جۇما, 3 اقپان 2023
711 2 پىكىر 23 قاراشا, 2022 ساعات 13:22

بوررەل: "ەو كولىك دالىزدەرىن رەسەي ەمەس، ورتالىق ازيا ارقىلى دامىتادى"

ەۋرووداق پەن ورتالىق ازيا ەلدەرى رەسەيگە سوقپايتىن كولىك جولدارىن دامىتا تۇسۋگە مۇددەلى. ەۋروپا وداعىنىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى جوزەپ بوررەلل ءتول ماقالاسىندا وسىلاي دەپ جازدى.

بوررەلدىڭ پىكىرىنشە، ورتالىق ازيا ەۋرووداقتى "الدەقايدا ءتيىمدى ارىپتەس" دەپ ەسەپتەپ، ونىمەن قارىم-قاتىناسىن دامىتا تۇسۋگە ۇمتىلادى. ەو دا وسى ايماقپەن قارىم-قاتىناسى نىعايعانىنا مۇددەلى.

بوررەلل ايماقپەن اراداعى قازىرگى قاتىناس ءالى ءالسىز. ورتالىق ازياداعى مەملەكەتتەردىڭ دەنى ەۋروپا مەن الەم نارىعىنا رەسەي ارقىلى عانا شىعا الادى. "بىراق مۇنداي تاۋەلدىلىك پەن تاڭداۋدىڭ بولماۋى بارىمىزگە اششى ساباق بولدى", - دەپ جازدى بوررەلل.

اۆتور ماقالاسىندا نەگىزىنەن ترانسكاسپي ءدالىزى تۋرالى ءسوز قوزعاعان. بۇل كولىك ءدالىزى قىتاي مەن ەۋروپانى قازاقستان، ازەربايجان، گرۋزيا جانە تۇركيا ارقىلى بايلانىستىرادى. بوررەلدىڭ ايتۋىنشا، ەۋروپانىڭ دامۋ جانە قايتا قۇرۋ بانكى قازىر وسى ءدالىزدىڭ تەحنيكالىق-ەكونوميكالىق نەگىزدەمەسىن ازىرلەپ جاتىر.

رەسەي مەن قىتاي ورتالىق ازيادا "ماڭىزدى ءرولىن ءالى جوعالتا قويعان جوق" دەپ جازدى بوررەلل. الايدا ەۋروپا وداعى ورتالىق ازيانىڭ "باستى ساۋدا جانە ينۆەستيتسيالىق ارىپتەسىنە اينالدى". ونىڭ ايتۋىنشا، كەيىنگى ون جىلدا ەۋرووداق ايماققا ءجۇز ميلليارد ەۋرودان استام قاراجات ينۆەستيتسيالاعان. بۇل - رەسەي مەن قىتاي ۇلەسىنەن "الدەقايدا كوپ" كورسەتكىش. ەۋرووداق وسى ماقساتقا تاعى 300 ميلليارد ەۋرو ءبولۋدى كوزدەپ وتىر.

ۋكرايناعا باسىپ كىرگەلى بەرى رەسەي باتىستىڭ سانكتسيالارىنا ۇرىندى. كرەمل سول ساتتەن باستاپ ازيا ەلدەرىمەن ارىپتەستىگىن نىعايتۋعا دەن قويدى. قاراشادا العاش رەت استانادا "رەسەي-ورتالىق ازيا" ءسامميتى ءوتتى. وندا پرەزيدەنت ۆلاديمير پۋتين "رەسەي ورتالىق ازيا ەكونوميكاسىنداعى باستى ينۆەستور، شامامەن بەس ميلليارد دوللار ينۆەستيتسيا سالدى" دەپ مالىمدەدى.

17 قاراشادا سامارقاند قالاسىندا ورتالىق ازيا ەلدەرى سىرتقى ىستەر مينيسترلەرىنىڭ كونفەرەنتسياسىندا جوزەپ بوررەلل ەۋروپا وداعى ايماق ەلدەرى ءۇشىن ناقتى جوبالاردى جۇزەگە اسىرۋدى ۇسىنادى دەپ مالىمدەدى.

 

Abai.kz

2 پىكىر