جەكسەنبى, 26 مامىر 2024
ادەبيەت 3539 1 پىكىر 10 قازان, 2022 ساعات 12:09

ءوي، قالاي پرەزيدەنت بولاسىڭ؟

سايلاۋعا ۇمىتكەرلەر ءۇشىن جاڭا ەرەجە شىعىپتى. جاڭعاق سياقتى شاعاتىن سياقتىمىن. ايەلىممەن اقىلداسىپ، پرەزيدەنتتىككە ۇمىتكەر بولدىم! ون ميلليون ءىشىمدى تەسىپ بارا ما، نە؟ ارى كەتكەندە، «پرەزيدەنت بولا جازداعان!» دەگەن اتاعىم قالادى. 

سودان، ۇمىتكەر رەتىندە ەمتيحان تاپسىرىپ وتىرمىن. «پرەزيدەنت بولا كەتسەڭىز، نەدەن باستايسىز؟» – دەگەن تاقىرىپ بەردى، شىعارما جازۋ ءۇشىن.

«ەگەر پرەزيدەنت بولا قالسام، جەتى شەلپەك قۇدايى بەرەمىن. دوستارىما، اعايىندارىما توي جاساپ، «جۋىپ» بەرەمىن. كوكپار بەرەمىن، جار باسىنا شىعىپ الىپ، فونوگرامماسىز: «ەەەي، مەن ەندى پرەزيدەنتپىن!» – دەپ ايقايلايمىن! كەشكە دەيىن ايقايلايمىن! داۋسىمنان قىتاي دا، رەسەي دە سەلك ەتە قالادى. بولاشاق پرەزيدەنت ءاشين تۋسەسالعانۋلى» – دەپ جازدىم. شىعارمامدى تەكسەرۋشى كىسى فامىلامنەن قاتە تاپتى. اشەيىن دەگەن اتىمدى ءاشين دەپ، تۇسەسالعانۇلى دەگەندى تۋسەسالعانۋلى دەپ جازىپ قويىپپىن. سوسىن، ماعان: «تاقپاق ايتا عوي!» – دەدى. «ايۋ وتىر پارتادا...» – دەپ كەلە جاتىر ەدىم: «باسقا تاقىرىپتا ايتىڭىز»، – دەدى. «لەنين ءبىزدىڭ بابامىز، لەنين ءبىزدىڭ اتامىز!» – دەپ كەلە جاتىر ەدىم، توقتاتىپ تاستادى. ول مەنىڭ كەڭەس داۋىرىندە وتكەن بالالىق شاعىمنىڭ تاقپاعى ەكەن. سوسىن: «توعىز جەردەگى توعىز قانشا؟» – دەپ كوبەيتۋ كەستەسىن سۇرادى. «كوپ بولادى!» – دەپ ەدىم: «ەسەپ بىلمەگەن ەسەكسىز!» – دەدى. سوسىن، جاڭا ەرەجە بويىنشا: «وتانىڭىزدى قالاي سۇيەسىز؟ – دەپ تە سۇرادى. ايەلىمدى ەرتىپ كەلگەنمىن. سونى باس سالىپ سۇيە باستادىم. «ايەلىڭىزدى سۇيە بەرگەنىڭىز قالاي؟» – دەدى ول تاڭىرقاپ. «وتان وت باسىنان باستالادى...» – دەپ مىڭگىرلەدىم. قاستارى جيىرىلعان ەمتيحان قابىلداۋشى: «بولاشاق پرەزيدەنت قالاي جۇرەدى؟» – دەگەنى سول، ورتاعا شىعىپ: «ەي، كلاستاستار، قالايسىڭدار؟ قۇدەكە، كاك دەلا؟» – دەپ داۋىستاپ، «بلاتنوي» ءجۇرىپ ەدىم، انا كىسى جاقتىرمادى. ىڭىرانىپ، ساقالىن سيپاپ وتىرىپ:

– بالزاكتى وقىدىڭىز با؟ – دەپ سۇرادى.

– جوق.

– تەودەر درايزەردى شە؟

– جووق.

– چارلز ديككەنستىڭ «وليۆەر ءتۆيستتىڭ شىتىرمان وقيعالارىن» شە؟

– تانىمايدى ەكەنمىن.

– شارلوتتانىڭ شىعارمالارىن؟

– كورگەن ادامىم ەمەس.

– ستەندالدى؟

– ەرتەڭ وقيىن...

– ءوي، سەنىمەن قالاي سويلەسەمىن؟ ورەڭ ساياز ەكەن. ەرتەڭ قالاي پرەزيدەنت بولاسىڭ؟  ەكى كۇن بەرەيىن، شارلوتتانى وقىپ كەلىڭىز! – دەدى. سول كۇننەن بەرى الەمنەن ءالىم كەلگەنشە، شارلوتتانى ىزدەپ ءجۇرمىن. كورگەندەرىڭىز بار ما؟ تەلەفون ءنومىرىن بەرىڭىزدەرشى، قۇداي ءۇشىن!

مۇحتار شەرىم

Abai.kz

1 پىكىر

ۇزدىك ماتەريالدار

قۇيىلسىن كوشىڭ

باس گازەت ورالماندارعا نەگە شۇيلىكتى؟

ءالىمجان ءاشىمۇلى 2347
ادەبيەت

«سولاي ەمەس پە؟»

عابباس قابىشۇلى 2690
قوعام

دوس كوپ پە، دۇشپان كوپ پە؟

ءابدىراشيت باكىرۇلى 2937
ەل ءىشى...

ۇلتتىق بىرەگەيلەنۋ: قانداستاردىڭ ءرولى قانداي؟

ءومارالى ادىلبەكۇلى 1770