعدايعا بايلانىستى قازاق ۇكىمەتى تىپىرلاپ-اق جاتىر. تىپىرلاعانى سول - ۇكىمەتتەگىلەردىڭ ءبارى سانتەحنيك دادىميشاعا (دياديا ميشاعا) اينالىپ كەتكەندەي. ەستيتىنىمىز "جۇيەلەر ابدەن توزعان، كلەبانوۆ دەگەننىڭ مەنشىگىندەگى جىلۋ ورتالىعىنىڭ پالەن شاقىرىم قۇبىرى ءشىرىپ كەتكەن، جوندەۋگە كەلمەيدى" دەگەن سوزدەر عانا.

جۇتتىڭ جەتى اعايىندى ەكەندىگى راس ەكەن، قازىر ءبىر اينالدىرعان قىرسىق قازاقستاندى شىر اينالدىرىپ جاتىر. جاۋراعان ەكىباستۇز جۇرتىنا قاي كۇنى وسكەمەندىكتەر دە قوسىلدى. ول از بولعانداي استانانىڭ ىرگەسىندەگى كوكتال دەيتىن ەلدى مەكەننىڭ جۇرتى دا "ۇيدەن دالا جىلى" دەگەندى ايتىپ قالدى.

ءبىر قىزىعى، وسىنىڭ ءبارى ەل پرەزيدەنتى قاسىم-جومارت توقاەۆتى ۇلىقتاۋ ءراسىمى وتە سالىسىمەن ىلە-شالا باستالدى. سول ۇلىقتاۋ راسىمىندە سويلەگەن سوزىندە قاسىم-جومارت كەمەلۇلى "شەتەلگە كەتكەن اكتيۆتەر قايتارىلادى" دەگەنگە ەرەكشە ەكپىن ءتۇسىرىپ ايتقان. شەتەلدە كىمنىڭ اكتيۆى بار؟ ارينە، سەنىڭ، مەنىڭ شەتەل تۇگىلى نايەتى قازاقستان بانكتەرىندە باسى ارتىق 50 تەڭگەمىز جوق. شەتەلدەگى اكتيۆتەردىڭ ءبارى قازاقستاندى 30 جىل بيلەگەن ءىرىلى-ۇساقتى شونجارلاردىڭ "تابان اقى، ماڭداي تەرلەرى". وسىندايدا ەكىباستۇزداعى ورىن الىپ جاتقان توتەنشە جاعدايلاردىڭ ءبارى سول جۋانداردىڭ ديۆەرسياسى ەمەس پە ەكەن دەگەن دە ويعا قالادى ەكەنسىڭ. ويتكەنى ولار وزدەرى قۇرعان قازاقستاننىڭ تۇگەل ءشىرىپ جاتقانىن، سول شىرىكتەردى قىس اۋاسىندا قايسىسىن ءبىرىنشى كەزەكتە قولدانۋ كەرەگىن وتە جاقسى بىلەدى! ال، ول شىرىكتەردى ءتۇپ-تامىرىمەن جوق قىلۋى ءتيىس بيلىك بار بولعانى قانشا شاقىرىم قۇبىردىڭ جارامايتىنىن ەسەپتەپ اۋرە.
وسى اپتا كۇندە پارلامەنتتىڭ قوس پالاتاسىندا ءتىزىلىپ وتىرعان دەپۋتاتتاردىڭ وسى سالاعا جاۋاپتى مينيسترلىك باسشىسىن، پاۆلودار وبلىسى اكىمىن، ەكىباستۇز قالاسى اكىمىن، قىل اياعى كلەبانوۆتى شاقىرىپ الىپ جان القىمعا الىپ جاتقانىن كوردىڭىزدەر مە؟ نەمەسە باس پروكۋرورعا، سىبايلاس جەمقورلىققا قارسى كۇرەس سالاسى باسشىسىنا، ۇقك توراعاسىنا "ادامدارعا جاسالعان مىنا قىلمىس جازاسىز قالماي ما؟" دەپ سۇراۋ سالعانىن ەستىدىڭىزدەر مە؟

قازاقستاننىڭ جالعىز جىلۋ جۇيەلەرى عانا ءشىرىپ جاتسا، ءبىر قىسقا قوياننىڭ دا تەرىسى شىدار. الايدا، ءشىرىپ جاتقان سالا جالعىز كوممۋنالدىق سالا ەمەس قوي. جوعارىدان تومەنگە، تومەننەن جوعارىعا قاراي بارلىق جەردە پروبلەما. ال، سول پروبلەمالاردىڭ ۇلكەنى تىزگىننىڭ ناعىز ءوز ءىسىنىڭ ماماندارىنا بەرىلمەۋى. كىم كورىنگەننىڭ مينيستر، كىم كورىنگەننىڭ اكىم، كىم كورىنگەننىڭ سەناتور، ماجىلىسمەن بولا بەرەتىنى!

ءبىردى ايتىپ، بىرگە كەتتى دەمەڭىزدەر، الماتىدا دوسىم بار. شۇكىر، مالدى جىگىت. تاۋدىڭ قويناۋىن ءتورت تۇلىككە تولتىرىپ تاستاعان. سول دوسىمنىڭ بىردە "سەنەسىڭ بە، مەنىڭ قويشىلارىمنىڭ ءوزى قويشى ۇستايدى. جانە ولار مەندەي ەمەس، قويشىلارىنا وتە قاتال. ايامايدى. مەنىڭ قاتال بولا المايتىنىم باي بولعانىممەن مالدىڭ جاعدايىن، مۇنداعى شارۋانىڭ جاعدايىن ۇڭعىل-شۇڭعىلىنا دەيىن بىلە بەرمەيمىن. سوندىقتان ولار مەنى الداي الادى. ال، بۇلاردى قويشىلارى الداي المايدى. سەبەبى بۇلاردىڭ وزدەرى دە قويشى عوي، قويشىنى قويشى الداي الۋشى ما ەدى؟! ءبىر كۇنى وسىلار ءبىر-ءبىرىن ءولتىرىپ قويار ما ەكەن دەپ قورقامىن" دەگەنى بار ەدى.

وسى اڭگىمە مەنىڭ ويىما بۇگىنگى قازاقستاندى سالادى. ءبارى باستىق، بىراق، ناعىز ماماننىڭ قولىندا بيلىك جوق. تىرلىككە تاستايلىعىمەن ەمەس، ومىردەگى پىسىقايلىعىمەن وسكەن شەنەۋنىك ءبىرىنشى كەزەكتە جۇمىستى جۇرگىزۋدى ەمەس، ءوزىنىڭ ءسوزىن سويلەپ وتىراتىنداردى ىزدەيدى. بۇكىل ومىرلىك مۇراتى قۇل ۇستاۋ بولادى. ونداي قۇل تەز تابىلا كەتەدى. سوسىن ونى الەۋمەتتىك جەلىگە وتىرعىزىپ قويىپ، ءوزى بارعىسى كەلەتىن كرەسلودا وتىرعان شەنەۋنىكتى ۇرعىزادى. ارينە، اقىسىن جەمەيدى، ول قۇلىنا جاڭا كاستوم-شالبار كيگىزىپ، ۇلكەن جيىنداردىڭ تورىنە شىعارادى، ءتىپتى پرەزيدەنتتىڭ ۇلىقتاۋ راسىمىنە دەيىن اپارادى. قۇل ول جيىننىڭ ءمانىسىن تۇسىنبەسە دە ەلدىڭ يگى جاقسىلارىنىڭ قاتارىنا قوسىلعانىنا ءماز. سوراقىسى بۇل دا ەمەس، سوراقىسى - الگى قۇلدىڭ دا قۇل ۇستاعىسى كەلەتىنىندە! بۇل قۇل دا وزىنە قۇلدى تەز تابا قويادى. قۇلىنا الەۋمەتتىك جەلىدە ءوزىنىڭ ءسوزىن سويلەتىپ وتىرادى. ويتكەنى مۇنى جارىلقاپ جۇرگەن شەنەۋنىك-قۇلدىڭ دا، مۇنىڭ دا كورگەنى وسى-اق قوي. قۇلدىڭ ارمانى قاشاننان قۇل ۇستاۋ!

مىنە، قازاقستان ءوز ءىسىنىڭ ماماندارىنىڭ قولىندا ەمەس، نەگىزىنەن وسىندايلاردىڭ قولىندا. سوسىن جۇيە شىرىمەگەندە نە ىستەيدى؟! وسى بەتىمەن كەتە بەرسە، بۇگىن ەكىباستۇز بۇرسەڭ قاقسا، ەرتەڭ بۇكىل قازاقستان بۇرسەڭ قاعادى.

ەكىباستۇز - ەرتەڭىمىزدىڭ نە بولاتىنىنىڭ بەلگىسى! مەنىڭ تۇيگەنىم وسى بولدى.

اباي بالاجان

Abai.kz

7 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3530