بۇگىن استانا قالالىق ءماسليحاتىنىڭ وتىرىسىندا سەنات دەپۋتاتتىعىنا كانديدات رەتىندە ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ ۇسىنىلدى.

«وسى جىلدىڭ 31 قازانىندا 2022 جىلدىڭ 22 جەلتوقسانىنا شاقىرىلعانداردىڭ ورنىنا استانا قالاسىنان قر پارلامەنتى سەناتىنىڭ دەپۋتاتىن سايلاۋ تۋرالى قاۋلى جاريالاندى. بەكىتىلگەن كۇنتىزبەگە سايكەس، كانديداتتاردى ۇسىنۋ وسى جىلدىڭ 1-25 قاراشا ارالىعىندا جۇرگىزىلەدى. «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 71-بابىنا سايكەس، كانديداتۋرا ءماسليحاتتىڭ سەسسيالارىندا جانە ءوزىن-ءوزى ۇسىنۋ تارتىبىمەن وتكىزىلەدى»، - دەدى حالالىق ءماسليحات حاتشىسى ەرلان كاناليموۆ.

وسىدان كەيىن ءسوز العان Amanat پارتياسى اتىنان ءماسليحات دەپۋتاتى بولىپ سايلانعان ازامات ايتحوجين ءسوز الىپ، سەنات دەپۋتاتتىعىنا ەرلان سىدىقوۆتى ۇسىندى.

«بۇگىن ءبىز فراكتسيا وتىرىسىندا ءبىراۋىزدان ەرلان سىدىقوۆتى ۇسىنامىز دەپ شەشتىك. ەرلان باتتاشۇلىن ءبارىمىز بىلەمىز. ول - عىلىم دوكتورى، پروفەسسور، اكادەميك. سەنات دەپۋتاتى بولىپ سايلانسا، ەلىمىزگە زور پايدا اكەلەتىندىگى ءسوزسىز»، - دەدى ول.

بۇل ۇسىنىستى اق جول پارتياسىنىڭ وكىلدەرى دە قولداپ، ءماسليحات دەپۋتاتتارى سەناتورلىققا ەرلان سىدىقوۆتى لايىق دەپ تاپتى.

Abai.kz