سەنات سايلاۋى 14 قاڭتاردا وتەدى. بۇل تۋرالى وسك توراعاسىنىڭ ورىنباسارى كونستانتين پەتروۆ ايتتى.

«سەنات دەپۋتاتتىعىنا كانديداتتاردى ۇسىنۋ قازاقستاندا 29 قاراشادان باستالىپ، 14 جەلتوقسانعا دەيىن جالعاسادى»، - دەپ حابارلادى ورتالىق سايلاۋ كوميسسياسىنىڭ وتىرىسى بارىسىندا وسك توراعاسىنىڭ ورىنباسارى كونستانتين پەتروۆ.

سايلاۋ الدىنداعى ۇگىت -ناسيحات 24 جەلتوقساننان باستالىپ، 13 قاڭتار ساعات 00:00 – گە دەيىن جالعاسادى، 13 قاڭتار – ۇنسىزدىك كۇنى، 14 قاڭتار – داۋىس بەرۋ كۇنى جانە 20 قاڭتارعا دەيىن وسك سايلاۋدى قورىتىندىلايدى. سەنات سايلاۋىنىڭ جارناسى - 900 مىڭ تەڭگە. داۋىس بەرۋگە ءماسليحات دەپۋتاتتارى قاتىسادى. 50 پايىزدان استام داۋىس بەرۋشىنىڭ قولداۋىنا يە بولعان كانديدات سەنات دەپۋتاتى اتانادى.

"كونستيتۋتسياعا ساي،  پارلامەنت سەناتىنىڭ دەپۋتاتى قر ازاماتى بولۋى كەرەك. سوڭعى 10 جىلدا قازاقستان اۋماعىندا جانە ءتيىستى ءوڭىردىڭ اۋماعىندا 3 جىل تۇراقتى تۇرعان بولۋى شارت. سونداي-اق، 5 جىلدان كەم ەمەس جۇمىس ءوتىلى جانە جوعارى ءبىلىمى، جاسى 30-دان كەم بولماۋى كەرەك", - دەدى وسك توراعاسىنىڭ ورىنباسارى كونستانتين پەتروۆ.

Abai.kz