سەنبى, 28 قاڭتار 2023
قوعام 4980 9 پىكىر 24 قاراشا, 2022 ساعات 13:31

اقشانى ەمەس، اردى ويلاعان ءانشى

مەن قازىرگى انشىسىماقتاردىڭ كوپشىلىگىنىڭ كوكەيىن اقشا تەسكەن، تويلاردان تاپقان تابىسىنان باسى اينالىپ، كوزدەرىنىڭ ەتى ءوسىپ كەتكەنى سونشالىقتى، ولار اينالاسىنداعى قاراپايىم حالىقتى ادام عۇرلى كورمەيتىندىگىنە وزىمنەن-ءوزىم كۇيىنىپ جۇرەتىنمىن. وعان سەبەپ كوپ قوي.

وسىدان بىرەر جىل بۇرىن گاۋحار الىمبەكوۆا دەگەن "بەت اشۋمەن" بايىعان ءانشى قىزىمىز بازاردا ساۋدا جاسايتىن ايەلدەن "ارزان باعامەن ءۇي ساتىپ اپەرەمىن" دەپ 40 مىڭ دوللارىن الداپ الىپ، سوزگە ىلىنگەندە نازارباەۆقا جىلاپ-سىقتاپ حات جازىپ، جازادان وپ-وڭاي قۇتىلىپ كەتكەن ەدى. مۇنى از دەسەڭىز، وسى جاقىندا عانا اقشانىڭ بۋى باسىن اينالدىرعان تاعى ءبىر "جۇلدىز" تورەعالي ءتورالى ءبىر جاس جىگىتتى: "مەنىڭ نۇرلى بەينەمە نەگە قارادىڭ؟" دەپ، ءاي-ءشاي جوق سوققىعا جىققان. اقشا نە ىستەتپەيدى، الگى جاس بالانىڭ ءويتىپ-ءبۇيتىپ، كوڭىلىن تاۋىپ، ءتيىستى ءادىل جازادان سىتىلىپ كەتىپ، قازىر دىم بولماعانداي سايران سالىپ ءجۇر.

دەگەنمەن، قاتەلەسكەن ەكەنمىن. بۇلاردىڭ ىشىندە ءالى دە ادامگەرشىلىكتى جوعارى تۇتاتىن، اقشانىڭ قۇلىنا اينالماعان انشىلەر دە كەزدەسىپ قالاتىن كورىنەدى. جاقىندا قوستانايعا بەلگىلى ءانشى، قوڭىر داۋسىمەن ءبارىمىزدىڭ دە قۇلاق قۇرىشىمىزدى قاندىرىپ جۇرگەن توقتار سەرىك "كونتسەرت قويۋعا كەلەدى ەكەن" دەگەن حابار تارادى.

سۇيىكتى ءانشىم بولعان سوڭ، جەر-جەردە ءىلۋلى تۇرعان افيشالارىنا كوز جۇگىرتتىم. ءسۇيتتىم دە، مىنا ءبىر كوركەم سۋرەتتەگى قوس اققۋداي جاراسقان توقتار مەن بەيبىت سەكىلدى  جانىما جاقىن تالانتتى انشىلەرىمدى كورىپ، كوڭىلىمدەگى اسا ءبىر ادەمى سەزىمگە بولەنىپ ءبىراز تۇرىپ قالدىم. الگى افيشانىڭ استىندا: "بۇل كونتسەرتتەن تۇسكەن اقشا الاپات ورتتەن زارداپ شەككەن اۋليەكول تۇرعىندارىنا اۋدارىلادى " دەگەن جازۋ كوزىمە وتتاي باسىلدى.

مىنە، قازاقتىڭ ناعىز ءانشىسىنىڭ ۇلكەن ادامگەرشىلىك ءىسى. شىنى كەرەك، مۇنى بىزدەگى جاسى بار، جاسامىسى بار، اياق استىنان "جۇلدىز" اتانعانداردىڭ كوپشىلىگىنىڭ قولىنان كەلە بەرمەسى انىق. بىلايعى جۇرتتىڭ قايعىسىنا ورتاقتاسا ءبىلۋ - انا سۇتىمەن بويعا بىتكەن اسىل قاسيەت. توقتاردىڭ وسىنداي ساناۋلى عانا ازاماتتاردىڭ قاتارىنان تابىلعاندىعىنا قۋاندىق.

ال وكىنگەندىگىمىز، وسى وبلىسىمىزدى 7 جىل ۇزدىكسىز باسقارعان، ىشكەنى الدىندا، ىشپەگەنى ارتىندا، اۋزىنان كۇندە اق ماي اعىپ جۇرگەن ارحيمەد مۇقانبەتوۆ دەگەن كىسىنىڭ ءوزىنىڭ 2 ميلليون تەڭگەلىك ايلىعىنان قول استىنداعى زارداپ شەككەن جاندارعا ەڭ بولماسا 200 تەڭگەنى ءبولىپ بەرۋگە جاراماعاندىعى ەدى. مۇنى كورگەن، وبلىسىمىزداعى قالتالى ازاماتتاردىڭ ەشقايسىسىنىڭ دا ۇندەمەي، جىم-جىرت وتىرعاندارىنا دا تاڭ قالۋعا دا بولماس.

جالپى، ادامعا دەگەن اياۋشىلىق پەن جان جىلۋىن بولۋشىلىك قاشاندا اردىڭ ءىسى بولىپ قالا بەرمەك. بۇل قاسيەت بىرەۋلەردە مولىنان بولادى، ال بىرەۋلەر ودان مۇلدەم ماقۇرىم قالعان. ول بايلىققا نەمەسە بيلىككە بايلانىستى ەمەس.

ەندى بۇعان نە دەرمىز. تەك انا قينالماي كەلگەن قىرۋار قارجىسىنا حالىققا تۇركياداعى حان سارايىنداي ۇيلەرىن بولماسا ەكىنىڭ ءبىرى قولى جەتە بەرمەيتىن اسا قىمبات «تەمىر تۇلپارلارىن» قازداي ءتىزىپ قويىپ، الىمجەلىگە سالىپ ماقتانۋدان ءبىر-بىرىمەن جارىسقا تۇسكەن «جۇلدىزدارىمىزدىڭ» قۇلاعىنا التىن سىرعا دەمەستەن باسقا نە لاج بار؟

 

جايبەرگەن بولاتوۆ

Abai.kz

9 پىكىر

ۇزدىك ماتەريالدار

انىق-قانىعى

جاقيانوۆ: ماعان اشىق جالا جابۋعا كىرىستى...

عالىمجان جاقيانوۆ 3113
ايقاي

ەلدە ۇلتتىق يدەولوگيا وتە ءالسىز...

بەيسەنعازى ۇلىقبەك 1900