جۇما, 30 قىركۇيەك 2022
1095 2 پىكىر 12 تامىز, 2022 ساعات 11:20

ءبىلىم سالاسىندا قانداي وزگەرىستەر بولماق؟

قر وقۋ-اعارتۋ ۆيتسە-ءمينيسترى عاني بەيسەمباەۆتىڭ ايتۋى بويىنشا بيىلعى جىلدان باستاپ ءبىرىنشى سىنىپ وقۋشىلارى ءۇشتىلدى فورماتتان انا تىلىندە عانا ءبىلىم الۋ فورماتىنا اۋىسادى. بۇل اتا-انالار ءۇشىن دە، وقۋشىلار ءۇشىن دە كوپتەن كۇتكەن جاقسى جاڭالىق بولماق.

مينيسترلىكتە ەنگىزىلگەن تاعى ءبىر جاڭالىق - وقۋ اپتاسىنىڭ ۇزارتىلۋى. ۆيتسە-ءمينيستردىڭ حابارلاۋىنشا، بۇل الەمدىك تاجىريبەدە قۇپ كورىلگەن، جىلدار بويى زەرتتەلگەن جاڭاشىلدىق. بۇرىن وقۋ جىلى 34 اپتانى قۇراسا، بيىلدان باستاپ وقۋشىلار 36 اپتالىق وقۋ جىلىنا كوشەدى. دەمەك، وقۋ جىلى الەتتەگىدەي 1 قىركۇيەكتە باستالىپ 1 ماۋسىمدا اياقتالماق.

“قوعامدا وسىنداي وزگەرىسكە بايلانىستى ءتۇرلى پىكىرلەر بولعانىن بىلەمىز. بىراق، بۇل شەشىم ءبىر كۇندە قابىلدانعان جوق. ءتۇرلى عالىمدار مەن ماماندارمەن قىزۋ تالقىعا سالىنىپ، شەشىم قابىلداندى”، - دەدى ۆيتسە-مينيستر.

ۆيتسە-مينيستر “مەكتەپكە جول” اكتسياسىنا ەرەكشە توقتالىپ ءوتتى. بۇل جوبا اياسىندا از قامتىلعان وتباسىلاردىڭ بالالارىنا وتە ۇلكەن كومەك تيگىزىلەتىنىن اتادى. سونداي-اق ەلىمىزدىڭ بيزنەس وكىلدەرىنە، كاسىپكەرلەرىنە ۇندەۋ سالىپ، مەملەكەتپەن بىرلەسە وتىرىپ وسال وتباسىلارعا كومەك بەرۋگە شاقىردى.

“بۇل اكتسيا بويىنشا ارنايى جوبا دايىندالىپ، قالاي جۇزەگە اسىرىلاتىنىنا دەيىن جازىلعان قۇجات قازىر وبلىستارعا جىبەرىلدى. “مەكتەپكە جول” اكتسياسىنىڭ باستى ماقساتى - بارلىق بالالاردىڭ كيىمگە، قاجەتتى قۇرال-سايمانداوعا بىردەي قول جەتكىزە الۋىن قامتاماسسىز ەتۋ. ەلىمىز ءۇشىن وتە ماڭىزدى ءىس-شارا دەپ ەسەپتەيمىن، -دەدى عاني بەيسەمباەۆ.

سونىمەن قاتار ۆيتسە-مينيستر الەۋمەتتىك وسال توپتاردان شىققان وقۋشىلارعا كومەك بەرىلەتىنىن، قازاقستاننىڭ بۇكىل وڭىرىندە بالالاردى ىستىق تاماقپەن قامتۋ قولعا الىناتىنىن باياندادى. بيىلدان باستاپ مينيسترلىك وقۋشىلارعا كىتاپتىڭ تولىق جەتۋىن دە ءجىتى قاداعالاماق.

“مينيسترلىكتىڭ باستى مىندەتى - وقۋشىلاردى كىتاپپەن قامتاماسسىز ەتۋدى قاداعالاۋ. ەگەر اۋدانداردا، وبلىستاردا وقۋلىق تاپشى بولعان جاعدايدا اتا-انالار جەرگىلىكتى وقۋ بولىمدەرىنە حابارلاسىپ انىقتاي الادى”، - دەپ جالعاستىردى عاني بەيسەمباەۆ.

مينيسترلىكپەن ەنگىزىلگەن قانداي دا جاڭالىقتار ەڭ باستىسى بالا ءۇشىن ىڭعايلى ءارى ءبىلىم الۋىنا قولايلى بولۋى ءتيىس ەكەنىن جەتكىزدى ۆيتسە-مينيستر.

“مۇعالىمدەردىڭ جالاقىلارىنىڭ ءوسىرىلۋى بولسىن، قاعازباستىلىقتان ارىلۋى بولسىن، قانداي دا وزگەرىستەردىڭ استارىندا سايىپ كەلگەندە وقۋشىنىڭ ءبىلىم الۋىنا جاعداي جاساۋ جاتىر. پرەزيدەنتتىڭ ايتقانىنداي، ءدال قازىر مينيستردىكتىڭ باستى نازارى - وقۋشىدا، ونىڭ ساپالى ءبىلىم الۋىندا جانە سول ءبىلىمدى الۋعا جاعداي جاساۋدا”، - دەدى ۆيتسە-مينيستر.

 

Abai.kz

2 پىكىر