سىبايلاس جەمقورلىققا قارسى ءىس-قيمىل اگەنتتىگى ەكس-مينيستر ارىستانبەك مۇحامەديۇلىنىڭ ءىسىن ءالى تەرگەپ جاتىر.

اگەنتتىك ۇلتتىق مۋزەيدىڭ ديرەكتورى ارىستانبەك مۇحامەديۇلى مەن باسقا دا جاۋاپتى تۇلعالارعا قاتىستى بيۋدجەت قاراجاتىن اسا ءىرى مولشەردە ۇرلاۋ جانە لاۋازىمدىق وكىلەتتىكتەردى اسىرا پايدالانۋ فاكتىلەرى بويىنشا تەرگەۋدى جالعاستىرۋدا.

انتيكور مالىمەتىنشە، تەرگەۋ «التىن ادامنىڭ الەم مۇراجايلارى بويىنشا شەرۋى» حالىقارالىق كورمەسىن وتكىزۋگە، سونداي-اق، «قازاقستاننىڭ ۇلتتىق كيەلى نىساندارى مەن مۋزەي قورلارىن جالپىمەملەكەتتىك فوتوگراممەتريالىق 3D-سكانەرلەۋ» جانە «قازاقستان رەسپۋبليكاسىنىڭ ۇلتتىق تسيفرلىق كينوكوللەكتسياسىن تسيفرلاندىرۋ» جوبالارىنا بولىنگەن بيۋدجەت قاراجاتىن ۇرلاۋ دەرەگى بويىنشا جۇرگىزىلىپ جاتىر.

سونداي-اق ارىستانبەك مۇحامەديۇلىنىڭ مادەنيەت جانە سپورت ءمينيسترى بولعاندا تۋىستارىنىڭ جانە ۇلەستەس تۇلعالارىنىڭ مەنشىگىنە «سۋ جانە قولدانبالى سپورت تۇرلەرى بويىنشا رەسپۋبليكالىق جوعارى سپورت شەبەرلىگى مەكتەبى» رمقك، «قازاق ەنتسيكلوپەدياسى» اق جانە «قازاق عىلىمي-زەرتتەۋ مادەنيەت ينستيتۋتى» جشس زاڭسىز بەرۋگە قاتىستىلىعى تەكسەرىلۋدە.

تەرگەلىپ جاتقان قىلمىستىق ىستەر بويىنشا مەملەكەتكە كەلتىرىلگەن زالالدىڭ الدىن الا سوماسى شامامەن 7 ملرد تەڭگەنى قۇرايدى. ارىستابەك مۇحامەديۇلىنىڭ قاماۋدا ۇستاۋ مەرزىمى 4 ايعا دەيىن ۇزارتىلدى.

Abai.kz