كەزەكتەن تىس پرەزيدەنت سايلاۋىنا كانديداتتاردى ۇسىنۋ ەرتەڭ باستالادى.

«قر-نىڭ پرەزيدەنتى لاۋازىمىنا كانديداتتاردى ۇسىنۋ سايلاۋ بەلگىلەنگەن كۇننىڭ كەيىنگى كەلەسى كۇنىندە باستالادى. ياعني 2022 جىلعى 23 قىركۇيەكتە باستالىپ، 11 قازان كۇنى ساعات 18:00-دە اياقتالادى»، - دەدى ورتالىق سايلاۋ كوميسسياسى توراعاسىنىڭ ورىنباسارى كونستانتين پەتروۆ.

پرەزيدەنتتىككە ۇمىتكەرلەرگە قويىلاتىن تالاپتار:

قر ازاماتى بولۋى;
قر اۋماعىندا سوڭعى 15 جىل بويى تۇرۋى;
جوعارى ءبىلىمىنىڭ بولۋى;
جاسى 40-قا تولعان بولۋى;
بەلسەندى سايلاۋ قۇقىعىنىڭ بولۋى;
مەملەكەتتىك قىزمەتتە نەمەسە سايلانبالى لاۋازىمدا كەمىندە 5 جىل جۇمىس تاجىريبەسىنىڭ بولۋى;
مەملەكەتتىك ءتىلدى ەركىن مەڭگەرۋى.

پرەزيدەنتتىككە ۇمىتكەر بولۋ ءۇشىن قانشا قول جيناۋ كەرەك؟

وسك توراعاسى ورىنباسارىنىڭ مالىمدەۋىنشە، ءار كانديداتتى قولداۋ ءۇشىن 118 273 سايلاۋشىنىڭ قولى جينالۋى ءتيىس.

«پرەزيدەنتتىككە كانديداتتاردى قولداۋ ءۇشىن وبلىستار، رەسپۋبليكالىق ماڭىزى بار قالالاردىڭ جانە استانانىڭ كەم دەگەندە 2/3 اتىنان تەڭدەي وكىلدىك ەتەتىن سايلاۋشىلار سانىنىڭ كەم دەگەندە 1 پايىزىنىڭ قولىن جيناۋ قاجەت. قول قويۋ پاراقتارىن بەرۋ كانديداتتىڭ كونستيتۋتسيا مەن كونستيتۋتسيالىق زاڭنىڭ تالاپتارىنا سايكەستىگىن انىقتاعاننان كەيىن 5 كۇننىڭ ىشىندە جۇرگىزىلەدى»، - دەيدى كونستانتين پەتروۆ.

ونىڭ ايتۋىنشا، پرەزيدەنتتىككە كانديداتتار 3 ملن تەڭگە جارنا تولەيدى.

«كانديداتتاردىڭ كونستيتۋتسيا مەن سايلاۋ تۋرالى كونستيتۋتسيالىق زاڭنىڭ تالاپتارىنا سايكەستىگىن انىقتاۋدى ورتالىق سايلاۋ كوميسسياسى رەسپۋبليكالىق قوعامدىق بىرلەستىكتىڭ جوعارى ورگانى وتىرىسىنىڭ كانديداتتى ۇسىنۋ تۋرالى حاتتامانى، داۋىسقا تۇسۋگە كەلىسىمى تۋرالى ءوتىنىشى جانە كانديداتتىڭ سايلاۋ جارناسىن تولەگەنىن راستايتىن تۇبىرتەكتى وتكىزگەننەن كەيىن 5 كۇن ىشىندە جۇزەگە اسىرادى. جارنا مولشەرى - 3 ملن تەڭگە»، - دەيدى پەتروۆ.

Abai.kz