سەنبى, 28 قاڭتار 2023
انە، كوردىڭ بە؟ 1587 0 پىكىر 17 قاراشا, 2022 ساعات 12:37

جەتىنشى جۇزدەسۋ: رامشتايندا نە ايتىلدى؟

ۋكراينا اۋماعىن رەسەي 15 قاراشا كۇنى زىمىران سوققىسىنىڭ استىنا الدى. رەسمي اقپارات بويىنشا 106 زىمىران اتىلعان، ونىڭ 91 ۋكراين اۋە قورعانىس جۇيەلەرى قاعىپ سالعان. رەسەي زىمىراندى اتۋ كۇنى مەن ۋاقىتىن ناقتى بەلگىلەگەن. بۇل باليدە ءوتىپ جاتقان G20 ءسامميتى قارساڭىندا بولدى. الەم ليدەرلەرى رەسەيدى ايىپتاي سويلەدى، ال ءداستۇرلى توپتىق سۋرەتكە ءتۇسۋ ءراسىمى رەسەي دەلەگاتسياسىنىڭ سامميتكە قاتىسۋىنا بايلانىستى بولمادى. ليدەرلەر رەسەي دەلەگاتسياسىمەن ءبىر سۋرەتتە بولۋدى قالامادى.

رەسەي بيلىگى ءدال وسىلاي بولاتىنىن ءبىلدى. باتىستىق باق الەم ليدەرلەرى رەسەي دەلەگاتسياسىمەن سۋرەتكە تۇسپەيتىنىن الدىن-الا ماقالا ەتىپ جازعان ەدى. ءدال وسى كۇنى رەسەي ءوز پوزيتسياسىن ناقتى كورسەتىپ، الەمگە قىرىن قارايتىنىن اڭعارتۋ ءۇشىن ۋكراينا جەرىن زىمىران استىنا الۋ جوسپارىن بىرنەشە اپتا بويى دايىنداعان-دى. بۇل سامميتتەگى رەسەيدى تومەندەتۋ ارەكەتتەرى مەن حەرسوننان ايىرىلىپ قالعانىنا بايلانىستى جاۋاپ بولۋى ءتيىس ەدى. رەسەي اۋديتورياسىنىڭ قىجىلىن ۋكراينا ينفراقۇرىلىمدارىن اتقىلاۋ ارقىلى باسۋ دا ماڭىزدى بولاتىن. سەبەبى حەرسوننان شەگىنىس جاساۋ ارقىلى رەسەي بيلىگىنىڭ رەيتينگى تومەندەدى، حالىقتىڭ اسكەرگە دەگەن سەنىم كاپيتالى سارقىلا باستادى.

ۋكراينا اۋماعىن زىمىرانمەن اتقىلاپ، جارىق پەن جىلۋ جۇيەلەرىن ىستەن شىعارعان رەسەيدىڭ ارەكەتىن باتىس ەلدەرى ايىپتاي سويلەپ، ۋكرايناعا اۋە قورعانىس جۇيەلەرىن كوبىرەك بەرۋگە شاقىردى. بۇل پولشا اۋماعىنا ەكى زىمىران ءتۇسىپ، بەيبىت تۇرعىنداردىڭ قازا تابۋ وقيعاسىمەن دە بايلانىستى بولاتىن. باتىس ەلدەرى ۋكراينادا قۋاتتى اۋە قورعانىس جۇيەلەرى بولسا، وندا ناتو-نىڭ شىعىس بولىگىندە بولۋى ىقتيمال وقىس وقيعالار سانى دا ازايادى دەپ سانايدى. وسىعان دەيىن مولدوۆا اۋماعىنا رەسەي زىمىرانى تۇسكەن ەدى، كۇنى كەشە پولشا اۋماعىنا زىمىران ءتۇستى. وقىس وقيعالار جيىلىگى ارتۋدا، بۇل رەسەي مەن ناتو-نىڭ  تىكەلەي قاقتىعىسىن تۋىنداتۋى مۇمكىن. سوندىقتان ۋكراينانى جانە ناتو-نىڭ شىعىس بولىگىن قۋاتتى اۋە قورعانىس جۇيەسىمەن قامتاماسىز ەتۋ ماڭىزدى.

ۋكرايناعا قارۋ بەرىپ، اسكەري كومەك كورسەتۋ بويىنشا قۇرىلعان "رامشتاين" فورماتى جالعاسىن تابۋدا. 16 قاراشا كۇنى رامشتايندا جەتىنشى ونلاين جۇزدەسۋ بولدى. بۇل كەزدەسۋدىڭ نەگىزگى تاقىرىبى ۋكراينا اۋە كەڭىستىگىن قورعاۋدى كۇشەيتۋگە ارنالدى. التى مەملەكەت كيەۆكە اۋە كەڭستىگىن قورعاۋ بويىنشا كومەك قولىن سوزاتىنىن ناقتى ايتتى.

كەزدەسۋدى اقش قورعانىس ءمينيسترى للويد وستين اشتى. "مەن ۋكرايناعا اسكەري كومەك پاكەتىن جاريالاپ، 287 ملن دوللار كولەمىندەگى قارۋ-جاراقتى كيەۆكە بەرۋگە شەشىم قابىلداعان شۆەتسياعا العىس ايتقىم كەلەدى. بۇل اسكەري كومەككە رەسەيدىڭ اگرەسسيالىق شابۋىلىنان قورعانۋدى ارتتىراتىن اۋە قورعانىس جۇيەلەرى دە كىرەدى", - دەدى وستين.

سونىمەن قاتار كەزدەسۋ بارىسىندا يسپانيا Hawk كەشەنى مەن وعان ارنالعان زىمىرانداردى بەرەتىنىن جاريالادى. ال كانادا ۋكراينا اسكەرى قىستا اسكەري قيمىلداردى جالعاستىرا الۋى ءۇشىن 500 ملن دوللار بولەتىنىن جاريالادى.

"گەرمانيا ارتيللەريا مەن زىمىران كەشەندەرىنە سناريادتار، زىمىراندار بەرۋدى جالعاستىراتىنىن ايتتى. بۇل وتە ماڭىزدى. ال گرەكيا 155 مم كاليبرلى سناريادتاردى كوپ كولەمدە جەتكىزۋگە ۋادە ەتتى", - دەدى پەنتاگون باسشىسى. پولشا دا ءوز كەزەگىندە تانككە قارسى قورعانىس جۇيەلەرى، اۋە قوعانىس كەشەنىن بەرۋگە كەلىستى.

ۋكراينا قورعانىس ءمينيسترى الەكسەي رەزنيكوۆ ۋكراينا اۋەسىن قورعاۋ ماڭىزدى ەكەنىن ايتىپ، قورعانىس جۇيەلەرىنىڭ سانىن ارتتىرۋ كەرەكتىگىن مەڭزەدى. "ۋكراينا اۋە كەڭىستىگىن قورعاۋ قازىرگى تاڭدا ءبىزدىڭ باستى ماقساتىمىز، رامشتاين-7 كەزدەسۋىنىڭ دە باستى تاقىرىبى وسى. ءبىز ءوز سەرىكتەستەرىمىزبەن بۇل ماسەلەنى شەشۋگە دايىندالىپ جاتىرمىز. قىسقى اسكەري قيمىلدار مەن ۇرىسقا دا دايىندىق قىزۋ تۇردە جۇرۋدە", - دەدى رەزنيكوۆ.

اسحات قاسەنعالي

Abai.kz

0 پىكىر

ۇزدىك ماتەريالدار

انىق-قانىعى

جاقيانوۆ: ماعان اشىق جالا جابۋعا كىرىستى...

عالىمجان جاقيانوۆ 3143
ايقاي

ەلدە ۇلتتىق يدەولوگيا وتە ءالسىز...

بەيسەنعازى ۇلىقبەك 1918