جۇما, 29 ناۋرىز 2024
اپات 2891 10 پىكىر 3 قاراشا, 2022 ساعات 14:01

ميتتالعا ادام ەمەس، اقشا كەرەك!

بۇگىن قاراعاندى وبلىسىنداعى «ارسەلورميتتال تەمىرتاۋ» اق-نىڭ لەنين اتىنداعى شاحتاسىندا گاز اپاتى بولىپ، 5 كەنشى قازا تاپتى. تاعى تورتەۋى جاراقاتتانىپ، اۋرۋحاناعا ءتۇستى. اۋەلى 4 كەنشىنىڭ قازا تاپقانى تۋرالى ايتىلعان، كەيىن تاعى ءبىر جۇمىسشىنىڭ قايتىس بولعانى بەلگىلى بولدى.

«قولدا بار الدىن الا مالىمەتتەرگە سايكەس، 3 قاراشادا شاحتينسك قالاسىنداعى «ارسەلور ميتتال تەمىرتاۋ» اق-گىڭ لەنين اتىنداعى شاحتاسىندا تۇنگى ساعات 3:00 شاماسىندا گازدرەناجدى ۇڭعىمالاردى بۇرعىلاۋ كەزىندە كەنەتتەن گازدىڭ شىعۋى ورىن الدى. بۇل 4 جۇمىسشىنىڭ ولىمىنە اكەپ سوقتى، تاعى ءبىر جۇمىسشىنى ىزدەۋ جۇمىستارى جالعاسىپ جاتىر، ال تورتەۋى اۋرۋحاناعا جاتقىزىلدى»، – دەپ تۇسىنىك بەرگەن تجم ءباسپاسوز قىزمەتى.

ۆەدومستۆونىڭ اقپاراتى بويىنشا شاحتانىڭ 106 قىزمەتكەرى ەۆاكۋاتسيالانعان.

«وقيعانىڭ ءمان-جايى انىقتالىپ جاتىر. اپاتتى تەرگەۋ جونىندەگى كوميسسيا قۇرىلادى. تەرگەۋ ناتيجەلەرى بويىنشا وقيعانىڭ سەبەپتەرى مەن ءمان-جايى انىقتالادى»، – دەپ جازىلعان مينيسترلىكتىڭ حابارلاماسىندا.

پرەزيدەنت قاسىم-جومارت توقاەۆ قايتىس بولعانداردىڭ وتباسىنا، تۋىستارىنا كوڭىل ايتتى. «مەملەكەت باسشىسى ۇكىمەت پەن قاراعاندى وبلىسى اكىمىنە اپات سەبەپتەرىن انىقتاۋ ءۇشىن شۇعىل شارالار قابىلداۋدى، قايتىس بولعان جانە زارداپ شەككەن ازاماتتاردىڭ وتباسىلارىنا ءتيىستى كومەك كورسەتۋدى تاپسىردى»، - دەپ جازدى اقوردا.

قازىر قاراعاندى وبلىسىنىڭ پوليتسياسى كومپانيا ۇستىنەن «تاۋ-كەن نەمەسە قۇرىلىس جۇمىستارىن جۇرگiزۋ كەزiندە قاۋiپسiزدiك قاعيدالارىن بۇزۋ» بابى بويىنشا قىلمىستىق ءىس قوزعاعان.

ءبىر اي بۇرىن عانا «ارسەلورميتتال» باسقارما توراعاسى لاكشمي ميتتال مەن پرەمەر-مينيستر ءاليحان سمايىلوۆ كەزدەسكەن ەدى. جيىندا كومپانيا الداعى جىلدارى بولات جانە تاۋ-كەن اكتيۆتەرىن جاڭعىرتۋعا قوماقتى قارجى سالۋدى جوسپارلاپ وتىرعانىن، بۇل رەتتە قىزمەتكەرلەردى وقىتۋعا جانە ولاردىڭ قاۋىپسىزدىگىن قامتاماسىز ەتۋگە ۇلكەن كوڭىل بولىنەتىنىنە ۋادە ەتكەن بولاتىن.  ەكى تاراپ «قاۋىپسىزدىك ماسەلەسى» تۋرالى سويلەسكەن.

«ونەركاسىپتىك قاۋىپسىزدىك وتە ماڭىزدى ماسەلە بولعاندىقتان، وعان ەرەكشە نازار اۋدارۋ كەرەك. وسىعان بايلانىستى ءوندىرىستى دامىتۋ جانە قىزمەتكەرلەردى مامانداندىرىلعان وقىتۋ بويىنشا كومپانيانىڭ ينۆەستيتسيالىق جوسپارلارىن قۇپتايمىز»، – دەگەن ەدى ءاليحان سمايىلوۆ.

كورىپ وتىرعانىمىزداي، شاحتاداعى قاۋىپسىزدىك ماسەلەسى ءالى شەشىلمەگەن.

لەنين اتىنداعى شاحتادا بۇعان دەيىن كوپتەگەن اپاتتى جاعدايلار تىركەلدى.  ەڭ ءىرى اپات 2006 جىلى بولدى. وندا مەتان گازى جارىلۋىنىڭ ناتيجەسىندە 41 ادام قازا تاپقان بولاتىن.  «ارسەلورميتتال تەمىرتاۋ» اكتسيونەرلىك كومپانياسى باسقاراتىن باسقا دا كاسىپورىنداردا ۇنەمى ادام ولىمىنە اكەلەتىن اپاتتى وقيعالار تىركەلىپ ءجۇر. كەيىنگى كەزدە مۇنداي جاعدايلار ءتىپتى، جيىلەگەن.

بيىل ماۋسىمدا تەمىرتاۋدا تسەحتىڭ توبەسى وپىرىلىپ، جۇمىسشىلار ۇيىندى استىندا قالدى. وقيعا سالدارىنان 4 ادام قازا تاپتى، ءبىر ادام جاراقاتتاندى. ۇزاق ۋاقىت وتپەي جاتىپ، امت كومپانياسىنا تيەسىلى جىلۋ ەلەكتر ورتالىعىنداعى قازاندىقتى جوندەۋ كەزىندە تاعى ءبىر جۇمىسشى وپات بولدى.

بىلتىر قاراشادا «ارسەلورميتتال تەمىرتاۋ» شاحتاسىندا اپات بولىپ، التى ادام قازا تاپتى.

ينسپەكتورلار مەكەمەدە قاۋىپسىزدىك تالاپتارىنىڭ جۇيەلى تۇردە بۇزىلاتىنىن انىقتاعان. بىراق سوعان قاراماستان كومپانيانىڭ جۇمىسى توقتاتىلماي، سوتتار تەك ايىپپۇل سالۋمەن شەكتەلىپ كەلەدى.

قايعىلى وقيعالاردان سوڭ الەۋمەتتىك جەلىدە اتم كومپانياسىنىڭ جاۋاپتى قىزمەتكەرلەرىن جازاعا تارتۋدى، كومپانيانى قازاقستان حالقىنا قايتارۋدى تالاپ ەتكەن پەتيتسيا جارىق كوردى.

پەتيتسيا اۆتورى قايىربەك سارسەنباي كومپانيادا جىل سايىن اپاتتار مەن جالاقى داۋى بولاتىنىن، سونىڭ كەسىرىنەن ادامدار قازا تاۋىپ جاتقانى تۋرالى جازدى. ول «ءبىز وسى پەتيتسيا ارقىلى قوعامدا رەزونانس تۋعىزىپ، بيلىك نازارىن اۋدارا الامىز»، - دەدى.

بىراق ءالى كۇنگە دەيىن ەشتەڭە وزگەرمەدى. مىنە، بۇگىن تاعى اپات، تاعى ادام ءولىمى بولدى. ال ميتتال كەزەكتى رەت ايىپپۇل ارقالاپ كەتە بەرمەك...

ايجان تەمىرحان

Abai.kz

10 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1571
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2265
عيبىرات

قايسار رۋحتى عازيز جان

مۇحتار قۇل-مۇحاممەد 3565