بەيسەنبى, 6 قازان 2022
وزگەلەر 1228 5 پىكىر 16 تامىز, 2022 ساعات 12:56

كيم چەن ىن پۋتيننەن دە بەدەلدىرەك بولماق

ۋكراينا اۋماعىندا سوعىس باستاعاننان كەيىن رەسەيدىڭ بولاشاعى بۇلىڭعىر بەلگىسىزدىككە تاپ بولدى. وعان دەيىن كەرەمەت بولماسا دا، حالىقارالىق قاتىناس ورناتىلعان، ساۋداسى ءجۇرىپ جاتقان ەل ەدى.

بىراق، قازىر ءبارى كەرى كەتىپ، جاعداي تۇبەگەيلى وزگەردى. بۇگىندە رەسەيدە حالىقارالىق بايلانىستار ءىس جۇزىندە ءۇزىلدى. ناتو-عا مۇشە ەلدەردىڭ سانى كوپ ۇزاماي كوبەيەدى، ال اليانسقا ءالى كىرمەگەندەر بۇل تۋرالى ويلانىپ، ءتيىستى قادامدار جاسايتىن بولادى. جىل سوڭىنا دەيىن ۋكرايناعا شاپقىنشىلىعىن توقتاتپاسا الەمدە رەسەيدىڭ جاۋلارى الدەقايدا ارتا تۇسەدى.

ءتىپتى، قىرعىزستاننىڭ دا رەسەي ىقپالىنان شىعۋعا تىرىساتىنىن جوققا شىعارۋعا بولمايدى. قىرعىز ەلىنىڭ اقپاراتىنا قاراعاندا، رەسەيگە قارسى كوزقاراس ۇستاناتىندار بار. رەسەي ساياساتىنا قارسىلاردىڭ الداعى ۋاقىتتا كۇشەيۋى مۇمكىن.

شەتەلدىڭ رەسەيگە قارسى ەكونوميكالىق سانكتسيالارى توقتامايدى. شەكتەۋلەر مۇناي مەن گازعا اسەر ەتىپ، ناتيجەسىندە رەسەيدە قاراجات ازايادى. قارجىنىڭ تاپشىلىعىنان رەسەي ۇلتتىق ءال-اۋقات قورىن الەۋمەتتىك ماسەلەلەردى شەشۋگە جۇمساپ، سارقىپ بىتەدى.

جىل اياعىندا كەسكىلەسكەن ۇرىس اياقتالماسا، پۋتيندىك رەسەي الەمدە سولتۇستىك كورەيادان وتكەن «جەكسۇرىنعا» اينالادى. كيم چەن ىن ءپۋتيننىڭ قاسىندا بەدەلدىرەك بولماق.

بۇل ايتىلعانداردىڭ ءبارى رەسەي ەكونوميكاسىنا بارىنشا كەرى اسەرىن تيگىزىپ قانا قويمايدى. رەسەيدىڭ سوعىستاعى ساتسىزدىكتەرىمەن قوسا العاندا، تەلەديدارداعى ۇگىت-ناسيحاتتى تىڭدايتىن حالىقتىڭ ءوزى بيلىككە سەنىم ارتۋىن توقتاتۋى مۇمكىن. ال بۇل پۋتينگە يادرولىق سوعىستان دا قاتتى تيەدى. ازىرگە سوعىستىڭ رەسەي ءۇشىن ءساتتى اياقتالاتىنىنا بولجام جوق.

كەرىمسال جۇباتقانوۆ

Abai.kz

5 پىكىر