جۇما, 29 ناۋرىز 2024
قاينايدى قانىڭ... 8932 49 پىكىر 13 قىركۇيەك, 2022 ساعات 12:24

ارمانداماسىن «اق ەشكى» مەن «كوك تەكە»!

«وتانداستار قورى» كەاق پرەزيدەنتى
ابزال ساپاربەكۇلىنا!

قۇرمەتتى ابزال ساپاربەكۇلى!

شەت جاعاسىن ءوزىڭىز دە ەستىپ جاتقان دا بولارسىز، ەڭبەك جانە حالىقتى الەۋمەتتىك قورعاۋ مينيسترلىگى تاراپىنان جاسالعان «قازاقستان رەسپۋبليكاسى كوشى-قون ساياساتىنىڭ 2023-2027 جىلدارعا ارنالعان تۇجىرىمداماسىنىڭ» ءبىر نۇسقاسى بيلىك باسىنداعى ۇلتىن سۇيەتىن ازاماتتار ارقىلى مەنىڭ دە قولىما كەلىپ ءتۇستى.

اتالعان جاڭا «تۇجىرىمدامانىڭ» ءتورتىنشى باعىتىنداعى «...قازاقستان رەسپۋبليكاسىنىڭ ازاماتتىعىن الۋ ءۇشىن كەمىندە 5 جىل تۇرۋ مەرزىمىن ەسكەرە وتىرىپ، «قانداس» مارتەبەسىن بەرۋ ءتارتىبىن قايتا قاراۋ قاجەت.» دەگەن تۇسى مەنى شىرت ۇيقىمنان وياتتى، جاعامدى ۇستاتتى. ورىسشا ايتقاندا، شوك بولدىم!

جاڭا «تۇجىرىمدامانىڭ» ءدال وسى باعىتىنا ساي، ەرتەڭ پارلامەت    قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ جۇمىسپەن قامتىلۋى جانە كوش-قون ماسەلەلەرى بويىنشا وزگەرىستەر مەن تولىقتىرۋلار ەنگىزىپ، ەندىگى كوشىپ كەلەتىن قانداستارىمىزعا بەس جىلسىز ازماتتىق بەرمەيتىن زاڭ جوباسىن قابىلدايدى دەگەن ءسوز.

ءيا، پرەزيدەنت قاسىم-جومارت توقاەۆ ءبىرىنشى قىركۇيەكتە جاساعان جولداۋىندا وسى كوشى-قون سالاسىنا توقتالىپ، «قانداستاردىڭ كوشىپ كەلۋىنە جانە ىشكى ميگراتسياعا قاتىستى ساياسات تۇبەگەيلى وزگەرەدى»، - دەدى.

مىنە، قاسىم-جومارت كەمەلۇلى ايتقان «...تۇبەگەيلى وزگەرەدىنىڭ» ناتيجەسى وسىلاي بولايىن دەپ تۇر.

پرەزيدەنت قاسىم-جومارت توقاەۆتىڭ وسى جولداۋىنداعى «بۇل ورايدا، دەموگرافيالىق جانە ەكونوميكالىق ۇردىستەردى ەسكەرۋ كەرەك. سونداي-اق، جالپىۇلتتىق مۇددەنى باسشىلىققا الۋ وتە ماڭىزدى»، - دەگەن تاپسىرماسى ادىرام قالعان.

ەگەر، قانداستارىمىزدىڭ قازاقستان ازاماتتىعىن الۋ ءۇشىن كەمىندە 5 جىل تۇرۋ مەرزىمى زاڭداستىرىلسا، ونسىز دا توقىراپ تۇرعان ۇلى كوش توقتايدى!

ۇلى كوش توقتاعاننان كەيىن، بۇل تاقىرىپتا «دەموگرافيالىق جانە ەكونوميكالىق ءۇردىس» پەن «جالپىۇلتتىق مۇددە» جايلى ءسوز ايتۋدىڭ قاجەتى قالا ما؟!

كەشە نۇرسۇلتان نازارباەۆ زامانىندا قانسورعىش تيمۋر قۇلىباەۆ 2011 جىلعى «جاڭاوزەن وقيعاسىن» شەتتەن كەلگەن قانداستارىمىزعا جاۋىپ، 2013 جىلى ءدال وسىندا قوڭىز كۇزدە سول كەزدەگى ۇكىمەت باسشىسى وپاسىز كارىم ءماسىموۆتىڭ تىكەلەي ىقپالىمەن الىستان ورالعان اعايىندارىمىزعا بەس جىلسىز ازماتتىق بەرمەيتىن پاشيستىك زاڭ قابىلداتقان بولاتىن.

مىنە، سول كورىنىس، سول ماسقارا جاعداي 2022 جىلدىڭ كۇزىندە،  پرەزيدەنت قاسىم-جومارت توقاەۆ «جاڭا، ادىلەتتى قازاقستان» قۇرۋدى باستاعان ساتتە گرامم وزگەرىسسىز جانە قايتالانىپ وتىر.

اقوردادا وتىرعان سول قۇلىباەۆتار پەن ماسىموۆتەردىڭ ۇزىلمەگەن قۇيرىقتارى «امانات» قوعامدىق كوميسسياسىنىڭ توراعاسى، ادۆوكات ابزال قۇسپانعا «…ۇستالعانداردىڭ اراسىندا قىتايدان كەلگەن قانداس اعايىندار كوپتەپ كەزدەستى…»، – دەگەن ءسوزدى ايتقىزىپ، ەندى «قاسىرەتتى قاڭتار» وقيعاسىن دا سول تۇزى جەڭىل قانداستارىمىزعا جاۋىپ،  كەشە عانا (2019 جىلى) «...دۇنيەجۇزىندەگى قانداستارىمىزدىڭ باسىن تۋعان جەردە بىرىكتىرۋ – ءبىزدىڭ قاسيەتتى پارىزىمىز»، - دەگەن قاسىم-جومارت كەمەلۇلىنىڭ قولىمەن تاعى دا  بەس جىلسىز ازماتتىق بەرمەيتىن پاشيستىك زاڭ قابىلداتقالى جاتىر.

ماقساتتارى – قانداستارىمىزدى، جۇيەدەن بۇكىل قازاقتى قاسىم-جومارت توقاەۆقا قارسى قويىپ، بەكبولات تىلەۋحاننىڭ سوزىمەن ايتساق، «...دۇنيەجۇزىندەگى قانداستارىمىزدىڭ باسىن تۋعان جەردە بىرىكتىرۋ – ءبىزدىڭ قاسيەتتى پارىزىمىز»، - دەگەن «قۇسىعىن» ءۇش جىل وتپەي جاتىپ قايتا جۇتقىزۋ، ءسويتىپ ابىرويىن توگۋ، بەدەلىن ءتۇسىرۋ. سوڭىندا نۇرسۇلتان نازارباەۆتىڭ اياعىن قۇشتىرۋ.

بۇل ماقساتتارىنا جەتۋ ءۇشىن، كەشەگى «قاسىرەتتى قاڭتاردا» 230 ادامنىڭ قانىن توكسە، بۇگىن التى ميلليون قازاقتى قۇرباندىققا شالماقشى!..

ارمانداماسىن «اق ەشكى» مەن «كوك تەكە»!

«اق ەشكى» مەن «كوك تەكە» تيمۋر قۇلىباەۆ پەن كارىم ءماسىموۆتان قۇدىرەتتى ەمەس! ماعان سەنىپ قويىڭىز، التى ميلليون قازاقتىڭ قارعىسى مەن سىلەسى ەرتەڭ ولاردىڭ دا مۇيىزدەرىن قاعىپ، سول الدىڭعى ەكى سۇمىرايدىڭ اياعىن قۇشتىرادى!

قانداستارىمىز اقىماق ەمەس! ولار قاسىم-جومارت توقاەۆقا باسىن كەسىپ الساڭ دا قارسى شىقپايدى، قايتا ول كىسىنىڭ جۇرگىزىپ وتىرعان ساياساتىن قوس قولداپ قولدايدى. ءجۇز پايىز دەمەي-اق قويايىن، توقسان توعىز ءبۇتىن جۇزدەن توقسان توعىز پايىز قانداسىمىز قاسەكەڭ جاعىندا!! قاسىم-جومارت كەمەلۇلىن وسىنداي قۇيعا باتىرۋ ءۇشىن وسىنداي «جوبا» ۇسىنعان جەزتىرناق حانىمدى دا، وعان قارسى ءبىر اۋىز ءسوز ايتىپ، توسقاۋىل قويا الماعان ىنجىق مىرزانى دا جاقسى بىلەدى. بىلمەسە، ءبىز بىلدىرەمىز!!!

قۇرمەتتى ابزال ساپاربەكۇلى!

اتالعان قازاقستان رەسپۋبليكاسى كوشى - قون ساياساتىنىڭ 2023-2027 جىلدارعا ارنالعان تۇجىرىمداماسىن ىسكە اسىرۋ جونىندەگى ءىس-قيمىل جوسپارى بولىگىندە ءسىز جەتەكشىلىك ەتىپ وتىرعان «وتانداستار قورى» كوممەرتسيالىق ەمەس اكتسيونەرلىك قوعامىنا دا ءبىراز مىندەتتەمەلەر جۇكتەلىپتى.

قانداستارىمىزعا بەس جىلسىز ازماتتىق بەرمەيتىن پاشيستىك زاڭ قابىلداتىپ قويىپ، ەرتەڭ ولاردىڭ بەتىنە قالاي قارايسىز!

ءبىز بۇنداي سوراقىلىققا مۇلدە جول بەرمەۋىمىز، اسا مارتەبەلى پرەزيدەنتىمىزدى قورلاتپاۋىمىز كەرەك!

سول ءۇشىن، «وتانداستار قورى» كوممەرتسيالىق ەمەس اكتسيونەرلىك قوعامى كوشى-قون سالاسىنداعى مامانداردى، ۇلى كوشكە مۇددەلى قاۋىمنىڭ وكىلدەرى بولىپ تابىلاتىن قايراتكەر تۇلعالاردى، قاتىستى مينيسترلىكتەردىڭ جاۋاپتى باسشىلارى مەن دەپۋتاتتاردى، سونداي-اق مەملەكەتتىك كەڭەسشى ەرلان قارين مەن پرەزيدەنت اكىمشىلىگى باسشىسىنىڭ ورىنباسارى ايدا بالاەۆانى شاقىرىپ، تىكەلەي ەفمردەن تاراتىلاتىن اشىق كونفەرەنتسيا وتكىزۋدى، اتالعان جاڭا تۇجىرىمداماعا بايلانىستى بيلىك وكىلدەرىنىڭ تۇسىنىك بەرۋىن، ماماندار مەن قايراتكەر تۇلعالاردىڭ ونى تالقىلاۋىن ۇيىمداستىرۋىڭىزدى سۇرايمىن!

ءسويتىپ، بۇل باسسىزدىقتى پارلامەنتكە جەتكىزبەي، مينيسترلىكتە جەلكەسىن قيماساق، ەرتەڭ الەم الدىندا تاعى ماسقارا بولامىز!

اۋىت مۇقيبەك،

اقىن، «قۇرمەت» وردەنىنىڭ يەگەرى

Abai.kz

49 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1575
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2268
عيبىرات

قايسار رۋحتى عازيز جان

مۇحتار قۇل-مۇحاممەد 3580